Daniel 11 - Mukanda Wa Zambi 1970

¹ Kali ni yilemu ya kungukwasa ni kunguhakwila.

² Yuma yize ngunazange kukulweza yili yamwenemwene.” Kanganda ka mwilu yamba ngwenyi: “Mianangana atatu akwo maakayula Persia. Hohene mwanangana wa muchiwana makasula ko yoze makabwa pichi kuhiana akwo eswe. Muze makabwa ni tachi ni upichi kuhiana, makasangumuna wanangana wa Gresia.

Mawanangana a ku Sude ni ku Norde

³ “Hohene mukukasoloka umwe mwanangana chitakame. Neye makayula mu wanangana unene, makalinga cheswacho anazange.

⁴ Alioze muze makabwa ni tachi kuhiana, wanangana wenyi muukahandunuka mu yihanda yiwana. Mianangana waze hi a ku vungu lienyi ko maakamusalakana, alioze keechi kabwa ni tachi ngwe iye.

⁵ “Mwanangana wa ku Sude makabwa ni tachi. Alioze umwe mwata wa kuli tujita twenyi makamuhiana, makayula mu wanangana unene Wahiana.

⁶ Kulutwe lia yimwe miaka mwanangana wa ku Sude makalikata Usendo ni mwanangana wa ku Norde, makahangisa mwanenyi kuli iye. Alioze Usendo uze kuuchi kalinduluka, ni mwe pwo, ni lunga, ni mwe mwano, ni e tuvumbi waze amutwalile, eswe maakaashiha.

⁷ Ha matangwa waze, umwe lunga wa kuli usoko wa pwo yoze makamupwisa mwanangana. Neye makasa jita ni mwanangana wa ku Norde, makanjila mu limbo lio liakukoleka, makaakumba.

⁸ Makabuba tuponya twa mazambi jo, ni yuma ya oru ni ya prata yize akunjikile kuli mazambi jo, ni kuyitwala ku Egiptu. Mba kulutwe lia yimwe miaka ya uhwimino,

⁹ mwanangana wa ku Norde makanjila mu chifuchi cha mwanangana wa ku Sude, alioze maakamuhuma ni tachi.

¹⁰ “Hohene ana ja mwanangana wa ku Norde maakalulika jita, maakakamba tujita anji. Umwe wa kuli ayo makaasupwokela ngwe sanga lia meya, makasa jita ni limwe limbo liakukoleka lia akwa kole jenyi.

¹¹ Mwanangana wa ku Sude, mu ufwatulo wenyi, makalimika ni mwanangana wa ku Norde, makakumba chihuji cheswe cha tujita twenyi.

¹² Makalengumuka mumu ha kukumba chenyi ni mumu ha tujita anji waze hashiha, alioze kechi kalinduluka nikukumba.

¹³ “Ha matangwa waze mwanangana wa ku Norde makaya ni kukamba tujita anji kuhiana waze abwile no hatangu. Muze tangwa lienyi hiliaheta, mba makahiluka ni mbunga yinji ya tujita waze anyingika kwasa jita.

¹⁴ Hohene atu anji maakakatukila mwanangana wa ku Sude. Amwe yitanganyanyi a ku vungu lia yena, Daniel, maakachingashana mumu ha Usolwelo uze haamona, alioze kumaakanonga.

¹⁵ Mba mwanangana wa ku Norde makalimika ni limwe limbo liakukoleka, makalitambula. Tujita twa wanangana wa ku Sude hikeechi kasa nawa jita, chibwe tujita two a hamu kuhiana hikeechi kabwa nawa ni tachi.

¹⁶ Mwanangana wa ku Norde makalinga cheswacho anazange, niumwe kechi kajikiza ku meso jenyi. Kumakamana mu chifuchi cha Chilakenyo ni kuchiyula liakulu.

¹⁷ “Makalulika jita ni tujita twenyi eswe. Makeseka kwonona wanangana wa ku Sude ha kukolesa nenyi Usendo wa kwonga ni kuhangisa mwanenyi kuli iye, alioze kululika chenyi kuchichi kawaha.

¹⁸ Makabwamuze makasa jita ni mavungu a ku mbumbulu ya kalunga lwiji, makakumba anji a kuli ayo. Alioze umwe mukwa kuyula, chilambala, makamukumba ni kumusa songo ha kulengumuka chenyi. Kulengumuka chize muchikahiluka hali mwanangana wa ku Sude iye mwene.

¹⁹ Makahiluka ku membo akukoleka a mu chifuchi chenyi mwene, alioze akwa kole maakamukumba, mba maakamusa songo.

²⁰ “Mba mwanangana mukwo makamusalakana. Mwenawo makatuma umwe chilolo ni kubinjisa atu ni lijimu hanga awezele ubite wa ku wanangana wenyi. Ha shimbu likepe mwanangana yoze maakamushiha, alioze hi ku meso ja atu ko, chibwe mu jita ka.”

Mwanangana, chingulungulu, wa ku Norde

²¹ Kanganda ka mwilu yaweza ho ngwenyi: “Mwanangana wa ku Norde wasula ko makabwa chingulungulu, te katelele kubwa mwanangana, alioze makeza susumuku ni kutambula wanangana ni tachi.

²² Mweswawo makalimika nenyi, chibwe mwata wa mahako ja Zambi, kumakamusapula ni kumwonona.

²³ Kumakonga mavungu amwe ni kukolesa no Usendo. Kumakalikoleleza lume, chibwe vungu lienyi mulikabwa likepe.

²⁴ Makanjila mu chimwe chifuchi cha ubite unji ni kwatungumuna, makalinga yuma yize tushakulu twenyi kaalingile ko. Mba makapangila yuma yize abubile mu jita ni atu jenyi. Makalulika kutambula membo akukoleka, alioze matangwa jenyi maakahwa nikawashi.

²⁵ “Makakatwisa tujita anji akalimike ni mwanangana wa ku Sude. Neye makalulika kulimika nenyi ni chihuji chinene cha tujita a tachi. Alioze mwanangana wa ku Sude kumaakamwonga, kechi kakumba.

²⁶ Akwa kuyula jenyi, waze akulia nenyi, maakeseka kumushiha. Tujita twenyi anji maakafwa, akwa kole maakakumba mbunga yenyi ya tujita.

²⁷ Hohene mianangana waze aali maakatwama ku meza yimuwika nikulia, alioze maakalionga ene. Keechi kafumbula mu yize te maakazanga kulinga, mumu tangwa liayo kanda lichiheta.

²⁸ Mwanangana wa ku Norde makahiluka ku mahienyi ni yuma yeswe yize makabuba mu jita, makeseka kubinjisa Usendo wa atu ni Zambi. Makalinga ngwe chize anazange, mba makahiluka ku chifuchi chenyi.

²⁹ “Makabwamuze makanjila nawa mu wanangana wa ku Sude, alioze chisuho chize kuchichi kabwa ngwe chisuho chitangu.

³⁰ Akwa mato a ku mbumbulu ya kalunga lwiji ku chitokelo maakeza ni kulimika nenyi. Neye makevwa woma. “Hohene makahiluka ni ufwatulo ni kweseka kubinjisa uwayilo wa atu ja Zambi. Makakaula chiyulo cha waze haanehuka kuli Zambi.

³¹ Amwe a kuli lujita twenyi maakajilula zuwo lia Zambi. Maakakanjisa atu kulambula milambu ya tangwa ha tangwa, maakamika Chipupu cha Kuvwisa Woma.

³² Mwanangana makakoka ni kalimbalimba waze haanehuka kulu Usendo wa Zambi ni atu. Alioze makalimika ni waze akukaula Zambi.

³³ Tetekeli akwa mana maakalongesa atu anji, alioze ha amwe matangwa akwa mana waze kumaakafwa mu jita, kumaakoocha kahia, kumaakaapwisa funge, kumaakabuba yuma yo.

³⁴ Muze maakashiha tetekeli waze, amwe atu maakakwasa atu ja Zambi hakepe. Alioze anji waze maakalikunda no, maakachilinga ni ulembekese.

³⁵ Amwe tetekeli akwa mana waze maakaashiha, kashika atu ja Zambi maakalibemesa. Chino muchikalinduluka ndoo ku songo, lie tangwa lize atongwele Zambi.

³⁶ “Mwanangana wa ku Norde makalinga ngwe chize anazange. Makalichichimieka ngwenyi, ngunahiana mazambi eswe, kuhiana chibwe mwe Zambi Chitunda. Makachilinga ndoo ku tangwa lize Zambi makamumwesa lamba. Zambi makalinga nikulita ni chize hanalulika kulu.

³⁷ Mwanangana kechi kalemesa zambi ya tushakulu twenyi, chibwe zambi yoze akuzanga mapwo. Kafwa ngwe, kechi kalemesa zambi niumwe, mumu makanyonga ngwenyi, ngunahiana ayo eswe.

³⁸ Alioze kumakalemesa zambi yoze wakufunga membo akukoleka. Kumakalambula oru, ni prata, ni mawe a ndando yinji, ni yuma yikwo yilemu kuli umwe zambi yoze tushakulu twenyi kaanyingikine ko nilimwe tangwa.

³⁹ Ha kufunga e membo jenyi akukoleka, makatambika atu waze akuwayila umwe zambi wa yilambala. Makalemesa kuhiana atu waze maakatayiza chiyulo chenyi, makaaha yihela yinene yinene, makaaha minda ha kwakundulula.

⁴⁰ “Muze tangwa lia mwanangana wa ku Norde hiliakundama, mwanangana wa ku Sude makasa nenyi jita. Mwanangana wa ku Norde makalimika nenyi ni tachi jenyi jeswe, ni e matemba, ni tuvwalu, ni akwa maulungu anji. Makanjila mu yifuchi yinji ni tachi, ngwe sanga lia meya.

⁴¹ Makanjila chibwe mu chifuchi cha Chilakenyo, makashiha mo atu tununu ni tununu. Alioze akwa yifuchi ya Edome, ni Moabe, ni waze anasala mu chifuchi cha Amone kumaakachina.

⁴² Muze makanjila mu yifuchi yino yeswe, chibwe chifuchi cha Egiptu kechi keecha.

⁴³ Kumakabuba yuma ya kusweka ya mu Egiptu ya oru, ni prata, ni yuma yikwo ya ndando yinji. Makakumba Libia ni Sudane.

⁴⁴ Hohene sango ja ku chivumbuko ni ku norde mujikamuvwisa woma, mba makasa jita ni ufwatulo kuhiana, makashiha atu anji.

⁴⁵ Makajika mazuwo jenyi anene a makubu a wanangana mukachi ka mulundu haze haatungiwa zuwo lia Zambi ni kalunga lwiji. Alioze kumakafwa, kukuchi kabwa niumwe yoze makamukwasa.”