A-ROMA 8 - Mukanda Wa Zambi 1970

Mwono uze Mwiku wa Zambi wakuhana

¹ Alioze haliabwila waze haanalinungu ni Yesu Kristu keeshi ni uhiso.

² Mumu Shimbi ya Mwiku wa Linanga, yize yakuhana mwono ha kulinunga ni Yesu Kristu, hiyinangutusula ku Shimbi ya shili ni kufwa.

³ Zambi walingile chize Shimbi ja Mose kujahashile kulinga mumu ha ulelu wa uutu. Yahisa shili ya uutu muze atumine Mwanenyi, yoze wejile ni kulifwa cha uutu wa shili ha kuchiza shili.

⁴ Zambi yalinga chino hanga ululi wa Shimbi umanunuke muli yetu twakwenda, hi nikulita ni ndako yibi ya uutu ko, alioze nikulita ni ndako ya Mwiku wa Linanga.

⁵ Mumu waze akwenda nikulita ni ndako yibi ya uutu, kaakunyonga yuma yize uutu unazange. Alioze waze akwenda nikulita ni ndako ya Mwiku wa Linanga, kaakunyonga yuma yize Mwiku wa Linanga unazange.

⁶ Kunyonga chize uutu unazange chakutwala ku kufwa, alioze kunyonga chize Mwiku wa Linanga unazange chakutwala ku mwono ni uhwimino.

⁷ Mumu yoze wakunyonga nikulita ni ndako yibi ya uutu kali mukwa kole wa Zambi. Keshi kwononokena Shimbi ja Zambi, ni mwene keshi kuhasa kujononokena.

⁸ Waze akutayiza ndako yibi ya uutu keeshi kubemena ku meso ja Zambi.

⁹ Nyi chamwenemwene Mwiku wa Zambi watwama muli yenu, kachi kunushi kwenda nikulita ni ndako yibi ya uutu, alioze nikulita ni ndako ya Mwiku wa Zambi. Yoze keshi Mwiku wa Kristu, hi ni wenyi ko.

¹⁰ Nyi Kristu kali muli yenu, kachi Mwiku wa Linanga uli mwono muli yenu, mumu hananupwisa akwa ululi, chibwe mijimba yenu yinafu mumu ha shili.

¹¹ Zambi yoze wahindwishile. Yesu ku kufwa, nyi Mwiku wenyi watwama muli yenu, kachi makapwisa nawa ni mwono mijimba yenu yize muyikafwa. Makachilinga ni tachi ja Mwiku wa Linanga.

¹² Chenacho akwetu, yilemu tuli nayo, alioze hi kwenda nikulita ni ndako yibi ya uutu ko.

¹³ Mumu, nyi munwenda nikulita ni ndako yibi ya uutu, munukafwa. Alioze, nyi ku tachi ja Mwiku wa Linanga munushiha yitanga yenu yibi, munukabwa ni mwono.

¹⁴ Eswe waze Mwiku wa Zambi wakusongwela, enoo e ana ja Zambi.

¹⁵ Mumu Mwiku uze nwatambwile, hi uze wakunupwisa ndungo ni kunuvwisa woma ko. Alioze kuuli Mwiku uze wakunupwisa ana ja Zambi. Ku tachi jenyi twakutambika Zambi ngwetu: “Tata! Tata yetu”!

¹⁶ Mwiku wa Zambi wakushindakenya hamwe ni mbunge jetu ngwo, tuli ana ja Zambi.

¹⁷ Tuli ana jenyi, kashika, tuli nawa maswana ja Zambi ni maswana hamwe ni Kristu. Mumu, nyi mutwivwa lamba hamwe ni Kristu, kachi mutubwa nawa hamwe nenyi mu uhenya wenyi.

Uhenya uze muwizaho

¹⁸ Nakunyonga ngwami, lamba lia mwakono kuliatelele kulieseka ni uhenya uze Zambi makatusolwela.

¹⁹ Yuma yeswe yize Zambi atangile kuyakushimbula ni usona ngwo, Zambi asolole ana jenyi.

²⁰ Yuma yeswe yize Zambi atangile hanayipwisa yamokomoko, hi ku Zanga chayo yene ko, alioze ku kuzanga cha Zambi. Hindu kushimbula kuchili ngwo,

²¹ yuma yeswe muyikatusuka limwe tangwa ku undungo wa kufwa, muyikabwa ni Chihanda cha kutusuka cha uhenya wa ana ja Zambi.

²² Mumu tunanyingika ngwetu, ndoo haliabwila yuma yeswe yize Zambi atangile kuyakutwa mikuma nikumona lamba ngwe pwo yoze unaseme.

²³ Alioze hi ayo wika ko. Yetu, waze tukwete kulu Mwiku wa Linanga ngwe chawana chitangu cha Zambi, twakutwa nawa mikuma muli yetwene nikushimbwila ngwetu, Zambi atupwise ana jenyi ni kutusula mijimba yetu yeswe.

²⁴ Hanatulamwina mumu twasele ko mbunge ngwetu, matulamwina. Alioze, nyi hitwatambula kulu Chuma chize te twakusa mbunge, hikutwahashile kusa ko nawa mbunge. Mumu iya masa mbunge ku Chuma chize hanatambula kulu?

²⁵ Alioze, nyi twakushimbwila Chuma chize kanda tutambula, chatutamba kulihumikiza ha kuchishimbwila.

²⁶ Chizechene nawa, Mwiku wa Linanga wakutukwasa yetu alelu. Mumu kutwanyingikine kulemba ngwe chize chinalite, alioze we Mwiku wakutuhakwila kuli Zambi ni mikuma yize kuwahashile kuyilumbununa ni maliji.

²⁷ Alioze Zambi yoze wakuhengula mu mbunge ja atu, kananyingika kunyonga cha Mwiku wa Linanga. Mumu Mwiku wakuhakwila akwa Kristu nikulita ni upale wa Zambi.

²⁸ Mumu tunanyingika ngwetu, ha yuma yeswe Zambi kakulinga yibema kuli waze akumuzanga, kuli waze atambikile nikulita ni kunyonga chenyi.

²⁹ Mumu waze Zambi hanaatongola kulu, hanaabatwila kwapwisa nikulifwa cha Mwanenyi, hanga Mwanenyi akabwe mutangu wa ana akwo anji.

³⁰ Waze Zambi atongwele kulu, yaatambika nawa. Waze atambikile, yaapwisa nawa akwa ululi. Waze apwishile akwa ululi, yaaha nawa Chihanda cha uhenya wenyi.

Zango lia Zambi

³¹ Kuchi mutwamba hakutwala ku yuma yino? Nyi Zambi kali hamwe ni yetu, iya mahasa kulimika ni yetu?

³² Zambi kalitunyine ko kutwaha chibwe Mwana wa iye mwene, alioze yamukunjika hali yetu eswe. Ngwe kuchi kechi kutwaha yuma yeswe hamwe nenyi?

³³ Iya masuma mulonga waze Zambi hanatongola? Niumwe. Zambi mwene wakwapwisa akwa ululi.

³⁴ Iya mahasa kwahisa? Niumwe, mumu Yesu Kristu, yoze wafwile, yoze Zambi ahindwishile ku kufwa, kali ku kwoko lia chindume cha Zambi. Kakutuhakwila kuli Zambi.

³⁵ Iya mahasa kutuhandununa ku zango lia Kristu? Lamba, nyi? Yinyengo, nyi? Yihungumiona, nyi? Zala, nyi? Uswale, nyi? Utoji, nyi? Ngwetu ka!

³⁶ Ngwe hichinasonewa mu Mukanda wa Zambi ngwo: “Tangwa Heswe tuli mu utoji wa kufwa mumu hali yena. Kaakutunyongena ngwe tuli mapanga waze maashiha.”

³⁷ Alioze mu yuma yino yeswe twakukumba kuhiana ni ndundo ja yoze watuzangile.

³⁸ Mumu ngunanyingika pundu ngwami, nichimwe muchihasa kutuhandununa ku zango lienyi, chibwe kufwa, hanji mwono, chibwe tunganda a mwilu, hanji akwa kuyula, hanji akwa ndundo akwo mwilu, chibwe yuma ya haliabwila, hanji yize muyiza ho,

³⁹ chibwe tachi ja mwilu, chibwe tachi ja hashi, hanji Chuma chikwo chize atangile. Nichimwe muchihasa kutuhandununa ku zango lize Zambi hanatulweze muli Kristu Yesu, Mwene wetu.