Daniel 12 - Mukanda Wa Zambi 1970

Matangwa akusula

¹ Kanganda ka mwilu yoze te unazala mahina atoma alefuna yamba ngwenyi: “Ha tangwa lize mwe Mikele, kanganda ka mwilu mukwa lutwe yoze wakufunga atu je, makasoloka. Ha matangwa waze lamba linji mulikabwa ko, lamba ngwe lize kanda libwa kama nilimwe tangwa chize kuze Zambi atangile atu hano hashi. Muze tangwa lize mulikeza, atu eswe a ku vungu lie waze anasonewa mu mukanda wa Zambi kumakaalamwina.

² Anji a kuli waze haanafu kulu kumaakahinduka nawa: amwe kumaakawahilila ni mwono wa miaka yeswe, akwo kumaakevwa sonyi ni sau ya miaka yeswe.

³ Akwa lutwe a mana kumaakapanguka ngwe pangu lia mwilu. Atu waze haanalongesa atu anji kulinga yuma ya ululi maakapanguka ngwe matongonoshi ndoo ku miaka yeswe.”

⁴ Mwe kanganda yangwamba nawa ngwenyi: “Daniel, hibakika mukanda, uuse chinyingi ndoo ku songo lia hashi. Atu anji sali ni sali maakalitachika hanga akeseke kunyingika yuma yize chize yinapu.”

⁵ Mba yingumona atu aali kaanamana ku mbumbulu ya lwiji, umwe muno musali, mukwo muze musali.

⁶ Umwe wa kuli ayo yahula kanganda ka mwilu yoze unamana ku tunda ngwenyi: “Miaka yingahi yasala ko ndoo ku songo lia yuma yino?”

⁷ Kanganda ka mwilu yolola moko jenyi eswe aali mwilu, yalakenya ni jina lia Zambi wa miaka yeswe. Yingumwivwa nikwamba ngwenyi: “Chino muchikabwa ha miaka yitatu ni Chipinji. Muze yihungumiona ya atu ja Zambi muyikamanunuka, mba yuma yino yeswe muyikabwa.”

⁸ Yingwivwa yize te anahanjika, alioze kuyangulumbunukinyine ko. Mba yinguhula ngwami: “Aa mwata, ngwe kuchi muyikamanunuka?”

⁹ Yangukumbulula ngwenyi: “Daniel, Chakutamba kuya kwe, mumu yuma yino yili yakusweka ni yakuhengeka ndoo ni muze songo mulikeza.

¹⁰ Atu anji maakalibemesa. Yingulungulu keechi kevwa ulumbunwiso wacho, alioze maakanyongonona nikulinga ungulungulu wo; shina lume akwa mana e maakevwa ulumbunwiso wacho.

¹¹ “Chize ku tangwa lia kukanjisa milambu ya tangwa ha tangwa, kafwa ngwe, chize ku tangwa lia kusoloka cha Chipupu cha Kuvwisa Woma kumukukabwa matangwa 1,290.

¹² Kaawaha waze maakafunga ufulielo wo ndoo ni kumanunuka cha matangwa 1,335!

¹³ “Yena Daniel, bwako mukwa kushishika ndoo ku songo. Hohene muukafwa, alioze muukahinduka ni kutambula fweto ye ku songo lia matangwa.”