Daniel 3 - Mukanda Wa Zambi 1970

Nebukanezore yahana Shimbi ngwenyi, atu eswe awayile kaponya wa oru

¹ Mwanangana Nebukanezore yalinga hamba wa oru. Chizundamo chenyi metro makumi aali ni shimbiali, unene wenyi metro jitatu. Mwe mwanangana yamumika mu chana cha Dura mu chifuchi cha Babilone.

² Mba mwanangana Nebukanezore yalakenya akwa lutwe jenyi eswe: ana jenyi a malunga, ni akwa kuyula yifuchi, ni milopo jo, ni miata ja tujita, ni akwa kufunga mbongo, ni ngaji, ni akwa lutwe akwo a mu yifuchi. Eswe te chaatamba kulikungulula hanga akunjike mwe hamba yoze alingile.

³ Muze akwa lutwe wano eswe haaswa, yaamana kulutwe lia mwe hamba.

⁴ Hohene mukwa kutambika mutambi yakololoka ngwenyi: “Yenu atu a ku yifuchi yeswe, ni mavungu eswe, ni akwa maliji eswe!

⁵ Munwivwa mutambi wa yitavwi. Munubwamuze munwivwa ndembo, ni tulialia, mba mukusula yisaji yeka ni yeka. Muze maabutuka kuyimba, hifulamanenu hashi ni kukombelela mwe hamba wa oru yoze amika kuli mwanangana Nebukanezore.

⁶ Mweswawo kechi kafulamana ni kukombelela, hazehene maamumbila mu lutengo wa kahia.”

⁷ Mba muze heevwa lie liji lia yitavwi, atu a ku yifuchi yeswe, ni mavungu eswe, ni maliji eswe yaafulamana hashi, yaakombelela mwe hamba wa oru yoze amikine mwanangana Nebukanezore.

Akwa kole yaafunda masepa ja Daniel

⁸ Mwaabwamuze amwe Ababilonia yaafunda Ayuda kuli mwanangana.

⁹ Yaalweza mwanangana Nebukanezore ngwo: “Vulie mwanangana!

¹⁰ Hinwasa Shimbi ngwenu, muze maabutuka kwimba yitavwi, mutu mweswe chamutamba kufulamana ni kukombelela hamba yoze wa oru.

¹¹ Mba mweswawo kechi kufulamana ni kukombelela, chatamba kumumbila mu lutengo wa kahia.

¹² Amwe Ayuda aliko, waze wasele ni kuyula chifuchi cha Babilone, Shadrake, ni Meshake, ni Abednego haakolema Shimbi je. Kaasolo kuwayila zambi yenu, chibwe kufulamana kulutwe lia hamba yoze hinunamika.”

¹³ Ha chino mwanangana yalikasa wuli, ngwenyi: “Anehenu!”

¹⁴ Mba yaamba ngwenyi: “Shadrake, Meshake, Abednego, kuma chamwenemwene yenu nunalitunu kuwayila zambi yami ni kufulamana kulutwe lia hamba yoze hinamika, nyi?

¹⁵ Muze munwivwa liji lia yitavwi, ni ndembo, ni tulialia, ni yisaji yikwo, fulamanenu, nukombelele mwe hamba. Alioze nyi kunwachilingile, maanumbila shimbu lizeliene mu lutengo wa kahia. Kuma nunayongo ngwenu, umwe zambi uliko yoze mahasa kunulamwina, nyi?”

¹⁶ Shadrake, ni Meshake, ni Abednego yaakumbulula ngwo: “Vulie mwanangana! Kutuchi kweseka kulihakwila yetwene.

¹⁷ Nyi maatumbila mu lutengo wa kahia, Zambi yoze twakulingila mahasa kutulamwina. Neye matulamwina ku kwoko lienu, mwanangana.

¹⁸ Alioze nyi kazangile, nyingikenu ngwenu, kutuchi kuwayila zambi yenu, chibwe kufulamana ni kukombelela hamba wa oru yoze hinwamika.”

Mwanangana yabatwila masepa ja Daniel ngwenyi, afwe

¹⁹ Hohene mwanangana Nebukanezore yalikasa wuli, huma lienyi yilialumuka ngee. Yahana Shimbi kuli atu jenyi asosele kahia mu lutengo yisuho shimbiali.

^20-21 Mba yambila tujita twenyi yitakame akase malunga waze atatu ni ngoji, kumuwika ni ye yuma yo ya kuzala ha mijimba, mahina, ni yikuto, ni yifulu, ni sapato, aambile mu kahia.

²² Henaho te mwanangana hasa Shimbi ya kusosela kahia kuhiana, mba milengi ya kahia yiyocha e tufunga waze aambilile mu lutengo.

²³ Shadrake, ni Meshake, ni Abednego yaaholoka akukasa mukachi ka kahia.

²⁴ Susumuku mwanangana Nebukanezore yanyangumuka nikulishimwoka. Yahula akwa lutwe jenyi ngwenyi: “Ayenu, malunga atatu twakasanga ni kwaambila mu lutengo, nyi kuchi?” No ngwo: “Ewa, mwane.”

²⁵ Mwanangana ngwenyi: “Kuchi mba ngunamono malunga awana anendangana mu kahia? Keeshi kukasa, ni che chinyingi cha kuwema chakuhi. Mutu wa muchiwana kanasoloka ngwe umwe mwana zambi.”

Mwanangana yatusula masepa ja Daniel, yaanangamisa

²⁶ Mwabwamuze mwanangana Nebukanezore yaya ku chikolo cha lutengo, yakololoka ngwenyi: “Shadrake! Meshake! Abednego! Tuvumbi twa mwe Zambi Chitunda, tuhukenu!” No yaatuhuka hazehene.

²⁷ Ana ja mwanangana a malunga, ni akwa kuyula ja yifuchi, ni milopo jo, ni akwa lutwe akwo ja mwanangana eswe yaalikungulula atale e malunga atatu waze kaawemene ko kahia. Kambu jo kujapapiwile ko, ni mahina jo kaawemene ko, chibwe vumba lia mwishi kaabwile ko nalio.

²⁸ Mba mwanangana yamba ngwenyi: “Zambi ya Shadrake, ni Meshake, ni Abednego afumane! Hatuma kanganda kenyi ka mwilu ni kulamwina malunga wano akumulingila ni kujikijila hali iye. Haakolema Shimbi yami ni kukunjika mwono wo ku kufwa. Haalituna kufulamana ni kuwayila zambi weka shina Zambi yo ene.

²⁹ “Kashika haliabwila ngunase Shimbi ngwami, nyi mutu umwe wa ku chimwe chifuchi, hanji limwe vungu, chibwe limwe liji malelesa Zambi ya Shadrake, ni Meshake, ni Abednego, chatamba kumubatwola yipinji yipinji, ni kubuzula zuwo lienyi. Kukushi zambi mukwo yoze mahasa kulamwina ngwe chino.”

³⁰ Hohene mwanangana yanangamisa Shadrake, ni Meshake, ni Abednego, yaasa mu yihela yinene mu chifuchi cha Babilone.