A-ROMA 9 - Mukanda Wa Zambi 1970

Zambi ni Aisraele

¹ Ngunahanjika umwenemwene, nguli wa mbala wa Kristu. Mbunge yami, yize Mwiku wa Linanga wakusongwela, yinangushindakenya nawa ngwenyi, Chishi kuhanjika mahuza.

² Chinyengo chinji ngunevu mu mbunge ni yikola yize kuyishi kuhwa.

³ Mumu ngunatayiza ngwami, Zambi angushinge ni kunguhandununa ni Kristu mumu hali usoko wami, Aisraele.

⁴ Zambi yaapwisa ana jenyi. Hanaliendela no mu uhenya wenyi. Hanalingi no Usendo. Hanaahe Shimbi, ni uwayilo, ni yilakenyo yenyi.

⁵ Kaali a ku Chikota cha tushakulu twetu. Nawa Kristu, nikulita ni uutu wenyi kali wa ku Chikota cho. Mwenawo kali helu lia eswe, tuhalisenu Zambi ku miaka yeswe. Chibwe kama Chenacho.

⁶ Alioze Chambile ngwami, chilakenyo cha Zambi Chahonene. Mumu vungu lia Aisraele, hi eswe ko vungu liamwenemwene lia Aisraele.

⁷ Chibwe atu waze asemukine kuli Abrahama, hi eswe ko ana jenyi amwenemwene. Mumu Zambi yambila Abrahama ngwe nyi: “Shina waze lume maakasemuka kuli Isake enoo maakalula ngwe ana je.”

⁸ Kafwa ngwe, ana ja Zambi, hi waze akusemuka nikulita ni ndako ya uutu ko. Alioze ana amwenemwene a Zambi shina waze lume akusemuka nikulita ni chilakenyo cha Zambi.

⁹ Mumu Zambi yalweza chilakenyo chenyi ni maliji wano ngwenyi: “Muze tangwa mulikaheta, mungukahiluka, mba Sara makasema mwana lunga.”

¹⁰ Hi chino wika ko. Mumu ana malunga waze Rebeka asemene, ayo eswe aali yaabwa ni tata umuwika, kashakulu ketu, Isake.

^11-12 Alioze Zambi kakutongola atu nikulita ni kunyonga chenyi. Muze akutongola atu, keshi kuchilinga mumu ha yitanga yo, alioze kakwatongola nikulita ni kunyonga chenyi. Zambi yaalweza chize chili kunyonga chenyi, yambila Rebeka ngwenyi: “Mukulwana makalingila kanuke.” Zambi maliji wano yahanjika, muze te ana kanda achisemuka, muze e ana kanda achilinga chibema hanji chibi.

¹³ Ngwe hichinasonewa mu Mukanda wa Zambi ngwo: “Hingunazange Yakoba, alioze hingunavutwokela Esau.”

¹⁴ Mba kuchi mutwamba? Zambi kali chihenge, nyi? Ngwetu, ka lume!

¹⁵ Mumu hanambila Mose ngwenyi: “Munguvwila keke yoze munguvwila keke. Munguvwila utu yoze munguvwila utu.”

¹⁶ Kashika, hi ku kuzanga cha mutu ko, hanji ku kuhondangana chenyi ko, alioze shina lume cha kuli Zambi yoze wakuvwila keke.

¹⁷ Mu Mukanda wenyi, Zambi yambila mwanangana wa Egiptu ngwenyi: “Hingunakupwisa mwanangana ha kusolola ndundo jami muli yena, nawa hanga jina liami alinyingike hashi heswe.”

¹⁸ Chenacho, Zambi akuvwila keke yoze anazange kuvwila keke, kakukalisa mbunge ya yoze anazange kukalisa.

Utenu wa Zambi ni keke yenyi

¹⁹ Umwe mangwamba ngwenyi: “Nyi chinabu chocho, ngwe kuchi Zambi mahasa kusuma atu mulonga? Mumu iya malimika ni upale wenyi?”

²⁰ Alioze yena iya unalimika ni Zambi? Ndeho ya uma muyihula yoze wayitengele ngwenyi: “Kuchi wangutengele chize,” nyi?

²¹ Tengi mahasa kulinga chize anazange ni uma. Ni mwaha umuwika mahasa kutenga chikashi chimuwika chilemu ni chikwo chilelu.

²² Chimuwika ni chize alingile Zambi. Yazanga kulweza utenu wenyi ni ndundo jenyi. Kashika, yalihumikiza ni uhomboloji ni waze haneevwila wuli, waze atelele kwonona.

²³ Yazanga nawa kulweza kulumbama cha uhenya wenyi, yetu waze evwilile keke, yetu waze Zambi hanaliange kululika ha kutambula uhenya wenyi.

²⁴ Mumu tuli waze hanaatambika, hi hakachi ka Ayuda wika ko, alioze nawa hakachi ka mavungu akwo.

²⁵ Chenacho Zambi anambe mu mukanda wa Hosea ngwenyi: “Waze kaabwile ko atu jami, mungukaavuluka ngwami: ‘Atu jami.’ Vungu lize te Chishi kuzanga, mungukalivuluka ngwami: ‘Akwetu.’

²⁶ Kuma kuze akwamba ngwo: ‘Hi nuli atu jami ko,’ kwenako makaavuluka ngwo: ‘Ana ja Zambi ya mwono.’ ”

²⁷ Izaya kanakololoka hakutwala kuli Aisraele ngwenyi: “Chibwe Aisraele ahiana naye kwoka ngwe masekeseke a ku kalunga lwiji, shina akepe hakachi ko makaalamwina.

²⁸ Mumu Mwene Zambi makamanununa ubatwilo wenyi nikawashi hano hashi.”

²⁹ Ngwe Izaya hanachambe kulu ngwenyi: “Nyi Mwene Mukwa Ndundo Jeswe katuhichikilile amwe atu jenyi, kachi mutukabwa ngwe atu ja mu Sodome, kachi mutukalifwa ni atu ja mu Gomora.”

Aisraele ni Sango Jibema

³⁰ Mba twambe kuchi ha chikuma chino? Tunambe ngwetu, atu waze hi Ayuda ko, waze kaasele ko tachi ja kubwa akwa ululi, enoo Zambi hanaapwisa akwa ululi mumu ha ufulielo wo.

³¹ Alioze Aisraele, waze Zambi atongwele, te kaakufupa Shimbi jize Zambi mahasa kwapwisa najo akwa ululi, alioze kaawanyine ko ululi uze.

³² Ha chikuma chika? Ha chikuma chino ngwetu, te keeshi kufupa Zambi aapwise akwa ululi ha ufulielo wo, alioze te kaakufupa ngwo, Zambi aapwise akwa ululi ha yize te akulinga. Yaatalinga ha “Liwe lia kutalingisa.”

³³ Ngwe hichinasonewa mu Mukanda wa Zambi ngwo: “Talenu, ngunase mu Zione liwe lia kutalingisa atu, Luliwe lwa kulimbwisa atu. Alioze mamufuliela kechi kevwa sonyi.”