Amose 8 - Mukanda Wa Zambi 1970

Usolwelo wa mukwa munanyi: kapaya ka mawundu, Usolwelo wa muchiwana

¹ Mwene Zambi yangulweza Usolwelo ukwo. Yingumona kapaya ka mawundu anahi.

² Mwene Zambi yanguhula ngwenyi: “Amose, yika unamono?” Yingukumbulula ngwami: “Kapaya ka mawundu anahi.” Yangwamba ngwenyi: “Songo lia atu jami Aisraele hiliaheta. Chichi kwalumuna nawa manyonga jami ha kwamwesa lamba.

³ Ha tangwa lize, mapwo waze te akwimba miaso ya chiseke mu zuwo lia mwanangana maakalila mbimbi. Afu maakabwa kweswe. Mukukahola kuluu.”

Zambi makamwesa Aisraele lamba Aisraele kaanavulumuna

⁴ Banjikenu, yenu nwakuliata akwa kuhona, ni kufupa kunongesa yiswale mu chifuchi.

⁵ Nwakulihanjikisa yenwene ngwenu: “Matangwa ja kuhwima, shimbu lika maakahwa, hanga tulanjise mbuto jetu? Chikalu kushimbwishila ndoo ku songo lia tangwa lia kuhwima, hanga tuhase kubutula nawa kulanjisa. Tukehese njongo, tukonge atu ni pezo ya mahuza, tukokese mbongo.

⁶ Tulanjise yiswaswa ya mbuto ni ndando yinji. Tufupenu chiswale yoze kahashile kufweta kongo lienyi, chibwe ndando ja sapato jaali, hanga tumulande ngwe kabinji.”

Lamba mulikabwa mwilu ni hashi

⁷ Mwene Zambi, yoze Aisraele akulemesa, halishinga ngwenyi: “Chamwenemwene, chichi kuvulama yitanga yo yibi.

⁸ Kuma hashi kuhechi kanyika, nyi? Mutu mweswe mu chifuchi kechi kanenganyana, nyi? Chamwenemwene, hashi heswe muhakanyikumuka, muhakazunduka ni kunyikumuka ngwe lwiji wa Nile.

⁹ Ha tangwa lize, ola ha muchima, tangwa mungukalipwisa milima, ni hashi mungukalayisa ho bwii.

¹⁰ Mungukalumuna yiteleka yenu kubwa ngwe tangwa lia yinyengo ha kufunda afu, ni kwalumuna miaso yenu ya chiseke kubwa ya yinyengo. Munukatewula tuwewe ni kuzala mianji. Munukabwa ngwe yisemi waze analiji mwano wa lunga umuwika. Tangwa lize mulikabwa libi ndoo ku songo. Yami Mwene Zambi nachamba.

Zambi makehuka Aisraele

¹¹ “Matangwa maakeza muze mungukatuma zala mu chifuchi. Atu maakevwa zala, hi ya yakulia ko; maakevwa pwila, hi ya meya ko. Alioze maakevwa zala ya maliji a Mwene Zambi. Yami Mwene Zambi nachamba.

¹² Aisraele maakendangana chize ku norde ndoo ku sude, chize ku chivumbuko ndoo ku chitokelo. Maakalihiza sali ni sali ni kufupa yoze maalongesa maliji a Mwene Zambi, alioze keechi kamumona.

¹³ Ha tangwa lize ana mapwo abema ni akweze a tachi maakafwa ni pwila ya meya.

¹⁴ Atu waze akulishinga ni mahamba ja mu limbo lia Samaria, waze akwamba ngwo: ‘Ni Zambi ya Dan’, hanji, ‘Ni Zambi ya Bersheba — atu waze maakalimbuka, keechi kahinduka nawa.’ ”