A-ROMA 16 - Mukanda Wa Zambi 1970

Kulimeneka

¹ Ngunanukunjika ndumbwetu wa pwo. Febe, kavumbi mu Chikungulwila cha Senkria.

² Mutambulenu kanawa mu jina lia Mwene Yesu Kristu, ngwe chize akwa Kristu chaatamba kulinga. Mukwasenu ku yuma yeswe yize mahona, mumu iye mwene hakwasa atu anji, ni yami nawa.

³ Menekenu Prisila ni Akwila, akwa milimo ni akwetu ja Yesu Kristu.

⁴ Haanakunjika mwono wo, chibwe ndoo ku kufwa, mumu hali yami. Ngunaasakwila, alioze hi yami wika ko. Yikungulwila yeswe, yize hi Ayuda ko, no nawa kaanaasakwilila.

⁵ Menekenu nawa Chikungulwila chize chinakunguluka mu zuwo lio. Menekenu sepa liami, Epenetu, yoze wabwile mutu mutangu kufuliela Kristu mu chifuchi cha Asia.

⁶ Menekenu Maria, yoze wahondanganyine chinji ha kunukwasa.

⁷ Menekenu Androniku ni Junia, enoo usoko wami Ayuda. Nabwile hamwe no mu zuwo lia lamba. Kaali akwa lufuma mukachi ka tunganda twa Yesu. Kaali akwa Kristu akulu, anguhiana yami.

⁸ Menekenu Ampliatu, mukwetu mu kuliendela ni Mwene Yesu.

⁹ Menekenu Urbanu, mukwetu mu milimo ya Kristu, ni sepa liami Stakise.

¹⁰ Menekenu Apeleshi, yoze hanasolola kushishika chenyi kuli Kristu. Menekenu akwa zuwo lia Aristobulu.

¹¹ Menekenu Herodione, usoko wami. Menekenu akwa zuwo lia Narsisu, waze akuliendela ni Mwene Yesu.

¹² Menekenu Trefene ni Trifosa, waze ahondanganyine mu milimo ya Mwene Yesu, ni sepa liami Perside, yoze wakilikichile chinji nawa mu milimo ya Mwene.

¹³ Menekenu Rufu, mukwa Kristu wa lufuma mu milimo ya Mwene, ni naye, yoze wakungutambula ngwe nguli mwanenyi.

¹⁴ Menekenu Asinkritu, ni Flegonte, ni Hermese, ni Patrobase, ni Hermase, ni akwetu akwa Kristu akwo waze ali hamwe no.

¹⁵ Menekenu Filologu, ni Julia, ni Nereu, ni ndumbwenyi Olimpia, ni akwa Kristu eswe waze ali hamwe no.

¹⁶ Limenekenu ni mbeju ya kulinanga. Yikungulwila yeswe ya Kristu kaananumeneka.

Kushika

¹⁷ Akwetu, ngunaliumbu kuli yenu, keyelenu waze akuhandunyona atu, waze akupiangula akwa kufuliela, waze akwehuka longeso lize nwatambwile. Lihandununenu no.

¹⁸ Mumu atu ngwe waze keeshi kulingila Kristu, Mwene wetu, alioze jimo lio ene. Ku maliji jo a kuhuhumiona ni a ulembekese kaakwonga atu alelu.

¹⁹ Atu eswe heevwa lufuma wa kwononoka chenu kuli Mwene Yesu. Kashika nguna Wahilila. Alioze ngunazange nubwe ni mana hakutwala ku yibema, ni akwa kusamba hakutwala ku yibi.

²⁰ Zambi, yoze wakuhana uhwimino, makafwenya Sakwonga nikawashi kushi lia molu jenu. Mwene wetu Yesu Kristu anulweze utu.

²¹ Timoteu, mukwa milimo ni mukwetu, kananumeneka, ni usoko wami Lusiu, ni Jasone, ni Sosipatere nawa.

²² Yami, Tersiu, mukwa kusoneka mukanda uno, ngunanumeneka mu jina lia Mwene Yesu.

²³ Gayu, yoze wakunguzumbula, kuli yoze kwakukunguluka Chikungulwila cheswe, kananumeneka. Erastu, mukwa ujiji wa mu limbo, ni mukwetu Kwartu, kaananumeneka. [

²⁴ Mwene wetu Yesu Kristu anulweze utu yenu eswe. Chibwe kama Chenacho.]

Uhaliso wakusula

²⁵ Tuhalisenu Zambi! Kali ni ndundo ja kunutakamisa mu ufulielo nikulita ni Sango Jibema ja Yesu Kristu jize nakwambujola, nawa nikulita ni Usolwelo wa chijimbikilo chize twatambwile. Chijimbikilo chino chahengamine hasuku ku miaka ya kunyima.

²⁶ Alioze haliabwila hichinasoloka mu pangu mu mikanda ya akwa munanyi a Zambi. Zambi wa miaka yeswe hanatumu atu ku mavungu eswe, ha kunyingikisa chijimbikilo chino, hanga afuliele ni ononoke.

²⁷ Halisenu Zambi, mukwa mana wika, mu jina lia Yesu Kristu, ku miaka yeswe ni miaka yeswe. Chibwe kama Chenacho.