Amose 6 - Mukanda Wa Zambi 1970

Aisraele kaanashachila ha tachi jo ene

¹ Lamba lienu waze nwatwama nikwoloka mu limbo lia Zione! Lamba lienu waze nwakunyonga ngwenu, nuli mu uhwimino mu limbo lia Samaria. Lamba lienu yenu malunga alemu a mu chifuchi chino chilemu Israele, kuli waze kwakwizaza atu ha kwakwasa!

² Yenu nutale limbo lia Kaine, katu kwe kuze, nuya ku limbo linene lia Hamate, mba nuya nawa ku Gate, limbo lia Afilistia. Kuma wano te e ahiana yifuchi ya Yuda ni Israele, nyi? Kuma yifuchi yo yahianyine yize ya yenu, nyi?

³ Kunushi kutayiza ngwenu, lamba mulikeza, alioze ku yitanga yenu nwakutayiza kwonona.

⁴ Lamba lienu waze nwakubomba ha mihela ya mazo a njamba ni kuliolola, ni kulia ana mapanga ni yimbembe a ngombe!

⁵ Nwakuzanga kutomba miaso ngwe mwanangana David, ni kuyimba ha kalialia.

⁶ Nwakunwa vinyu mu misenge yinene yinene, nwakulikwita maji a lupembo mubema, alioze kunushi kwivwa kubihia hakutwala ku kwonona cha Aisraele.

⁷ Kashika munukabwa atangu ha kuya mu undungo. Kunuchi kabwa nawa ni yiwanyino ni yiteleka.

⁸ Mwene Zambi Mukwa Ndundo Jeswe hanalishingi nikwamba ngwenyi: “Nakuvutwokela kulengumuka cha Aisraele ni mazuwo jo anene anene. Kashika mungukakunjika limbo lio ni yuma yize yilimo kuli mukwa kole wo.”

⁹ Nyi mwasala lume atu kumi mu jiko limuwika, eswe kumaakafwa.

¹⁰ Mba muze usoko wa mufu meza ni kwanda mufu wenyi, mahula ngwenyi: “Mutu mukwo ulimo, nyi?” Mutu makumbulula ngwenyi: “Ka!” Neye mamba ngwenyi: “Hola kuluu! Kanyama, kanda uvuluka jina lia Mwene Zambi.”

¹¹ Muze Mwene Zambi makahana Shimbi, mazuwo anene ni akepe maakaabuzula.

¹² Tuvwalu kaakuzomboka ha yimawe, nyi? Atu kaakulima ni ngombe ha kalunga lwiji, nyi? Alioze yenu hinwalumuna ubatwilo uze unalite kubwa ulembe, ni ululi kubwa uhenge.

¹³ Nwakuwahilila ha Chuma chamokomoko. Nwakulisamba ngwenu: “Hitwakumba ni tachi ja yetwene.”

¹⁴ Mwene Zambi Mukwa Ndundo Jeswe kanambe ngwenyi: “Aisraele, mungukanutumina tujita twa yilambala ha kukumba chifuchi chenu. No maakanubinjisa chize ku jila Hamate mukachi ka milundu ku norde ndoo ku chitwetwe cha Araba ku sude”.