A-ROMA 3 - Mukanda Wa Zambi 1970

¹ Mba kuyuka chika ha kubwa Kayuda? Hanji ulemu uka ha kubwa ngalami?

² Chili kuyuka chahiana ha yuma yeswe. Chikuma chitangu, Zambi hanakunjika maliji jenyi kuli Ayuda.

³ Kuchi kwamba kevwe, nyi amwe hakachi ko kaabwile ko akwa kushishika, Zambi neye kechi kubwa mukwa kushishika, nyi?

⁴ Ka lume! Chatamba Zambi kubwa wamwenemwene, chibwe mutu mweswe akabwe mukwa mahuza. Ngwe hichinasonewa mu Mukanda wa Zambi ngwo: “Makakusambisa nikulita ni maliji je. Muukasamba muze makakubatwila.”

⁵ Alioze, nyi yibi yize twakulinga yinasolola ululi wa Zambi, kuchi mutwamba, Zambi kali chihenge muze akutumwesa lamba, nyi? (Maliji wano ngunahanjika ngwe mutu.)

⁶ Ka lume! Nyi Zambi hi mukwa ululi ko, ngwe kuchi mahasa kubatwila akwa hashi?

⁷ Alioze, nyi mahuza jami kaakusolola pundu umwenemwene wa Zambi ni kufumanyisa uhenya wenyi, kuchi mba ananguhisa ngwe nguli Chivulumunyi?

⁸ Kuchi kevwe kutwahashile kwamba ngwetu: “Tulingenu yibi hanga yibema yikeze”? Chamwenemwene amwe atu kaakwamba ngwo, yami Paulu ngunahanjika yuma ngwe yize. Kaakuchamba ha kungulelesa. Atu wano kumaakahisa ngwe chinalite.

Mukwa ululi niumwe

⁹ Mba kuchi? Yetu Ayuda tunahiana atu akwo, nyi? Ka lume! Hingunambe kulu ngwami, shili jakuyula atu eswe, Ayuda ni waze hi Ayuda ko.

¹⁰ Ngwe hichinasonewa mu Mukanda wa Zambi ngwo: “Mukwa ululi niumwe, chibwe umuwika ka.

¹¹ Wakuhi niumwe wanyingika Zambi, wakuhi niumwe Wakufupa Zambi.

¹² Eswe haanahambuluka mu jila ya Zambi, eswe haanabu amokomoko. Wakuhi niumwe wakulinga yibema, chibwe umuwika ka.

¹³ Miliwu yo yili ngwe fuka liawashi, malimi jo haanazala ni kwonga, maliji a ku mivumbo yo kaali ngwe ulembe wa chihili.

¹⁴ Makanwa jo kaanazala ni mashingo asasu.

¹⁵ Kaakuzomboka nikawashi ha kushiha atu.

¹⁶ Kaakuhichika kwonona ni lamba kweswe akuya.

¹⁷ Kaanyingikine jila ya uhwimino.

¹⁸ Keeshi kuvwila Zambi woma.”

¹⁹ Tunanyingika ngwetu, yize yeswe Shimbi jinambe, yinahanjikila waze ali mu chiyulo cha Shimbi, hanga usambiso kuuchikatuhuka ku makanwa ja atu, hanga akwa hashi eswe akahie ku meso ja Zambi.

²⁰ Mumu Zambi keshi kupwisa mutu niumwe mukwa ululi ha kumanununa Shimbi. Shimbi jakunyingikisa lume ngwo, mutu hanavulumuna.

Chize Zambi akupwisa atu akwa ululi

²¹ Alioze haliabwila Zambi hasolola chize akupwisa atu akwa ululi—ni chize hi cha ku Shimbi ko. Shimbi ni akwa munanyi a Zambi haanashindakenya kulu ha chikuma chino.

²² Zambi kakupwisa atu akwa ululi muze akufuliela Yesu Kristu. Chino kakuchilinga kuli eswe waze akufuliela Yesu, mumu kulituchika chakuhi mukachi ka atu:

²³ eswe haanavulumuna, eswe kaanahono uhenya wa Zambi.

²⁴ Alioze Zambi, ku utu wenyi, kakupwisa eswe akwa ululi. Kakuchilinga chawana ku tachi ja Yesu Kristu, yoze wakwatusula ku ubinji wa shili.

²⁵ Zambi hanakunjika Yesu Kristu hanga, ku manyinga jenyi, mahasa kukonekena atu milonga yo, muze maafuliela Yesu Kristu. Zambi hanakunjika Kristu ha kulweza chize akupwisa atu akwa ululi. Hatangu, Zambi yalihumikiza no, kamwesene ko lamba ha milonga yo.

²⁶ Alioze, haliabwila Zambi kakukaula milonga ha kulweza chize akupwisa atu akwa ululi. Chenacho kanashindakenya ngwenyi, iye mwene kali mukwa ululi, ni nawa, kakupwisa mukwa ululi yoze wakufuliela Yesu Kristu.

²⁷ Kuchi? Atu maahasa kulisamba, nyi? Ka, keeshi kuhasa. Kuchi kaahashile kulisamba? Mumu ululi hi chikuma cha yitanga ko, alioze chikuma cha ufulielo.

²⁸ Mumu tunashindakenya ngwetu, Zambi kakupwisa atu akwa ululi ha ufulielo wo, hi ha kwononokena Shimbi ko.

²⁹ Zambi kali Zambi ya Ayuda wika, nyi? Hi Zambi ya mavungu akwo nawa ko, nyi? Chamwenemwene kali Zambi ya mavungu akwo nawa,

³⁰ mumu Zambi kali umuwika. Mapwisa Ayuda akwa ululi ku ufulielo wo. Chimuwika nawa, mapwisa mavungu akwo akwa ululi ku ufulielo wo.

³¹ Chino chinalumbunuka ngwo, ku ufulielo twakulelesa Shimbi, nyi? Ka lume! Shinoho twakujilemesa.