A-ROMA 13 - Mukanda Wa Zambi 1970

Ononokenenu akwa kuyula

¹ Mutu mweswe chatamba kwononokena akwa kuyula, mumu chiyulo cheswe chakukatuka kuli Zambi. Kukushi mukwa kuyula niumwe shina yoze Zambi hanatayiza.

² Yoze wakulitachika ni mukwa kuyula, kakulitachika ni chiyulo cha Zambi. Ni waze akulitachika, maakalikokela uhiso ayo ene.

³ Mumu waze akulinga yibema, keeshi kuvwila akwa kuyula woma, alioze shina waze akulinga yibi, enoo akwevwila woma. Kuwazangile kuvwila mukwa kuyula woma, nyi? Linga yibema, mba makakuchichimieka.

⁴ Mumu kali kavumbi ka Zambi ha yibema ye. Alioze, nyi muulinga yibi, Chakutamba kwivwa woma, mumu kali ni chiyulo cha kumwesa lamba. Kali kavumbi ka Zambi ha kutenwokena waze akulinga yibi.

⁵ Kashika chatamba kwononokena akwa kuyula, hi ha utenu wa Zambi wika ko, alioze nawa mumu ha Shimbi ya mu mbunge.

⁶ Ha chikuma chino nawa nwakulambula lijimu, mumu akwa kuyula kaakulingila Zambi muze akumanununa milimo yo.

⁷ Hanenu kuli eswe yize yinaatela. Lambulenu lijimu kuli waze anatela lijimu, Senu vumbi waze anatela vumbi, lemesenu waze anatela ulemu.

Lizangenu

⁸ Kanda nubwa ni kongo kuli mutu niumwe, shina lume kongo lia zango chanutamba kubwa nalio: chanutamba kulizanga. Yoze wakuzanga mukwo, hamanununa Shimbi jeswe.

⁹ Shimbi jinambe ngwo: “Kanda Ulinga utanji, kanda ushiha mutu, kanda wiya, kanda uvwila chipululu.” Shimbi jino jeswe, ni jikwo nawa, jinaswila mu Shimbi yino yimuwika ngwo: “Zanga mwenyembo we ngwe chize wakulizanga yena mwene.”

¹⁰ Yoze wakuzanga mwenyembo wenyi, keshi kumulinga chibi nichimwe. Zango, che kumanununa cha Shimbi jeswe.

Kulilulika ha kwiza cha Kristu

¹¹ Lingenu chino, mumu nunanyingika ha mwaka uze tuli. Ola hiyaheta ya kulaula mu tulo. Mumu ulamwino uli hakamwihi haliabwila, kuhiana muze twaliangile kufuliela.

¹² Ufuku wasala hakepe uhwe. Tangwa hiliakundama. Kashika, tumbilenu yitanga ya milima. Twandenu mata ha kwasa no jita mu Pangu.

¹³ Chatutamba kubwa ni ndako jibema ngwe akwa pangu. Kanda tubwa ni chimbangwinya, kanda tuzengewa, kanda tulinga utanji, kanda tulinga yitanga ya sonyi, kanda tuzwela, kanda tumanangana ni ukwa.

¹⁴ Alioze zalenu ndako yaha ya Mwene Yesu Kristu. Echenu usolo wenu ubi wa mujimba, ha kuumanununa.