A-ROMA 6 - Mukanda Wa Zambi 1970

Tunafu ku shili, alioze tuli ni mwono ha kulinunga ni Kristu

¹ Kuchi kevwe mutwamba? Ngwetu, chatutamba kunyongonona mu shili hanga utu wa Zambi ukalumbame, nyi?

² Ka lume! Yetu hitunafu kulu hakutwala ku shili. Ngwe kuchi mutuhasa kutwama mo nawa?

³ Kunwanyingikine ngwenu, muze atupapachishile ha kulinunga ni Yesu Kristu, atupapachishile hanga tufwe hamwe nenyi, nyi?

⁴ Upapachiso unalumbununa ngwo, hitunafu hamwe ni Kristu, hanatufundu hamwe nenyi, hanga ngwe chize Tata Zambi, ni ndundo jenyi ja uhenya, wahindwishile Kristu ku kufwa, Chenacho nawa mutuhasa kwenda ni mwono Waha.

⁵ Mumu, nyi hitunalinungu ni Kristu ha kufwa ngwe chize afwile iye, kachi mutulinunga nenyi nawa muze makatuhindwisa ngwe chize amuhindwishile.

⁶ Tunanyingika ngwetu, Zambi hanashihi uutu wetu Ukulu hamwe ni Kristu ha kulusu, hanga uutu wetu ukafwe lume, ni hanga kutuchikabwa nawa ndungo ja shili.

⁷ Mumu mutu yoze hanafu kulu hanatusuka ku undungo wa shili.

⁸ Nyi hitunafu hamwe ni Kristu, tunafuliela ngwetu, mutukabwa nawa ni mwono hamwe nenyi.

⁹ Mumu tunanyingika ngwetu, Zambi hanahindwisa Kristu ku kufwa. Kechi kafwa nawa—kufwa kuchishi kumuyula nawa.

¹⁰ Ha kufwa hanafu kamuwika, kechi kafwa nawa. Shili hiyinafu liakulu hamwe nenyi. Haliabwila kali ni mwono uze unachichimieka Zambi.

¹¹ Ni yenu nawa chizechene, chatamba kulinyonga ngwenu, nuli afu hakutwala ku shili, alioze nuli a mwono hakutwala kuli Zambi ha kulinunga ni Yesu Kristu.

¹² Shili kuyatambile kuyula nawa mijimba yenu, yize muyikafwa, ha kunukoka ku kwononokena usolo ubi.

¹³ Kanda nukunjika yihanda yenu ya mijimba ku shili, ha kulinga yibi. Alioze likunjikenu yenwene kuli Zambi, ngwe waze haanahinduka ku kufwa, haanatambula mwono. Likunjikenu a muundu kuli Zambi ha kulinga ululi.

¹⁴ Mumu shili kuyatambile kunuyula, mumu kunushi mu chiyulo cha Shimbi, alioze mu chiyulo cha utu wa Zambi.

Ndungo ja ululi

¹⁵ Kuchi kevwe? Tuvulumune mumu kutushi mu chiyulo cha Shimbi, alioze mu chiyulo cha utu wa Zambi, nyi? Ka lume!

¹⁶ Nunanyingika kanawa ngwenu, nyi nwakulikunjika kuli umwe ni kumwononokena, hinwabwa ndungo ja mwata yoze nwakononokena—hanji ndungo ja shili hanji ndungo ja ululi. Nyi nuli ndungo ja shili, munukafwa. Alioze, nyi nwakononokena, Zambi manupwisa akwa ululi.

¹⁷ Alioze tusakwilenu Zambi! Mumu hatangu nwabwile ndungo ja shili, alioze haliabwila nwakononokena ni mbunge jeswe longeso lize anulongesele.

¹⁸ Zambi hananutusula ku shili, hinunalumuka ndungo ja ululi.

¹⁹ Ngunahanjika pundu nikulita ni ndako ya uutu, mumu ha ulelu wenu. Hatangu, nwalikunjikile a muundu ngwe ndungo ja luchisa ni ungulungulu ha kubwa yitanganyanyi. Chizechene haliabwila, likunjikenu a muundu ngwe ndungo ja ululi ha kubwa akwa kulinanga.

²⁰ Muze nwabwile ndungo ja shili, nwatusukile ku ululi.

²¹ Mba mihuko yika nwabwile nayo ha kulinga yuma yize haliabwila nunayivwila sonyi? Songo lia yuma yize, kufwa.

²² Alioze Zambi hananutusula ku shili, hinwabwa ndungo jenyi. Ha chino, hinwalikunjika a muundu kuli Zambi, mba ku songo munukatambula mwono wa miaka yeswe.

²³ Mumu fweto yize akuhana shili yili kufwa. Alioze chawana chize akuhana Zambi mu utu wenyi, mwono wa miaka yeswe ha kulinunga ni Yesu Kristu, Mwene wetu.