Daniel 1 - Mukanda Wa Zambi 1970

Sango Ja Daniel Ni Masepa Jenyi ( 1:1—6:28 ) Akweze ku chota cha mwanangana Nebukanezore

¹ Ha mwaka wa muchitatu wa kuyula cha Jehoakime, mwanangana wa chifuchi cha Yuda, mwanangana Nebukanezore wa chifuchi cha Babilonia yasa jita ni Yerusaleme, yaseleka lie limbo.

² Mwene Zambi yamutayiza kukwata mwanangana Jehoakime ni kububa umwe ubite wa mu zuwo lia Zambi. Neye yaya ni amwe funge ku zuwo lia mazambi jenyi mu limbo lia Babilone, yasa yuma yize abubile mu mazuwo a kutulikila.

³ Mwanangana wa Babilonia yambila Ashpenaze, mwata wa akwa kuyula jenyi, atongole mukachi ka funge Aisraele amwe ana malunga a ku jiko lia mwanangana ni a kuli atu alemu.

⁴ Chaatamba kubwa malunga abema ku meso, akwa mana, akwa kulongoloka, akwa kujama, waze keeshi kapalia, hanga ahase kulinga mulimo mu chota cha mwanangana. Mwe Ashpenaze te chaatamba kwalongesa kutanga ni kusoneka liji lia Ababilonia.

⁵ Mwanangana yahana nawa Shimbi ja kwaaha tangwa ha tangwa yakulia ni vinyu yize akulia akwa lutwe mu zuwo lia mwanangana.

⁶ Mukachi ka waze atongwele mwabwile Daniel, ni Hanania, ni Mishael, ni Azaria, eswe te a ku vungu lia Yuda.

⁷ Mwata wa akwa kuyula yaaha majina aha: Belteshazare, ni Shadrake, ni Meshake, ni Abednego.

⁸ Alioze Daniel yabatula ngwenyi, kechi kalichisa ha kulia ni kunwa yuma ya mu zuwo lia mwanangana, kashika yahula Ashpenaze amukwase.

⁹ Zambi yaha Ashpenaze manyonga abema haku twala kuli Daniel.

¹⁰ Alioze Ashpenaze yevwila mwanangana woma. Kashika yambila Daniel ngwenyi: “Mwanangana habatula chize chanutamba kulia ni kunwa. Nyi kunuchi kutohwa ngwe akweze akwo, mangushiha.”

¹¹ Daniel yaya kuli kafunga yoze Ashpenaze aahele ha kwafunga.

¹² Ngwenyi: “Achitweseke kama matangwa kumi. Nutwehe lume yilimalima ya kulia ni meya a kunwa,

¹³ mba hanga numone chize mutubwa yetu ni chize mabwa akwetu waze akulia yakulia ya mu zuwo lia mwanangana. Mba munubatula nikulita ni chize munumona.”

¹⁴ Neye yatayiza kweeseka ha matangwa kumi.

¹⁵ Muze matangwa kumi haabalika, yaabema ku meso, yaatohwa kuhiana waze te akulia yakulia ya mwanangana.

¹⁶ Kashika chize ku tangwa lize, kafunga yachiza yakulia ya mwanangana, yaatayiza kulia yilimalima.

¹⁷ Zambi yaaha ana malunga waze yinyingi, ni kulongoloka mu mikanda yeka ni yeka, ni mana a kushinginyeka. Zambi yamwaha Daniel mana ni kulumbununa Usolwelo ni yilota.

¹⁸ Muze miaka yitatu hiyabalika, Ashpenaze yatwala ana malunga waze eswe maha mwanangana nikulita ni Shimbi ya mwanangana.

¹⁹ Mwanangana yahanjeka ni ayo eswe, mba Daniel, ni Hanania, ni Mishael, ni Azaria yaamuwahila kuhiana akwo eswe. Kashika yaapwisa akwa kuyula mu chota chenyi.

²⁰ Muze te mwanangana akwahula chiyulo hakutwala ku yihula yikalu, yamona ngwenyi, ana malunga waze awana kaali ni mana yisuho kumi kuhiana tahi ni akwa tufutafuta eswe a mu wanangana wenyi.

²¹ Daniel yatwama mu chota cha mwanangana ndoo tangwa lize Siruse, mwanangana wa chifuchi cha Persia, akumbile Ababilonia.