A-ROMA 2 - Mukanda Wa Zambi 1970

Ubatwilo wa Zambi

¹ Yena mukwetu, kumana wakuhisa atu akwo, nyi? Nyi chocho, kuuchi kusamba, chibwe uli iya. Mumu, muze wakuhisa akwenu, hindu yena wakulinga ngwe ayo, wakulihisa yena mwene.

² Tunanyingika ngwetu, Zambi kakubatwila ni umwenemwene muze akuhisa waze akulinga yuma ngwe yize.

³ Alioze yena wakuhisa akwenu ku yuma yize wakulinga yena mwene. Unanyongo ngwe Zambi kechi kukuhisa, nyi?

⁴ Hanji unalelesa kulumbama cha utu wa Zambi, ni uhumikizo ni uhomboloji wenyi, nyi? Kuwanyingikine ngwe, utu wa Zambi unatambe kukutwala ku kwalumuka cha mbunge ye, nyi?

⁵ Alioze mbunge yikalu ukwete. Kuusolo kwalumuka. Kashika wakulitulikila lamba liahiana ha tangwa lize Zambi makasolola utenu wenyi wa ululi,

⁶ muze makahana kuli mutu ni mutu nikulita ni yize alingile,

⁷ Zambi makahana mwono wa miaka yeswe kuli atu waze akunyongonona ha kulinga yibema, waze akufupa uhenya ni ulemu uze wakukatuka kuli Zambi, ni mwono uze kuushi kuhwa.

⁸ Alioze akwo akwa pami, waze akulituna umwenemwene nikukaula utanganyanyi, Zambi makaazukwila utenu wenyi ni ufwatulo wenyi.

⁹ Lamba ni kubinda muyikabwa hali eswe waze akulinga yibi, hatangu hali Ayuda, ni hali mavungu akwo nawa.

¹⁰ Alioze Zambi makahana uhenya, ni ulemu, ni uhwimino kuli eswe waze akulinga yibema, hatangu kuli Ayuda, ni kuli mavungu akwo nawa.

¹¹ Mumu Zambi keshi katonde.

¹² Eswe waze haanavulumuna, te kaanyingikine Shimbi ja Mose, kaakutoka, keeshi Shimbi jize. Ni waze haanavulumuna nikunyingika Shimbi, kumakaahisa nikulita ni Shimbi jize.

¹³ Mumu Zambi keshi kupwisa atu akwa ululi ha kwivwa Shimbi wika, alioze ha kulinga chize Shimbi jinambe.

¹⁴ Waze hi Ayuda ko keeshi Shimbi ja Mose. Alioze muze akulinga ayo ene chize Shimbi ja Mose jinambe, kaakulipwisa akwa Shimbi ayo ene, chibwe keeshi Shimbi ja Mose.

¹⁵ Yitanga yo yakulweza ngwo, chize Shimbi jinambe hichinasonewa mu mbunge jo. Mbunge jo nawa jakushindakenya chikuma chino, mumu manyonga jo yisuho yikwo kaakwahisa, yisuho yikwo kaakwasambisa.

¹⁶ Chenacho muchikabwa, nikulita ni Sango Jibema jize nakwambujola, ha tangwa lize Zambi makabatula yuma ya kuhengeka ya atu. Zambi makayibatula kuli Yesu Kristu.

Ayuda ni Shimbi ja Mose

¹⁷ Alioze yena wakulivuluka ngwe, uli Kayuda. Wakushachila ha Shimbi. Wakulisamba hali Zambi ye.

¹⁸ Yena Unanyingika chize Zambi akuzanga yena ulinge. Hiunalilongesa ku Shimbi kutongola chize chinalite.

¹⁹ Wakulishindakenya ngwe, uli kasongo ka tupuputa, pangu lia waze ali mu milima,

²⁰ chifumbe cha yihepuke, longeshi ya twanuke, Mumu Unanyingika pundu ngwe, mu Shimbi uli ni chinyingi cheswe ni umwenemwene weswe.

²¹ Yena wakulongesa mutu mukwo, kuchi mba kuushi kulilongesa yena mwene? Yena wakwambujola ngwe: “Kanda wiya.” Kuchi mba wakwiya?

²² Yena wakwamba ngwe: “Kanda Ulinga utanji.” Mba kuchi yena wakulinga utanji? Yena wakuvutwokela mahamba. Kuchi mba wakwiya yuma ya mu mazuwo ja mahamba?

²³ Yena wakulisamba ha Shimbi. Alioze wakulumbula Shimbi ja Zambi ni kumulelesa, nyi?

²⁴ Ngwe hichinasonewa mu Mukanda wa Zambi ngwo: “Mavungu akwo kaakutuka jina lia Zambi mumu hali yenu Ayuda.”

²⁵ Nyi wakwononokena Shimbi, kachi Ungalami we muubwa ulemu. Alioze, nyi wakulumbula Shimbi, chili ngwe uli chilima.

²⁶ Nyi chilima mafunga Shimbi, kumana Zambi kechi kumutambula ngwe ngalami, nyi?

²⁷ Chilima, yoze wakwononokena Shimbi ja Mose, makahisa yena Kayuda (chibwe uli ngalami) yoze wakulumbula Shimbi jize hijinasonewa mu mukanda.

²⁸ Mumu Kayuda wamwenemwene hi yoze ko wakumoneka ku meso ja atu, hi yoze ko hanamupwisa ngalami mu mujimba wenyi.

²⁹ Alioze Kayuda wamwenemwene yoze wa mu mbunge, kafwa ngwe yoze Zambi hanamupwisa ngalami mu mbunge yenyi. Mumu Ungalami uze hi wa ku Shimbi jize hijinasonewa mu mukanda ko, alioze uze wa Mwiku wa Zambi. Mutu yoze, Zambi makamuchichimieka, hi atu ko.