A-ROMA 5 - Mukanda Wa Zambi 1970

Uwanyino ni Zambi

¹ Chenacho Zambi hanatupwisa akwa ululi mumu ha ufulielo. Kashika hitunawane ni Zambi mumu hali Mwene wetu Yesu Kristu.

² Mumu ha ufulielo wetu, Yesu hanatunehena utu wa Zambi, utu uze tuli nawo haliabwila. Twakuwahilila mumu twakusa mbunge ha kubwa ni Chihanda mu uhenya wa Zambi.

³ Nawa twakuwahilila, chibwe mu lamba, mumu tunanyingika ngwetu, lamba kuliakuneha kunyongonona.

⁴ Kunyongonona mu lamba kuchakutakamisa, kutakama kuchakukolesa kusa mbunge ku yuma yize muyizaho.

⁵ Kusa mbunge chino kuchishi kutukolesa sonyi, mumu Zambi hanazukwila zango lienyi mu mbunge jetu ni tachi ja Mwiku wa Linanga, uze atuhele.

⁶ Mumu, nikulita ni tangwa lize atongwele Zambi, Kristu yatufwila chibwe te kutushi tachi, chibwe tuchili yitanganyanyi.

⁷ Chikalu umwe kutayiza kufwila mukwa ululi. Tangwa likwo umwe mahamuka kutayiza kufwila mutu mubema.

⁸ Alioze Zambi hanatusolwela zango lienyi linji, mumu Kristu yatufwila muze te tuchili akwa shili.

⁹ Mumu ha kufwa cha Kristu, haliabwila Zambi hanatupwisa akwa ululi. Nyi Chenacho, shinoho chikolo Kristu makatulamwina ku utenu wa Zambi.

¹⁰ Hatangu twabwile akwa kole ja Zambi, alioze kufwa cha Mwanenyi hichinatuwanyisa ni Zambi. Shinoho chikolo haliabwila, nyi hitwawana ni Zambi, mwono wa Mwanenyi muutulamwina.

¹¹ Chikwo nawa, tunawahilila ha kuliendela ni Zambi mumu Mwene wetu Yesu Kristu hatuwanyisa nenyi.

Samutu ni Kristu

¹² Chili ngwe chino: shili hiyanjila hashi mumu ha kuvulumuna cha mutu umuwika, Samutu. Mba shili hiyaneha kufwa. Chenacho atu eswe akufwa, mumu eswe haanavulumuna.

¹³ Muze te Zambi kanda achihana Shimbi kuli Mose, hashi te shili yatwama ho. Alioze Zambi kalwile ko shili yize, mumu te kanda achihana Shimbi.

¹⁴ Hindu chize ku tangwa lia Samutu ndoo ku tangwa lia Mose, atu te kaakufwafwa, chibwe kaavulumwine ngwe chize avulumwine Samutu, yoze walumbwile Shimbi ja Zambi. Samutu kali chizulie cha Kristu yoze wamukawile.

¹⁵ Alioze waze aali kaanalise, mumu chawana chize Zambi atuhele mu utu wenyi, hi ngwe mulonga wa Samutu ko. Chamwenemwene atu anji afwile ha mulonga wa mutu umuwika. Alioze utu wa Zambi unahiana kulumbama cha ubi uze. Chenacho nawa chawana chenyi, chize ahanyine kuli atu anji, chinahiana mumu ha utu wa mutu umuwika, Yesu Kristu.

¹⁶ Chawana cha Zambi ni mulonga wa mutu yoze umuwika Samutu, yinalise nawa. Mumu Zambi hanahisa atu ha mulonga wa mutu yoze umuwika. Alioze, mu utu wenyi, yaapwisa akwa ululi ngwe chawana, chibwe milonga yo yokele naye.

¹⁷ Chamwenemwene kufwa chayulile mumu hali mutu yoze umuwika, Samutu, ni mumu ha mulonga wenyi. Alioze yize twakutambula kuli mutu yono umuwika, Yesu Kristu, yinahiana kwoka. Eswe waze akutambula utu wa kulumbama wa Zambi ni ululi wenyi chawana, maakayula mu mwono ni tachi ja Kristu.

¹⁸ Kashika, ngwe chize Zambi hanahisa atu eswe ha mulonga wa mutu umuwika, Samutu, Chenacho nawa, chitanga chimuwika cha ululi cha Kristu chinatusula atu eswe ni kwaha mwono.

¹⁹ Ni ngwe ku uhulia wa mutu umuwika, Samutu, anji haanabu yivulumunyi, Chenacho nawa, ku kwononoka cha mutu umuwika, Kristu, Zambi kumakaapwisa atu anji akwa ululi.

²⁰ Atu yaavulumuna kuhiana muze atambwile Shimbi ja Mose. Alioze muze milonga hiyoka, Zambi yaalweza utu wenyi Wahiana.

²¹ Hatangu shili yayulile atu, Kashika atu afwile. Haliabwila, utu wa Zambi wakutuyula ni kutupwisa akwa ululi. Kashika tuli ni mwono wa miaka yeswe ha kulinunga ni Yesu Kristu, Mwene wetu.