Amose 5 - Mukanda Wa Zambi 1970

Mukwa munanyi kanalilila Aisraele

¹ Aisraele, banjikenu lungungu yono ngunanulilila ngwami:

² Mwana pwo Israele hanalimbuka, kechi kahinduka nawa. Kanabombo hashi, Niumwe makamuhindwisa.

³ Mwene Zambi kanambe ngwenyi: “Mu Israele, limbo lize maakatuma tujita kanunu, maakahiluka shina kulakaji; limbo lize maakatuma tujita kulakaji, maakahiluka shina kumi.”

Fupenu Zambi, Chinenu kwonona chize muchikeza

⁴ Mwene Zambi kanambila Aisraele ngwenyi: “Hilukenu kuli yami, mba nubwe ni mwono.

⁵ Kanda nuya ku limbo lia Bersheba mu kuwayila. Kanda nweseka kungufupila ku limbo lia Betele, mumu muchikalumuka chamokomoko. Kanda nuya ku limbo lia Gilgale, mumu atu jamo maakaatwala mu undungo.”

⁶ Yeenu kuli Mwene Zambi, mba munubwa ni mwono. Nyi ka, makaholoka ngwe kahia hali Aisraele. Kahia kaze mukakocha atu ja mu Betele; niumwe kechi kakajima.

Mukwa munanyi kanakanyamisa yivulumunyi

⁷ Makanumwesa lamba, yenu waze nwakuhengesa ubatwilo, waze kunushi kutayiza usambiso wa atu!

Ndundo ja Zambi ha kutanga yuma ni kumwesa atu lamba

⁸ Mwene Zambi watangile matongonoshi; Kungulwila ni Muta ni Kawa. Kakwalumuna milima kubwa Pangu, Mwalwa kubwa ufuku. Kakutambika meya a mu kalunga lwiji ni kwamwangina hashi. Jina lienyi; Mwene Zambi.

⁹ Kakubuzula yipanga ni mazuwo akolo.

Mukwa munanyi kanakanyamisa yivulumunyi ni akwa ululi

¹⁰ Yenu nwakuvwila kole yoze wakusolola uhenge ni kwambulula umwenemwene mu ubatwilo.

¹¹ Yenu nwakuliata yiswale, nwakwiya mbuto jo. Kashika kunuchi kutwama mu mazuwo jenu abema a mawe waze nwatungile, kunuchi kanwa vinyu ya mu minda yize nwatumbile.

¹² Ngunanyingika milonga yenu yinji ni kwoka cha shili yenu. Nwakuhungumiona atu abema, nwakutambula sambilo ya uhenge, nwakulituna kubatwila yiswale ni ululi.

¹³ Mwaka uno uli ubi, kashika mukwa kukanyama wakuhola kwenyi kuluu.

Lingenu yibema, Zambi anuvwile keke

¹⁴ Lingenu yibema, hi yibi ko, mba munubwa ni mwono. Hohene Mwene Zambi Mukwa Ndundo Jeswe mabwa hamwe ni yenu chamwenemwene, ngwe chize hinwamba.

¹⁵ Vutwokelenu yibi, zangenu yibema, kolesenu ubatwilo wa ululi mu yota. Hanji Mwene Zambi Mukwa Ndundo Jeswe mevwila keke masalila a chifuchi chino.

Aisraele maakalila

¹⁶ Kashika Mwene Zambi Mukwa Ndundo Jeswe kanambe ngwenyi: “Mu majila eswe a mu limbo atu maakalila mbimbi, maakambamba ngwo: ‘Mama yami! Mama yami!’ Maakatambika chibwe njimi ha kulila afu hamwe ni waze akutambula fweto ya kulila.

¹⁷ Mu minda yeswe ya vinyu atu maakalila mbimbi. Yuma yino muyikabwa mumu nguneza ha kunumwesa lamba.” Chenacho anambe Mwene Zambi.

Aisraele kaanashachila ha yuma yamokomoko Kaanashachila ha uwayilo wamokomoko

¹⁸ Lamba lienu, yenu waze nwakuzanga tangwa lia Mwene Zambi! Yibema yika munukamona ha tangwa lize? Mulikabwa tangwa lia milima, hi lia pangu ko.

¹⁹ Mulikabwa ngwe mutu yoze unachina tambwe, alioze matakana ni kashitu mukwo musasu! Hanji ngwe mutu unanjila mu zuwo, unakwata ku mbango, mba toka mamutota!

²⁰ Tangwa lia Mwene Zambi mulikabwa milima, hi Pangu ko. Mulikabwa milima yinji, hi mwalwa ko.

²¹ Mwene Zambi kanambe ngwenyi: “Ngunavutwokela yiwanyino yenu, ngunalitunu yo! Chishi kwivwa kuwaha ni yikungulwila yenu!

²² Muze munungulambula milambu yenu ya kwocha ni ya mbuto, chichi kuyitayiza. Milambu yenu ya uwanyino ni yimuna yenu ya maji, chibwe kuyitala chichi kuyitala.

²³ Litwaminenu kusa zungo lia miaso yenu. Chibwe yisanji yenu, chichi kuyibanjika nawa.

²⁴ Tayizenu ubatwilo wenu ulite upukumuke ngwe meya a mu lwiji, ni ululi wenu ngwe lwiji yoze keshi kuma.

²⁵ “Yenu Aisraele, ha miaka yize makumi awana mu puya, yami nwalambwile milambu ni yitapo, nyi?

²⁶ Nwawayililile mahamba jenu a matongonoshi, Sakute ni Kayiwana, tuponya waze nwalilingilile yenwene. Haliabwila chatamba kuya no.

²⁷ Kashika mungukanutwala mu undungo kuze kanda lia limbo lia Damasku.” Chenacho anambe Mwene Zambi Mukwa Ndundo Jeswe.