A-ROMA 4 - Mukanda Wa Zambi 1970

Chilweza cha Abrahama

¹ Mba kuchi mutwamba kevwe hali Abrahama, kashakulu ketu? Chuma chika azukile?

² Nyi Zambi wapwishile Abrahama mukwa ululi mumu ha yitanga yize alingile, kachi te Abrahama mahasa kulisamba. Alioze ku meso ja Zambi kahashile kulisamba.

³ Mumu Mukanda wa Zambi unambe ngwo: “Abrahama yafuliela Zambi, mba Zambi yamwalula mukwa ululi mumu ha ufulielo wenyi.”

⁴ Mutu yoze wakulinga milimo kakutambula fweto. Keeshi kwalula fweto yize ngwe chawana, alioze kaakuyalula ngwe fweto yize hatambula mumu ha milimo yenyi.

⁵ Alioze yoze keshi kulinga milimo, hindu kakufuliela Zambi yoze wakupwisa akwa shili kubwa akwa ululi, mwenawo Zambi kakumwalula mukwa ululi mumu ha ufulielo wenyi.

⁶ Chenacho David anahanjika ha uwahililo wa mutu yoze Zambi akupwisa mukwa ululi, hi kwalula ko yitanga yenyi. Ngwenyi:

⁷ “Kawaha waze Zambi hanaakonekena milonga yo waze hanaajimuna shili yo!

⁸ Kawaha mutu yoze Mwene Zambi kechi kumwalwila milonga yenyi!”

⁹ Uwahililo uno wa ngalami wika, nyi? Hi wa yilima nawa ko, nyi? Hitwamba kulu ngwetu: “Abrahama yafuliela Zambi, mba Zambi yamwalula mukwa ululi mumu ha ufulielo wenyi.”

¹⁰ Tangwa lika awalwile? Muze te achili chilima, nyi? Hanji muze te hamupwisa kulu ngalami? Uno wabwile muze te achili chilima.

¹¹ Zambi yapwisa Abrahama ngalami kasula ha kulweza ngwo, hanamwalula mukwa ululi mumu ha ufulielo wenyi muze te kanda achimupwisa ngalami. Ha chino, Abrahama kali tato ya eswe waze akufuliela, waze Zambi akwalula akwa ululi, chibwe yilima.

¹² Kali nawa tato ya ngalami, hi mumu ha Ungalami wo wika ko, alioze mumu kaakufuliela ngwe chize afulielele tata yetu Abrahama, muze te achili chilima.

Chilakenyo chinamanunuka ku ufulielo

¹³ Zambi hanalakenya Abrahama ni waze maasemuka kuli iye ngwenyi, hashi heswe muhakapwa niho. Chilakenyo chino kamulakenyene cho mumu wononokenene Shimbi, alioze mumu Zambi yamwalula mukwa ululi mumu ha ufulielo wenyi.

¹⁴ Mumu, nyi chize Zambi alakenyene chili cha waze akwononokena Shimbi, kachi ufulielo wa mutu unabu wamokomoko, ni chilakenyo cha Zambi chinabu chamokomoko.

¹⁵ Shimbi kujakukoka utenu wa Zambi. Alioze kuze kukushi Shimbi, kukushi nawa kulumbuka cha Shimbi.

¹⁶ Kashika Zambi hanahane chilakenyo ha chikuma cha ufulielo wa atu, hanga chikabwe chawana chenyi kuli eswe waze maakasemuka kuli Abrahama. Hi cha waze akwononokena Shimbi wika ko, alioze nawa cha waze akufuliela ngwe chize afulielele Abrahama. Abrahama kali tata ya yetu eswe,

¹⁷ ngwe hichinasonewa mu Mukanda wa Zambi ngwo: “Hingunakupwisa tato ya mavungu anji.” Abrahama kali tata yetu ku meso ja Zambi, Zambi yoze wakuhindwisa afu, yoze wakupwisa chize kuchabwile ko hanga chikabwe ko. Mwe Zambi awo afulielele Abrahama.

¹⁸ Yafuliela, yasa mbunge ku chilakenyo cha Zambi. Chibwe nikulita ni ushinakaji wenyi kahashile kusa ko mbunge, hindu yayisa ko. Chenacho, hanabu “tato ya mavungu anji” nikulita ni chize amwambile Zambi ngwenyi: “Che muchikabwa kwoka cha Chikota che.”

¹⁹ Abrahama te habwa ngwe ni kulakaji lia miaka, alioze kahongele ko mu ufulielo wenyi muze anyongene ushinakaji wenyi, ngwe hafwa kulu, ni muze anyongene umba wa pwo lienyi, Sara.

²⁰ Abrahama katokesele ko ufulielo wenyi, ni kayambashanyine ko ha chilakenyo cha Zambi. Alioze ufulielo wenyi yiumutakamisa, neye yahalisa Zambi.

²¹ Yanyingika pundu ngwenyi, Zambi mahasa kumanununa chilakenyo chenyi.

²² Kashika “Zambi yalula Abrahama mukwa ululi” mumu ha ufulielo wenyi.

²³ Alioze maliji wano ngwo: “Zambi yamwalula mukwa ululi,” kaasonewene mumu hali iye wika.

²⁴ Yaasonewa nawa mumu hali yetu, yetu waze Zambi malula akwa ululi, waze twakufuliela Zambi yoze wahindwishile Yesu Mwene wetu ku kufwa.

²⁵ Zambi yamukunjika ku kufwa mumu ha shili yetu, yamuhindwisa ku kufwa ha kutupwisa akwa ululi.