Daniel 10 - Mukanda Wa Zambi 1970

Usolwelo wa Daniel ku lwiji Tigrise

¹ (Ha mwaka wa muchitatu wa kuyula cha Siruse, mwanangana wa Persia, Daniel, yoze te akuvuluka ngwo Belteshazare, yevwa maliji mu Usolwelo. E maliji abwile amwenemwene alioze chikalu kunyingika ulumbunwiso wo, mba yamulumbunwinoo mu Usolwelo ukwo.)

² Ha matangwa waze nabwile ni chinyengo ha semana jitatu.

³ Chalile ko yakulia yiyema hanji yifwo, chibwe vinyu chayinwine ko, hanji kusakula kambu jami ndoo semana jitatu yijibalika.

⁴ Ha tangwa makumi aali ni lia muchiwana lia kakweji mutangu wa mwaka, te ngunamana ku mbumbulu ya lwiji Tigrise.

⁵ Yinguhetuka, yingumona umwe mutu te unazala mahina atoma alefuna ni muya wa oru yibema.

⁶ Mujimba wenyi yiubeyima ngwe mawe a ndando yinji. Huma lienyi yilibwa ngwe mihenyo ya njaji, meso jenyi ngwe milengi ya kahia. Moko ni makungunwa jenyi ngwe unengu wakucheka, liji lienyi ngwe lushindo wa mbunga ya atu anji.

⁷ Usolwelo uze shina yami ukawami naumwene. Atu waze nabwile no kaamwene ko Chuma nichimwe, alioze yeevwa woma, yaachina ni kuswama.

⁸ Yingusala ko ukawami, yingutala Usolwelo uze wakulishimwoka. Chabwile ko nawa ni tachi, ku meso jami yikwalumuka, mutu niumwe wangunyingikine.

⁹ Muze nevwile liji lino, yingulimbuka, manyonga yaangutoka, yingubomba ko meso hashi.

¹⁰ Mba limwe kwoko yilingukwata, yilingulekumuna mu molu ni mu moko.

¹¹ Mwe kanganda ka mwilu yangwamba ngwenyi: “Daniel, Zambi kanakuzange. Katuka, ubanjike kanawa yeswe yize ngunakwambulwila. Hangutuma kuli yena.” Muze hamba chino, yingukatuka, te ngunachikima nganganga.

¹² Mba yangwamba ngwenyi: “Daniel, kanda wivwa woma. Zambi hevwa kulemba che chize ku tangwa litangu lize unakabutuka kulikehesa hanga unyingike ulumbunwiso wa we Usolwelo. Yami hineza ni kukwaha kumbululo lia kulemba che.

¹³ Mwe kanganda ka mwilu, kafunga ka wanangana wa Persia, yalimika ni yami matangwa makumi aali ni limuwika. Mba Mikele, mukwa lutwe wa tunganda twa mwilu, yeza ni kungukwasa, mumu nasalile ukawami mu Persia.

¹⁴ Hineza ni kukulumbunwina kanawa yize muyikeza hali atu je kulutwe. Uno we Usolwelo wa yuma yize muyikeza ho.”

¹⁵ Muze hamba chino, yinguhetamina hashi nee, kuhasa kuhanjika ka.

¹⁶ Mwe kanganda, yoze te unalifu ngwe mutu, yolola kwoko lienyi, yangusa kwoko ku mivumbo. Yingumwamba ngwami: “Mwata, Usolwelo uno hiwangulekumuna, chisolo kuhasa kujikiza.

¹⁷ Nguli ngwe ndungo yoze unamana ku meso ja mwata wenyi. Ngwe kuchi munguhasa kuhanjika ni yena? Chishi nawa ni tachi, ni we mwono Chishi nawo.”

¹⁸ Neye yangukwata nawa, mba yingulikoleleza yimwe ko.

¹⁹ Yangwamba ngwenyi: “Zambi kanakuzange, kashika Chuma nichimwe kanda chikubikalisa hanji kukuvwisa woma.” Muze hamba chino, yingulikoleleza nawa, yingwamba ngwami: “Mwata hingulweze yeswe yize unazange. Hiwangutakamisa kanawa.”

^20-21 Yangwamba ngwenyi: “Unanyingika mumu yika hineza kuli yena, nyi? Kuneza hanga ngukulweze yuma yize yasonewene mu Mukanda Wamwenemwene. Haliabwila Changutamba kuhiluka hanga ngulimike ni kanganda ka mwilu, kafunga ka Persia. Mabwamuze mwe kanganda ka mwilu, kafunga ka Gresia, makasoloka. Kukushi niumwe yoze mangukwasa shina Mikele, kanganda ka mwilu, kafunga ka Israele.