A-ROMA 10 - Mukanda Wa Zambi 1970

¹ Akwetu, chize nakuzanga ni mbunge yami yeswe, ni chize nakuliumba kuli Zambi hakutwala kuli Aisraele ngwami, hanga akaalamwine.

² Mumu ngunahase kwashindakenya ngwami, kaakulihana chinji kuli Zambi, alioze hi nikulita ni chinyingi ko.

³ Mumu kaanyingikine chize Zambi akupwisa atu akwa ululi. Yeeseka kulipwisa akwa ululi ayo ene, yeehuka jila yize Zambi akupwisa atu akwa ululi.

⁴ Mumu Kristu hanamanununa Shimbi ja Mose, hanga yoze mafuliela, Zambi mamupwisa mukwa ululi.

Ulamwino kuuli wa atu eswe

⁵ Mose hanasoneka chino hakutwala ku chikuma cha kupwisa mutu mukwa ululi, ha kwononokena Shimbi. Ngwenyi: “Yoze wakulinga yize Shimbi jinambe, makabwa ni mwono ku Shimbi.”

⁶ Alioze hakutwala ku chikuma cha kupwisa mutu mukwa ululi ku ufulielo, chinambe ngwo: “Kanda ulihanjikisa yena mwene ngwe: ‘Iya mazezuka mwilu?’ ” (kafwa ngwe, akahulumune Kristu).

⁷ “Kanda ulihanjikisa nawa ngwe: ‘Iya mapalumuka mu kalunga?’ ” (kafwa ngwe, hanga akahindwise Kristu ku kufwa).

⁸ Alioze kuchi chinambe? Chino ngwo: “Liji lia Zambi lili hehi ni yena, mu kanwa lie ni mu mbunge ye.” Lino lie liji lia ufulielo lize twakwambujola.

⁹ Nyi muutayiza ni kanwa lie ngwe: “Yesu kali mwe Mwene,” nawa, nyi muufuliela mu mbunge ye ngwe, Zambi wamuhindwishile ku kufwa, kumakulamwina.

¹⁰ Mumu mutu kakufuliela mu mbunge yenyi, mba Zambi kakumupwisa mukwa ululi. Mutu kakutayiza ni kanwa lienyi, mba Zambi kakumulamwina.

¹¹ Mumu Mukanda wa Zambi unambe ngwo: “Yoze mafuliela Mwene, kechi kevwa sonyi.”

¹² Kulisa chakuhi mukachi ka Ayuda ni mavungu akwo, mumu eswe Mwene umuwika akwete, yoze wakuyukisa eswe waze akumufuliela.

¹³ Ngwe hichinasonewa mu Mukanda wa Zambi: “Yoze malemba ngwenyi: ‘Mwene, ungulamwine kama,’ mamulamwina.”

¹⁴ Alioze ngwe kuchi maamulemba, nyi kaamufulielele ko? Ngwe kuchi maamufuliela, nyi keevwile ko sango? Ngwe kuchi maahasa kwivwa sango, nyi mukwa kujambujola wakuhi?

¹⁵ Ngwe kuchi maakajambujola, nyi kaatumine? Ngwe hichinasonewa mu Mukanda wa Zambi ngwo: “Chinabeme ha kumona kwiza cha waze akwambujola Sango Jibema”!

¹⁶ Alioze hi eswe ko ononokenene Sango Jibema. Kashika Izaya yahula ngwenyi: “Mwene Zambi, aya haanafuliela kama sango jetu?”

¹⁷ Chocho ufulielo kuwakwiza ha kwivwa sango, ni je sango jili kwambujola Kristu.

¹⁸ Alioze ngunahula ngwami, keevwile ko sango jize, nyi? Chamwenemwene haanajivu! Ngwe Mukanda wa Zambi unambe ngwo: “Liji lio haanalivu hashi heswe. Maliji jo haanahete ku masongo ja yifuchi yeswe ya hashi.”

¹⁹ Ngunahula nawa ngwami, Aisraele kaanyingikine ko, nyi? Mose kali mutangu kukumbulula ngwenyi: “Mungukanupwisa akwa ukwa hali atu waze keeshi chifuchi. Mungukanushinjika kwivwila wuli vungu lize kulishi mana.”

²⁰ Izaya kanahamuka kuhiana nikwamba nawa ngwenyi: “Atu waze kaangufupile, haananguwane. Hingunasoloka kuli waze kaanguhulile.”

²¹ Alioze hakutwala kuli Aisraele kanambe ngwenyi: “Tangwa lieswe nganganga hingunolola moko jami kuli yihulia kanda akwa pami.”