Amose 3 - Mukanda Wa Zambi 1970

Chishina cha uhiso wa Aisraele

¹ Yenu Aisraele, eswe waze Zambi hanaapulula mu chifuchi cha Egiptu, banjikenu maliji waze Mwene Zambi hahanjika hakutwala kuli yenu.

² Ngwenyi: “Hakachi ka mavungu eswe a hashi, shina yenu wika natongwele ni kunufunga. Ha chino milonga yenu yili yikalu, kashika mungukanumwesa lamba.”

Milimo ya mukwa munanyi: kulumbununa lamba lize mulikeza ni kukanyamisa

³ Atu aali maahasa kwenda hamuwika nyi kaalitesele, nyi?

⁴ Tambwe kakukenana mu yambu nyi kamwene kashitu, nyi? Mwevu wa tambwe kakuhanjika mu chivwenge chenyi nyi kakwachile nichimwe, nyi?

⁵ Kajila mafwa mu kambwila nyi kamutelele lio, nyi? Muheto wakulisohokela nyi kashitu kaliachile mo, nyi?

⁶ Muze meemba chitavwi cha jita mu limbo, atu keechi kwivwa woma, nyi? Chuma chikalu muchinjila mu limbo nyi Zambi kachitumine, nyi?

⁷ Chamwenemwene Mwene Zambi keshi kulinga Chuma nichimwe, shina malweza chijimbikilo chenyi kuli tuvumbi twenyi, akwa munanyi.

⁸ Muze tambwe makenana, iya kechi kwivwa woma? Muze Mwene Zambi mahanjika, iya malituna kuhanjika maliji jenyi?

⁹ Ambulwilenu waze atwama mu mazuwo ja mawanangana mu chifuchi cha Egiptu ni mu limbo lia Ashdode ngwenu: “Kungulukenu ha milundu yize yinajingilika Samaria, hanga nukevwe chizungozungo, nukamone chize akubinda.”

¹⁰ Mwene Zambi kanambe ngwenyi: “Atu wano kaakuzalisa mazuwo jo anene anene ni yuma yize anjile ni wiji ni kulwa. Keeshi kunyingika kulinga kanawa.

¹¹ Kashika umwe mukwa kole makajingilika chifuchi cho, makabuzula yipanga yo, makanda yuma ya mu mazuwo jo anene anene.”

¹² Mwene Zambi kanambe ngwenyi: “Ngwe chize kafunga kanatambula lume molu aali ni Chipinji cha litwi cha panga yoze akwata kuli tambwe, Chenacho nawa mungukapulula lume amwe Aisraele waze atwama ni uwahililo mu Samaria.”

¹³ Mwene Zambi Mukwa Ndundo Jeswe kanambe ngwenyi: “Banjikenu, kanyamisenu vungu lia Yakoba.

¹⁴ Ha tangwa lize mungukamwesa Aisraele lamba mumu ha milonga yo. Mungukabuzula yilumbilo ya mu limbo lia Betele. Mungukateta mbinga ja ha mambango ja yilumbilo yeswe, mujikaholoka hashi.

¹⁵ Mungukabazula mazuwo anene ni akepe, mazuwo a kuhenyesa ni mazo a njamba, mazuwo eswe lume.”