Amose 7 - Mukanda Wa Zambi 1970

Makumbi: Usolwelo utangu wa kumwesa lamba

¹ Mwene Zambi yangulweza Usolwelo. Namwene Zambi te kanalulika yizavu ya makumbi. Chino chabwile muze haabatula mihuko ya mwanangana, muze te mwambu hiwabutuka kusokoloka nawa.

² Mu Usolwelo namwene chize te makumbi anali yuma yeswe ya wisu mu chifuchi. Mba yingwamba ngwami: “Mwene Zambi, ngunaliumbu waakonekene kama! Ngwe kuchi maahasa kulilamwina? Atu alelu ni akehe chichize!”

³ Mba Mwene Zambi yalumuna manyonga jenyi, yamba ngwenyi: “Chuma chize hiwamona, kuchichi kubwa ko.”

Kahia: Usolwelo wa muchaali wa kumwesa lamba

⁴ Mwene Zambi yangulweza Usolwelo ukwo. Namumwene te kanalulika kahia ka kumwesa atu jenyi lamba. Ke kahia te hikalilala ha kalunga lwiji, hikabutuka kwocha hashi.

⁵ Mba yingwamba ngwami: “Mwene Zambi, litwamine kama. Ngwe kuchi atu je maahasa kulilamwina? Atu alelu ni akehe chichize!”

⁶ Mba Mwene Zambi yalumuna manyonga jenyi, yamba ngwenyi: “Ni chino nawa, kuchichi kubwa ko.”

Lwoji wa kwesekela nacho: Usolwelo wa muchitatu wa kumwesa lamba

⁷ Mwene Zambi yangulweza Usolwelo ukwo. Namumwene te kanamana hehi ni chipanga ni lwoji wa kwesekela nenyi mu kwoko lienyi. Chipanga chize yaachitunga ni ngeseko ya lwoji yoze.

⁸ Yanguhula ngwenyi: “Amose, yika unamono?” Yingukumbulula ngwami: “Lwoji wa kwesekela nenyi.” Mba yamba ngwenyi: “Nguneseka ni lwoji yono ha kulweza ngwami, atu jami kaali ngwe chipanga chize chinahenge. Chichi kwalumuna nawa manyonga jami ha kumwesa atu jami lamba.

⁹ Akwa kole maakabuzula yiwayilo ya vungu lia Isake. Mazuwo a kuwayila ja Israele maakasala ahululu. Mungukatukila zuwo lia Jeroboame ni mwela.”

Milimo ya mukwa munanyi

¹⁰ Mba hako Amazia, wa ku limbo lia Betele, yatuma liji kuli mwanangana wa Israele, Jeroboame, ngwenyi: “Amose kanakutwama punga. Maliji jenyi maakashiha chifuchi.

¹¹ Mumu kanambe ngwenyi: ‘Mwanangana Jeroboame kumakafwa mu jita, ni akwa kole ja Aisraele kumaakaatwala ku chifuchi cho mu undungo.’ ”

¹² Mba Amazia yambila Amose ngwenyi: “Mukwa munanyi, katuka! Yako kwe ku chifuchi cha Yuda, kwenako muuhasa kulongesa. Ayo maahasa kukulisa.

¹³ Kanda ulongesa nawa kuno ku Betele, mumu kuli kuma kwa kuwayila kwa mwanangana ni atu jenyi eswe.”

¹⁴ Mukwa munanyi Amose yakumbulula ngwenyi: “Hi nguli mukwa munanyi ko yoze atu akulisa mumu ha milimo yenyi. Nguli kwami kafunga ka yimuna kanda mukwa kutala mitondo mikuyu.

¹⁵ Alioze Mwene Zambi hanguchiza ku milimo ya kufunga yimuna, hangwamba ngwenyi: ‘Yako Ulongese maliji jami kuli atu jami Aisraele.’

¹⁶ Banjika maliji a Mwene Zambi: yena unangwambe ngwe: ‘Litwamine kulongesa maliji a Zambi ni kulimika ni Aisraele.’

¹⁷ Hako Amazia, muze hiwamba chino, Mwene Zambi kanakwambe ngwenyi: ‘Pwo lie makapwa chitanji mu chihunda. Ana je a malunga ni a mapwo kumaakafwa mu jita. Chifuchi chenu kumaakachiteta kuli mavungu akwo. Yena mwene muukafwila mu chifuchi cha waze kaanyingikine ko Zambi. Akwa kole maakatwala Aisraele ku chifuchi cho mu undungo.’”