Amose 4 - Mukanda Wa Zambi 1970

¹ Banjikenu yenu mapwo a mu limbo lia Samaria, waze nunatoho kuhiana ngwe ngombe a Bashane. Nwakulelesa ni kubinjisa yiswale, nwakwambila malunga jenu ngwenu: “Nehenu tunwe.”

² Mwene Zambi halishinga ni ulinange wenyi ngwenyi: “Matangwa maakeza muze maakanuchiza ho ni malowa; mutu mweswe mukachi kenu makabwa ngwe yishi ku lowa.

³ Maakanukokela ku yituwa ya chipanga ni kunumbila haze.”

Aisraele keeshi kuzanga kwivwa maliji a Zambi

⁴ Mwene Zambi kanambe ngwenyi: “Aisraele, yeenu ku limbo lia Betele, homa ha chijila, vulumunenu! Yeenu ku limbo lia Gilgale, vulumunenu kuhiana! Nehenu yimuna, alambulenu chichamene tangwa ha tangwa, nehenu milambu yenu ya Chihanda cha kumi ha matangwa atatu atatu.

⁵ Lambulenu milambu ya mbolo ya kusakwila Zambi, lisambenu ku meso ja atu akwo hakutwala ku milambu yize nwakuwezela helu! Mumu Chenacho nwakuzanga kulinga.

⁶ “Yami nanuvwishile zala mu membo jenu eswe, kashika kunwabwile ko ni yakulia. Chibwe chocho kunwahilukile kuli yami.

⁷ Nakanjishile vula muze minda yenu yambile kwima mbuto. Nanokosele vula ha limbo limwe, nayikanjishile ha limbo likwo. Vula yanokene ha munda umwe, ha munda ukwo kanokene ho.

⁸ Atu a ku amwe membo, muze haazeya ni pwila, yaaya nikupeliangila ku limwe limbo likwo ha kufupa meya, alioze kaamwene ko meya anazuku. Hindu kunwahilukile ko kuli yami.

⁹ “Nanutuminyine fuji ya chivukuminya ha kwocha mbuto jeswe. Makumbi yaalia upu mbuto jenu jeswe ja mu minda, ni yichakata ya vinyu, ni mihuko yenu ya mitondo ya mikuyu ni ya olive. Hindu kunwahilukile ko kuli yami.

¹⁰ “Nanutuminyine chipuho ngwe chize nachituminyine akwa Egiptu. Nashihile akweze jenu mu jita, nambachile tuvwalu twenu. Nabihishile misumba yenu ni vumba libi lia afu jenu. Hindu kunwahilukile ko kuli yami.

¹¹ “Nashihile amwe hakachi kenu ngwe chize nashihile atu a mu membo a Sodome ni Gomora. Yenu waze nwasalile nwabwile ngwe lukunyi yoze anachangumuna mu mbwemena ya kahia. Hindu kunwahilukile ko kuli yami.

¹² Ha chino, Aisraele, mungukanumwesa lamba. Kashika lilulikenu ha ubatwilo wami!” Chenacho anambe Mwene Zambi.

Ndundo ja Zambi ha kutanga yuma

¹³ Zambi wawumbile milundu, watangile fuji. Kakusolwela atu manyonga jenyi; kakwalumuna mwalwa kubwa ufuku. Kakuyula hashi heswe. Jina lienyi: Mwene Zambi Mukwa Ndundo Jeswe!