Amose 9 - Mukanda Wa Zambi 1970

¹ Namwene Mwene Zambi te kanamana hehi ni chilumbilo mu zuwo lia Zambi. Yamba ngwenyi: “Lamba manguji a zuwo lia Zambi ha masongo hanga nyimasenge yikanyike, lie zuwo libuzukile hali atu. Atu waze maasala ni mwono mungwashihisa mu jita. Niumwe kechi kwomboka ni kuchina.

² Chibwe afule ni tachi ndoo muma lia afu, hindu mungukaakwata ko. Chibwe akanyine mwilu, hindu mungukaahulumuna mo bwaka hashi.

³ Chibwe akaswame helu lia mulundu wa Karmele, hindu mungukaafupa ni kwakwata. Chibwe akaswame mu mashima a kalunga lwiji, hindu mungukambila kashitu munene ha kwasuma.

⁴ Chibwe akwa kole jo akaatwale mu ufunge, hindu mungukaashihisa ni mukwale. Ngunaahulikila meso ha kwalinga yibi, hi yibema ko.”

Ndundo ja Zambi ha kumwesa atu lamba ni kutanga chaha

⁵ Mba mukwa munanyi Amose yamba ngwenyi: Mwene Zambi Mukwa Ndundo Jeswe kakukwata hashi, mba muhanyika. Hashi heswe hakuzunduka ni kunyikumuka ngwe lwiji Nile, atu eswe waze akutwama ho maanenganyana.

⁶ Mwene Zambi kakutunga yibatulo yenyi mwilu, ni kusa kuzazuluka helu lia hashi. Jina lienyi: Mwene Zambi!

Maliji akusula: Zambi makamwesa Aisraele lamba, mba makaapwisa aha Aisraele hi abema ko kuhiana mavungu akwo

⁷ Mwene Zambi kanambe ngwenyi: “Aisraele, kuma Chishi kuzanga Aetiopia ngwe chize nakuzanga yenu, nyi? Hi yami ko nachijile Afilistia ku hongo lia Krete ni Asuria ku chifuchi cha Kire, ngwe chize nanuchijile yenu ku chifuchi cha Egyptu, nyi?

⁸ Ewa, nakuhulikila meso ku wanangana uno ubi wa Israele, mungukawonona. Alioze chichi kwonona vungu lia Yakoba.

⁹ Munguhana Shimbi kuli akwa kole ja Aisraele ha kwasala ngwe chize atu akusala masekeseke mu musalo. Nikamwe ka liwe kukahashile kuholoka hashi. Mungukaasala ha kusakula atu abi mukachi ko muze maakabwa funge mu yifuchi ya yilambala.

¹⁰ Yivulumunyi a hakachi ka atu jami kumaakafwa mu jita, eswe waze akwamba ngwo: ‘Chibi kuchichi katuwana nihakepe.’ ”

Zambi makalamwina Aisraele

¹¹ Mwene Zambi kanambe ngwenyi: “Tangwa mulikeza muze mungukahilwisa wanangana wa David, uze uli ngwe zuwo lize habuzuka. Mungukalulika mambango jalio ni kujibemesa. Wanangana uze mungukaubemesa ni kuupwisa ngwe hatangu.

¹² Chenacho Aisraele maakakumba Chihanda cha chifuchi cha Edome chize chasala ni yifuchi yeswe yikwo yize te nwakuyula mumu hali yami.” Chenacho anambe Mwene Zambi yoze makachilinga.

¹³ Mwene Zambi kanambe ngwenyi: “Tangwa mulikeza lize mbuto muyikoka kuhiana, keechi kuhasa kuyibatula yeswe; ni mihuko ya vinyu muyikoka kuhiana, keechi kayikama yeswe. Milundu muyikasulumioka vinyu yiyema, ni mu mikandu muyikapukumioka ngwe meya.

¹⁴ Mungukahilwisa atu jami ku chifuchi cho. No kumaakatungulula membo waze haanaabuzuka ni kutwama mo. Maakalima minda ni kulia mihuko yayo.

¹⁵ Mungukatumba atu jami mu chifuchi chize naahele, hi keechi kaatukula mo nawa.” Chenacho anambe Mwene Zambi, Zambi yenu.