A-ROMA 14 - Mukanda Wa Zambi 1970

Kanda uhisa mukwenu

¹ Tambulenu kanawa yoze unalele mu ufulielo, alioze kanda nulihangujola nenyi hakutwala ku kuyambashana chenyi.

² Umwe kakufuliela mahasa kulia yuma yeswe, alioze mukwo, yoze unalele mu ufulielo, kakulia lume yilimalima.

³ Yoze wakulia yakulia yeswe, kanda alelesa yoze keshi kuyilia. Yoze wakulia shina yilimalima kanda ahisa yoze wakulia yakulia yeswe, mumu Zambi hanamutambula.

⁴ Yena iya wakuhisa ngamba ya mbala? Nyi mamana nguu, hanji malimbuka, mwata wenyi mamubatwila. Alioze mamana nguu mumu Mwene Yesu kali ni ndundo ja kumutakamisa.

⁵ Umwe kakunyonga ngwenyi, tangwa limuwika lili lilemu kuhiana matangwa akwo. Alioze mukwo kakunyonga ngwenyi, matangwa eswe kaali chimuwika. Chatamba mutu ni mutu kulisela chinyingi mu mbunge yenyi mwene.

⁶ Yoze wakulemesa tangwa limuwika kuhiana matangwa akwo, kakuchilinga ha kulemesa Mwene Yesu. Yoze wakulia yuma yeswe kakuchilinga ha kulemesa Mwene Yesu, mumu kakusakwila Zambi mumu ha yakulia yize. Yoze keshi kulia yeswe, keshi kuyilia ha kulemesa Mwene Yesu, neye kakusakwila Zambi.

⁷ Mutu niumwe hakachi ketu uli ni mwono ha kulilemesa iye mwene, chibwe niumwe mafwa ha kulilemesa iye mwene. Nyi tuli ni mwono, tuli nawo ha kulemesa Mwene Yesu.

⁸ Chibwe mutufwa, mutufwa ha kulemesa Mwene. Ha chino, chibwe tuli ni mwono, chibwe mutufwa, tuli a mbala a Mwene.

⁹ Mumu Kristu hanafu, hanahinduka nawa ha kuyula afu ni waze ali ni mwono.

¹⁰ Alioze yena, kuchi wakubatwila mukwenu? Ni yena, kuchi wakulelesa mukwenu? Yetu eswe mutukamana ku meso ja Zambi hanga akatubatwile.

¹¹ Mumu hichinasonewa mu Mukanda wa Zambi ngwo: “Chamwenemwene ni we mwono wami, eswe maakafukama ku meso jami. Eswe maakatayiza ngwo: ‘Yena uli Zambi,’ Chenacho anambe Mwene Zambi.”

¹² Ha chino, mutu mweswe hakachi ketu makalumbununa milonga yenyi mwene kuli Zambi.

Kanda uvulumwisa mukwenu

¹³ Kashika, twechenu kulibwatila ni mukwetu. Shinoho tubatulenu ngwetu, kanda tulinga nichimwe chize muchitalingisa mukwetu hanji kumuvulumwisa.

¹⁴ Ngunalinungu ni Mwene Yesu. Kashika ngunanyingika pundu ngwami, Chuma nichimwe chili cha luchisa chiyo chene. Alioze, nyi umwe machinyonga kubwa cha luchisa, kuli iye muchibwa cha luchisa.

¹⁵ Nyi wakuvwisa mukwenu chinyengo ha yakulia yize wakulia, kumana kuushi kumuzanga nawa. Tala kanawa, kuchina mutu yoze Kristu hanamufwila, makatoka mumu ha yakulia ye.

¹⁶ Chize chili chibema ku meso je, kanda chalumuka chibi ku meso ja atu akwo.

¹⁷ Mumu Wanangana wa Zambi hi chikuma cha kulia ni kunwa ko, alioze cha ululi, ni uhwimino, ni uwahililo uze akuhana Mwiku wa Linanga.

¹⁸ Yoze wakulingila Kristu ngwe chino, kakubemena ku meso ja Zambi; ni atu kaakumulemesa.

¹⁹ Kashika chatutamba kulinga yuma yize yakuhana uhwimino ni yize muyihasa kututakamisa hamuwika mu ufulielo.

²⁰ Kanda wonona milimo ya Zambi ha chikuma cha yakulia. Chamwenemwene yakulia yeswe muuhasa kuyilia, alioze chili chibi nyi walia Chuma chize muchivulumwisa mukwenu.

²¹ Chili chibema kulitwamina kulia yifwo, chibwe kunwa vinyu, hanji kulinga Chuma chimwe chize muchihasa kuvulumwisa mukwenu.

²² Ufulielo uze uli nawo ha chikuma chino, bwako nawo yena mwene ku meso ja Zambi. Kawaha yoze keshi kulihisa muze mabatula yize chamutamba kulinga.

²³ Alioze, nyi mayambashana ha chikuma cha kulia, kachi Zambi makamuhisa muze machilia, mumu keshi kuchilinga ni ufulielo. Mumu cheswacho mutu malinga, nyi keshi kuchilinga ni ufulielo, mavulumuna.