A-ROMA 12 - Mukanda Wa Zambi 1970

¹ Kashika, akwetu, mumu Zambi hanasolola keke yenyi kuli yetu, ngunaliumbu kuli yenu ngwami, nulihane yenwene ngwe mulambu wa mwono kuli Zambi, mulambu wa kulinanga, uze wakumubemena. Wenawo, we uwayilo wamwenemwene uze unamutela.

² Kanda nulitesa ni ndako ya hano hashi alioze tayizenu Zambi anwalumune manyonga jenu. Mba munuhasa kunyingika upale wa Zambi, yuma yibema, ni yize yakumuwahila, ni yize yinalite.

³ Mumu ha utu uze angulwezele Zambi, ngunanwambe yenu eswe ngwami, kanda nulinyonga yenwene kuhiana chize chinalite. Shinoho bwenu ni manyonga waze analite, hanga mutu mweswe hakachi kenu alieseke iye mwene nikulita ni ufulielo uze amuhele Zambi.

⁴ Mu mujimba umuwika tuli ni yihanda yinji yize yikwete milimo yeka ni yeka.

⁵ Chimuwika nawa ni yetu, chibwe tuli anji, hindu eswe hitunalinungu ni akwetu ngwe yihanda ya mujimba umuwika.

⁶ Tuli ni mana eka ni eka waze chatutamba kulinga no milimo, nikulita ni mana waze Zambi ahanyine kuli mutu ni mutu. Nyi tuli ni mana a kwambujola maliji a Zambi, chatutamba kuchilinga nikulita ni ufulielo uze tuli nawo.

⁷ Nyi tuli ni mana a uvumbiko, tuvumbikenu. Nyi tuli ni mana a kulongesa, tulongesenu.

⁸ Yoze uli ni mana akutakamisa akwo, chamutamba kuchilinga. Yoze wakuhana yikumba yenyi, ayihane ya kulumbama. Yoze wakuyula, alihane ku kuyula. Yoze wakukwasa akwa lamba, achilinge ni chiseke.

⁹ Kanda nulizanga ni ulembekese. Ehukenu yibi, lalaminyenu yibema.

¹⁰ Lizangenu ngwe ana ja tata umuwika ni mama umuwika. Lipupwisenu ha kulilweza vumbi amwe ni akwenu.

¹¹ Lingenu ni tachi, hi ni ngwaza ko. Lingilenu Mwene Zambi ni mbunge yeswe.

¹² Wahililenu mumu ha yuma yize nwakusa mbunge, lihumikizenu mu lamba, nyongononenu mu kulemba.

¹³ Kwasenu akwa Kristu waze anahono, Zumbulenu ngeji waze aneza ku mazuwo jenu.

¹⁴ Liumbenu kuli Zambi hanga awahise waze akunumwesa lamba. Mulembenu ha kwawahisa, hi kwashinga ko.

¹⁵ Wahililenu hamwe ni waze akuwahilila, lilenu hamwe ni waze akulila.

¹⁶ Livwenu ni akwenu. Kanda nulengumuka, alioze lingenu chibwe milimo yize kuyishi yilemu. Kanda nulinyonga ngwe nuli akwa mana.

¹⁷ Nyi mutu kananulingi yibi, kanda numuhilwishila nawa yibi. Alioze esekenu kulinga yibema ku meso ja atu eswe.

¹⁸ Lingenu cheswe nunahase kulinga, hanga nutwame kanawa ni atu eswe.

¹⁹ Akwetu akwa Kristu, kanda nulikalila milonga yenwene, alioze mwechelenu Zambi akale milonga iye mwene. Mumu hichinasonewa mu Mukanda wa Zambi ngwo: “ ‘Yami mungukakala milonga, yami mungukafwetesa yibi,’ Chenacho anambe Mwene Zambi.”

²⁰ Hichinasonewa nawa ngwo: “Nyi mukwa kole ye mevwa zala, mwehe yakulia. Nyi mevwa pwila, mwehe yakunwa. Mumu ha kulinga chino, wamukolesa sonyi ni kumwocha kahia.”

²¹ Kanda nutayiza yibi kunukumba, alioze kumbenu yibi ha kulinga yibema.