A-ROMA 1 - Mukanda Wa Zambi 1970

Kumeneka

¹ Yami, Paulu, ndungo ya Yesu Kristu, ngunanusonekena mukanda uno. Zambi mwe wangutambikile ngukabwe kanganda kenyi, wangutongwele ngukambujole Sango jenyi Jibema.

² Zambi wajilakenyene kulu mu Mukanda wenyi, yajinyingikisa akwa munanyi jenyi.

^3-4 Sango jino Jibema jinahanjikila Mwanenyi Yesu Kristu, Mwene wetu. Hakutwala ku uutu wenyi, wa ku Chikota cha David. Alioze hakutwala ku uzambi wenyi, yamusolola ni ndundo akabwe Mwana Zambi, ku uhindukilo ku kufwa.

⁵ Mu jina lia Yesu, Zambi hanangwehe vumbi ngukabwe kanganda ka Kristu, hanga ngukanehe atu a ku mavungu eswe akamufuliele ni kumwononokena.

⁶ Yenu nawa, nuli a kuli atu wano, nuli waze Zambi atambikile nukabwe a mbala a Kristu.

⁷ Ngunanusonekena yenu nwatwama mu Roma, yenu eswe waze Zambi akuzanga, waze atambikile nukabwe akwa kulinanga. Zambi Tata yetu ni Mwene Yesu Kristu anulweze utu ni anwehe uhwimino.

Paulu yazanga kuya akanangise akwa Kristu a mu Roma

⁸ Hatangu ngunasakwila Zambi yami, mu jina lia Yesu Kristu, hali yenu eswe, mumu akwa hashi eswe kaakwambulula hakutwala ku ufulielo wenu.

⁹ Zambi kali chela chami, yoze nakulingila ni mbunge yami yeswe ha kwambujola Sango Jibema ja Mwanenyi. Kananyingika ngwenyi, nakunuvulwoka matangwa eswe

¹⁰ muze nakulemba. Nakuhula Zambi ngwami, nyi matayiza, kachi muchilita, ngwize ni kunutala.

¹¹ Mumu ngunevu usona wa kunomona ni kulianyina yiwape yize Mwiku wa Linanga wakuhana, hanga ngunatakamise.

¹² Kafwa ngwami, yetu eswe aali tutambule tachi hamuwika, yami ku ufulielo wenu, ni yenu ku ufulielo wami.

¹³ Akwetu, ngunazange nunyingike ngwenu, kanji nanyongene kunuheta, alioze navumewene ndoo musono. Nazangile milimo yami kubwa ni mihuko yimwe mukachi kenu nawa, ngwe mukachi ka mavungu akwo.

¹⁴ Mumu Changutamba kuya kuli eswe, kuli waze haanalilongesa kulu ni kuli waze kanda achililongesa, kuli akwa mana ni kuli waze keeshi mana.

¹⁵ Kashika, ngunafwila kwambujola Sango Jibema kuli yenu nawa nwatwama mu Roma.

Ndundo ja Sango Jibema

¹⁶ Mumu Chishi kwivwa sonyi ha Sango Jibema, mumu jili ndundo ja Zambi ha kulamwina eswe waze akufuliela, hatangu Ayuda, ni mavungu akwo nawa.

¹⁷ Mumu Sango Jibema jinasolola chize Zambi akupwisa atu akwa ululi. Kakuchilinga ku ufulielo wika, chize ku kabutu ndoo ku songo, ngwe chinasonewa mu Mukanda wa Zambi: “Yoze Zambi hapwisa mukwa ululi ku ufulielo, makabwa ni mwono.”

Uhiso wa akwa hashi eswe

¹⁸ Zambi mu utenu wenyi kakusolola chize akumwesa lamba waze akuvulumuna ni yitanganyanyi. Ku yitanga yo yibi kaakukinda umwenemwene.

¹⁹ Zambi kakwamwesa lamba, mumu atu kaananyingika pundu hakutwala kuli Zambi. Iye mwene hanaanyingikisa cho kulu zwalala.

²⁰ Chize ku kutanga cha hashi, ndako jenyi jize kujishi kumoneka, kafwa ngwe ndundo jenyi ja miaka yeswe ni uzambi wenyi kuyakumoneka zwalala mu yitanga yenyi. Kashika, keeshi kaliongelo.

²¹ Kaananyingika Zambi, alioze keeshi kumulemesa, keeshi kumuchichimieka ngwe chinalite ni Zambi. Alioze mu manyonga jo haanalumuka yihepuke, mbunge jo kujishi mana, jinalaa bwii.

²² Kaakulivulwoka ngwo; “Tuli akwa mana,” alioze kaali yihepuke lume.

²³ Keeshi kuwayila Zambi yoze keshi kufwa, alioze kaakuwayila tuponya waze analifu ni mutu yoze wakufwa, hanji tujila, hanji tushitu twa molu awana, hanji manoka.

²⁴ Kashika, Zambi wakwakunjika ku yitanga yibi nikulita ni usolo wa mbunge jo, ni kulinga cha sonyi ni mijimba yo ene.

²⁵ Kaakusumbakenya umwenemwene wa Zambi ni mahuza. Kaakuwayila ni kuvumbika chize Zambi atangile kuhiana Tangi iye mwene, yoze chatamba kuhalisa ku miaka yeswe! Chibwe kama Chenacho.

²⁶ Kashika, Zambi wakwakunjika ku usolo ubi ha kulinga yuma ya sonyi. Chibwe mapwo jo haanalumuna chize chinalite ni mijimba yo ni chize kuchalitele.

²⁷ Ni malunga nawa chizechene, haanehuka chize chinalite kulinga ni mapwo, haanalivwila usolo ubi lunga ni lunga, ha kulinga yitanga ya sonyi umwe ni mukwo. Kashika, akutambula muli ayo ene lamba lize linalite ni kupianguka cho.

²⁸ Kaakulituna chinyingi cha umwenemwene hakutwala kuli Zambi. Kashika Zambi wakwakunjika ku manyonga a kulumbuka ha kulinga yuma yize kuyalitele.

²⁹ Haanazala ni utanganyanyi weswe, ni ungulungulu, ni lwahu wa mbongo, ni uhuka, ni lufwachinda, ni ungalwe, ni Vunda, ni kalimbalimba, ni kubihisa. Kaakulinyongota,

³⁰ kaakulamikiza, kaakwivwila Zambi kole, akwa kaleleso, akwa kulisuta, akwa kulizata akwa kutomba yuma yibi, yihulia kuli yisemi jo,

³¹ yihepuke, keeshi kushishika ku yilakenyo, keeshi utu, chibwe keeshi keke kuli atu.

³² Enoo kaananyingika kanawa ubatwilo wa ululi wa Zambi uze unambe ngwo: “Atu waze akulinga yuma ngwe yize kaanatela kufwa.” Hindu hi kuyilinga wika ko, alioze kaakutayiza atu waze akuyilinga.