A-ROMA 7 - Mukanda Wa Zambi 1970

¹ Akwetu, nunanyingika kanawa chize ngunambe kwamba, mumu nunanyingika Shimbi ja Mose. Shimbi kujakuyula mutu shimbu achili ni mwono.

² Kali ngwe pwo lia ulo yoze kanalinungu ku Shimbi ni lunga lienyi shimbu achili ni mwono. Alioze, nyi lunga mafwa kachi matusuka ku Shimbi jize jamunungine ni lunga.

³ Chenacho, nyi pwo maya ulo weka shimbu lunga lienyi achili ni mwono, mamuvuluka ngwo, chitanji. Alioze, nyi lunga lienyi mafwa, kachi pwo matusuka ku Shimbi jize jamunungine ni lunga lienyi. Ha chino, keechi kamuvuluka ngwo, chitanji, chibwe maya ulo weka.

⁴ Chimuwika nawa, ni yenu akwetu. Hakutwala ku Shimbi, nuli ngwe atu waze haanafu, mumu hinunalinungu ni mujimba wa Kristu. Haliabwila hinwabwa atu ja mutu weka, yoze Zambi ahindwishile ku kufwa, hanga tukeme mihuko yinawaha ku meso ja Zambi.

⁵ Mumu muze twendele nikulita ni ndako yibi ya uutu, usolo ubi uze Shimbi javundwile mu mijimba yetu, watutwalile ndoo ku kufwa.

⁶ Alioze haliabwila, hitunatusuka ku chiyulo cha Shimbi, mumu hitunafu ku Chuma chize twakwachikile. Kashika tunahase kulingila Zambi nikulita ni ndako yaha, mu chiyulo cha Mwiku wa Linanga, hi nikulita ni ndako yikulu ko mu chiyulo cha Shimbi jize hijinasonewa.

Shimbi ni shili

⁷ Mba kuchi mutwamba? Shimbi yili shili, nyi? Ka lume! Alioze Shimbi hijangunyingikisa shili. Mumu te Chanyingikine chipululu shina Shimbi jambile ngwo: “Kanda uvwila Chuma cha mwenyembo we chipululu.”

⁸ Shili yiiwana unjililo ku Shimbi, mba yiilinga muli yami kuzo yeka ni yeka. Mumu, nyi Shimbi jakuhu, kachi shili yili ngwe Chuma cha kufwa.

⁹ Muze te Shimbi kujishiko, nabwile ni mwono. Alioze muze Shimbi hijeza, shili yiihuzuluka,

¹⁰ mba yingufwa. Shimbi jize jinatambe kuhana mwono kuli atu, hijinangushihi.

¹¹ Mumu shili yawanyine unjililo ku Shimbi, yangwongele, yangushihile ni Shimbi.

¹² Chenacho, je Shimbi jili ja kulinanga, ni chiyulo cha Shimbi chili cha kulinanga, ni cha ululi, ni chibema.

¹³ Chinalumbunuka ngwo, Chuma chize chibema che changushihile, nyi? Ka lume! Ye shili yangushihile hanga yisoloke pundu chize yibwa. Yachilingile ni chize chibema ha kungushiha. Chenacho, mumu ha Shimbi, shili yiisoloka lume yibi kuhiana.

Shili yakuyula mutu

¹⁴ Tunanyingika ngwetu, Shimbi jili ja Mwiku wa Linanga. Alioze yami nguli mulelu, hanangulanjisa ngwe ndungo ya shili.

¹⁵ Yuma yize nakulinga, nakuyilinga ni kuyambashana. Mumu yize ngunazange kulinga, Chishi kuyilinga. Yize Chazangile kulinga, yenayo nakulinga.

¹⁶ Muze nakulinga yize Chazangile kulinga, chinalweze ngwe ngunatayiza ngwami, Shimbi jinabeme.

¹⁷ Kafwa ngwe, hi yami ko nakuyilinga, alioze shili yize yatwama muli yami.

¹⁸ Ngunanyingika ngwami, yibema kuyishimo muli yami—kafwa ngwe mu uutu wami. Mumu chibwe ngunazange kulinga yibema, hindu chahashile kuyilinga.

¹⁹ Chishi kulinga yibema yize nakuzanga, alioze nakulinga yibi yize Chishi kuzanga.

²⁰ Nyi nakulinga yize Chishi kuzanga, hi yami ko nakuyilinga, alioze shili yize yatwama muli yami.

²¹ Chenacho, ngunawane ndako yino ngwami, muze nakuzanga kulinga yibema, Chishi kuhasa shina kulinga yibi.

²² Muli yami mwene nakuwahilila mu Shimbi ja Zambi.

²³ Alioze nakumona Shimbi yikwo mu mujimba wami Shimbi yize yakulitachika ni Shimbi yize ngunatayiza mu manyonga jami. Shimbi yize yinangupwisa funge ku shili yize yatwama mu mujimba wami.

²⁴ Lwangu mama, yami mukwa kulungajala! Iya mangupulula ku mujimba uno wa kufwa?

²⁵ Ngunasakwila Zambi, muchihasa kubwa mu jina lia Yesu Kristu, Mwene wetu! Chenacho, ngunahase kulingila Shimbi ja Zambi ni manyonga jami alioze mujimba wami wa uutu wakulingila Shimbi ya shili.