A-ROMA 11 - Mukanda Wa Zambi 1970

Zambi kambilile ko Aisraele

¹ Ngunahula ngwami, Zambi hanambila atu jenyi, nyi? Ngwami, ka lume! Mumu yami mwene nawa nguli Kaisraele; kashakulu kami Abrahama; vungu liami Benjamine.

² Zambi kehukile ko atu jenyi waze atongwele chize ku Ubutukilo. Nunanyingika chize ahanjikile Eliya mu Mukanda wa Zambi muze asumine Aisraele mulonga ku meso ja Zambi ngwenyi:

³ “Mwene, haanashiha akwa munanyi je eswe. Haanabuzula yilumbilo ye. Hinasala ukawami, mba kaanafupu mana akungushiha.”

⁴ Alioze Zambi kumbululo lika amuhele? Ngwenyi: “Hingunafungu tununu shimbiali twa atu ja yami mwene waze kaawayilile ko hamba Bale.”

⁵ Chimuwika nawa ni haliabwila. Atu amwe aliko waze Zambi atongwele mu utu wenyi.

⁶ Zambi hanaatongola mumu ha utu wenyi, hi ha yitanga yo ko yize alingile. Nyi hanaatongola mumu ha yitanga yo, kachi utu wa Zambi kuuchi kubwa wamwenemwene.

⁷ Mba twambe kuchi? Ngwetu: Aisraele kaazukile ko yize afupile. Shina waze atongwele Zambi, enoo ayizukile. Akwo yaalumuka akalu.

⁸ Ngwe hichinasonewa mu Mukanda wa Zambi ngwo: “Zambi yaaha mbunge jikalu. Ndoo ni musono kaahashile kumona ni meso jo, hanji kwivwa ni matwi jo.”

⁹ David yamba ngwenyi: “Yakulia yo yiibwe muheto ni chitalingiso, alimbuke, aamwese lamba!

¹⁰ Meso jo afukiwe, hanga keechi kamona nichimwe. Nyima jo jifumbame tangwa ha tangwa.”

¹¹ Mba ngunahula ngwami, muze Ayuda atalingile, alimbukile liakulu, nyi kuchi? Ka lume! Alioze mumu ha milonga yo, mavungu akwo haanazuku ulamwino, hanga Ayuda akabwe ni ukwa hali ayo.

¹² Nyi atu a ku yifuchi yeswe haanayuku mumu ha milonga ya Ayuda, nawa, nyi waze hi Ayuda ko haanayuku mumu Ayuda kaakumbile, shinoho yiwape yahiana muyikabwa muze Ayuda eswe haalamwina.

Ulamwino wa atu waze hi Ayuda ko

¹³ Haliabwila ngunahanjika kuli yenu hi Ayuda ko. Ngwami, nguli kanganda ka Yesu kuli yenu. Nakuwahilila ha milimo yami.

¹⁴ Tangwa likwo munguhasa kwihia ni ukwa atu a ku vungu liami, ha kulamwina amwe hakachi ko.

¹⁵ Mumu muze Zambi weehukile, yapwisa atu akwo tusendo twenyi. Kuchi muchikabwa muze makatambula Aisraele nawa? Muze makaatambula, waze haanafu maakabwa ni mwono.

¹⁶ Nyi umwe mahana Chihanda cha mwaha utangu wa mbolo kuli Zambi, kachi mwaha wa muundu nawa niwenyi. Nyi umwe mahana miji ya mutondo kuli Zambi, ni ye mitango nawa niyenyi.

¹⁷ Aisraele kaali ngwe mutondo wa olive uze atumbile, ni haanaubatula mitango yikwo. Yena hi Kayuda ko, uli ngwe mutondo olive wa mu yambu uze anungine ku mutondo uze abatwile mitango yikwo. Haliabwila miji yize ya olive uze wakutumba, yenayo yakukwaha tachi.

¹⁸ Kashika, kuwahashile kulelesa atu waze analifu ni mitango yize abatwile. Ngwe kuchi muuhasa kulisuta? Nyingika ngwe, hi yena ko wakukwata miji, alioze miji ye yakukwata yena.

¹⁹ Muwamba ngwe: “Hanabatula mitango yize ha kusalakanyisa ho yami.”

²⁰ Chenacho. Ayibatwile mumu kafulielele ko, alioze yena hiwasalakana ho mumu ha ufulielo we. Alioze kanda ulisuta ha chikuma chino. Chakutamba kwivwa woma.

²¹ Mumu, nyi Zambi kevwilile ko Ayuda keke, waze alifwa ni mitango yitangu, nyingika ngwe, ni yena nawa kechi kakuvwila keke.

²² Mba talenu utu wa Zambi ni ufwatulo wenyi. Kakuvwila ufwatulo waze haanalimbuka. Alioze yena, kakukulweza utu, nyi kuwakunyongonona mu utu wenyi. Alioze nyi ka, ni yena nawa, Zambi makakubatwila ngwe mutango.

²³ Nyi Ayuda maakalumuka kukuyambashana cho, Zambi makaanunga kuze abwile hatangu, mumu Zambi kanahase kwanunga nawa.

²⁴ Yena, hi Kayuda ko, uli ngwe mutango wa olive wa mu yambu uze abatwile ni anungine ku olive wa kutumba. Chili chikalu kuchilinga. Alioze Ayuda, ye mitango ya olive wakutumba. Muchikabwa chashi ni kwanunga nawa ku mutondo uze abwile hatangu.

Ulamwino wakusula wa Aisraele

²⁵ Akwetu, ngunanunyingikisa chijimbikilo chino, kuchina munulinyonga ngwe nuli akwa mana. Chijimbikilo chino ngwo kukala cha mbunge ja Aisraele hi cha matangwa eswe ko. Alioze maakasala chizechene ndoo kwoka cha mavungu akwo hichazuka.

²⁶ Chenacho Aisraele eswe makaalamwina. Ngwe hichinasonewa mu Mukanda wa Zambi ngwo: “Chilamwina makakatuka ku limbo lia Zione, makachiza utanganyanyi weswe wa vungu lia Yakoba.

²⁷ Uno we Usendo mungukalinga no, muze mungukachiza shili yo.”

²⁸ Ayuda haanlituna Sango Jibema. Kashika, kaali akwa kole ja Zambi—mumu hali yenu hi Ayuda ko. Alioze Zambi waatongwele hatangu. Kashika, kaali waze Zambi akuzanga, mumu hali tushakulu two.

²⁹ Mumu Zambi keshi kutambula nawa yize hanahane. Keshi kwalumuna manyonga jenyi hali waze atongwele.

³⁰ Hatangu, yenu hi Ayuda ko, kunwononokene ko Zambi, alioze haliabwila Zambi hananuvwila keke, mumu ha uhulia wa Ayuda.

³¹ Chimuwika nawa, ayo kaali tuhulia mumu ha keke yize anuvwilile Zambi, hanga ni ayo nawa akeevwile keke.

³² Mumu Zambi hanapwisa atu eswe funge ku uhulia ha kulweza keke yenyi kuli eswe.

Unene wa yiwape ya Zambi

³³ Mana ja Zambi ni yinyingi yenyi kuyajotoka ni kulumbama ngwe ubite! Iya mahasa kulumbununa ubatwilo wenyi? Iya mahasa kunyingika manyonga jenyi?

³⁴ Ngwe Mukanda wa Zambi unambe: “Iya Unanyingika manyonga ja Mwene Zambi? Iya mahasa kumulongesa?

³⁵ Iya mahasa kumwaha Chuma, hanga akamukundulule?”

³⁶ Yuma yeswe yatangiwile kuli Zambi, yakukatuka kuli iye, yakumulemesa. Uhenya ukabwe kuli Zambi ku miaka yeswe! Chibwe kama Chenacho.