A-ROMA 15 - Mukanda Wa Zambi 1970

¹ Yetu, waze tuli ni ufulielo wamwenemwene, chatutamba kukwasa alelu mu ufulielo wo. Kuchatambile kuliwahisa yetwene.

² Alioze mutu mweswe chatamba kuwahisa mukwo ni kumulinga kanawa, ha kumutakamisa mu ufulielo.

³ Mumu Kristu kaliwahishile ko iye mwene, alioze, ngwe hichinasonewa mu Mukanda wa Zambi: “Luchoko yoze te akukuchoka yena, haliabwila hi yami anamuchoko.”

⁴ Mumu yeswe yize yasonewene mu Mukanda wa Zambi yasonewene ha kutufumba, hanga tukayise mbunge, ni hanga tukabwe ni uhumikizo ni kutakama ha kushimbwila yuma yize Zambi hanalakenya.

⁵ Zambi yoze wakuhana uhumikizo, yoze wakutakamisa, anwehe tachi ja kubwa ni manyonga amuwika hakachi kenu ha kwimbulula Kristu Yesu,

⁶ hanga yenu eswe hamuwika, ni liji limuwika, nukahalise Zambi, Tato ya Mwene wetu Yesu Kristu.

Sango Jibema ja kulweza atu eswe

⁷ Kashika litambulenu ni akwenu ngwe chize Kristu wanutambwile, hanga atu akahalise Zambi.

⁸ Mumu ngunanwambe ngwami, Kristu yalumuka kavumbi ka Ayuda ha kulweza ngwenyi, Zambi kali mukwa kushishika ha kumanununa yilakenyo yize alakenyene tushakulu.

⁹ Nawa, yalumuka kavumbi ka Ayuda hanga waze hi Ayuda ko akahalise Zambi mumu ha keke yenyi. Ngwe hichinasonewa mu Mukanda wa Zambi ngwo: “Kashika mungukakuhalisa hakachi ka waze hi Ayuda ko. Mungukemba uhaliso wa jina lie.”

¹⁰ Hichinasonewa nawa ngwo: “Yenu, waze hi Ayuda ko, wahililenu hamwe ni atu waze atongwele Zambi!”

¹¹ Nawa ngwo: “Yenu eswe, hi Ayuda ko, fumanyisenu Mwene Zambi. Atu eswe amuhalise”!

¹² Izaya kanambe nawa ngwenyi: “Mutu makeza ku Chikota cha Jese, makakatuka ha kuyula waze hi Ayuda ko, no maakamusa mbunge.”

¹³ Zambi, yoze wakutulweza chize chatamba kumusa mbunge, anwehe uwahililo unji ni uhwimino mumu nwakumufuliela. Ha chino munukamusa mbunge kuhiana ku ndundo ja Mwiku wa Linanga.

Chikuma chize Paulu asonekenene ni hamu

¹⁴ Akwetu, ngunanyingika pundu ngwami, nuli atu abema, nuli ni yinyingi yeswe, nuli ni mana akulikanyamisa ni akwenu.

¹⁵ Alioze mu mukanda uno hinanusonekena ni hamu lieswe ha kunwiwulula hakutwala ku yikuma yeka ni yeka. Hinasoneka ngwe chino mumu ha vumbi lize anguhele Zambi

¹⁶ ha kubwa kavumbi ka Yesu Kristu kuli waze hi Ayuda ko. Ngunahakwila ha kwambujola Sango Jibema ja Zambi, hanga mavungu waze hi Ayuda ko akabwe mulambu wakubemena kuli Zambi, wakulihana kuli iye ku tachi ja Mwiku wa Linanga.

¹⁷ Ha kulinunga ni Yesu Kristu, ngunahase kuwahilila ha milimo yize nakulingila Zambi.

^18-19 Mumu chichi kahamuka kuhanjika chimwe chuma shina chize Kristu wangutakamishine ha kukwasa waze hi Ayuda ko ha kwononokena Zambi. Kristu yachilinga ku maliji ni yitanga, ni ku tachi ja yilayi ni yikomokeso, ni ku ndundo ja Mwiku wa Linanga. Chenacho, nalumbunwine mwazu Sango Jibema hakutwala kuli Kristu. Nayile sali ni sali, chize ku limbo lia Yerusaleme ndoo ku chifuchi cha Iliriku.

²⁰ Alioze nesekele kwambujola Sango Jibema shina kuze te kanda achivwa sango ja Kristu, hanga chichi katunga ha fundamentu ya mbala.

²¹ Ngwe hichinasonewa mu Mukanda wa Zambi: “Waze kandevwa sango jenyi, maakamona. Waze kanda achivwa, maakanyingika.”

Manyonga ja Paulu hakutwala ku wende wenyi ku Roma

²² Yenayo yanguvumine yisuho yinji kunuheta.

²³ Mumu hasuku nevwilile usona ha kwiza ni kunumona, mba haliabwila hinamanununa milimo yami mu yifuchi yino.

²⁴ Ngunase mbunge ha kunumona muze mungukabalika ha kuya ku Espanya. Ngunase mbunge nawa ngwami, munukangushinjikila mu jila muze hinatwama kashimbu hakachi kenu.

²⁵ Alioze haliabwila ngunayi ku Yerusaleme ha kukwasa akwa Kristu waze aliko.

²⁶ Mumu akwa Kristu ja mu chifuchi cha Masedonia ni cha Gresia haanabatula kuhana yawana kuli yiswale hakachi ka akwa Kristu ja mu Yerusaleme.

²⁷ Haanabatula ayo ene kuchilinga. Ha kulinga kanawa, chatamba kukwasa akwa Kristu ja Ayuda ni yikumba yo. Mumu Ayuda haanalianyina yiwape ya uzambi ni mavungu akwo. Kashika, mavungu waze chatamba kukwasa Ayuda nawa ni yikumba yo.

²⁸ Mba muze hinamanununa milimo yino, ni muze hinaaha mbongo jize jeswe aahele akwa Kristu, munguya ku Espanya. Mba mu jila mungukabalikila ku mahienu.

²⁹ Ngunanyingika ngwami, muze mungukanuheta, mungukeza ni yiwape yihiana ya Kristu.

³⁰ Akwetu, ngunaliumbu kuli yenu, mu jina lia Mwene wetu Yesu Kristu, ni ku zango lize Mwiku wa Linanga akuhana, Senu tachi hamwe ni yami ha kungulembela Zambi.

³¹ Lembenu hanga waze hi akwa Kristu ko ja mu Yudea kanda akangulinga chibi; nawa, hanga akwa Kristu ja mu Yerusaleme akatambule yawana yize ngunaatwalila.

³² Chenacho, nyi Zambi kanazange, mungukanuheta ni uwahililo. Nawa, mungukabwa ni uhwimino hakachi kenu.

³³ Zambi, yoze wakuhana uhwimino, abwe hamwe ni yenu eswe. Chibwe kama Chenacho.