Amose 2 - Mukanda Wa Zambi 1970

Moabe

¹ Mwene Zambi kanambe ngwenyi: “Atu a mu chifuchi cha Moabe haanavulumuna nawa ni nawa, chamwenemwene mungukaamwesa lamba. Mumu yaalelesa mwanangana wa chifuchi cha Edome ha kwocha yifwaha yenyi.

² Mungukatuma kahia mu chifuchi cha Moabe, ni kwocha mazuwo akolo mu limbo lia Keriote. Akwa Moabe maakafwa mu chizungozungo cha jita muze tujita maakakumbuka, ni yitavwi muyikahiohia.

³ Mungukashiha mwe mwanangana wa Moabe ni akwa kuyula eswe a mu chifuchi chize.”

Yuda

⁴ Mwene Zambi kanambe ngwenyi: “Atu a mu chifuchi cha Yuda haanavulumuna nawa ni nawa, chamwenemwene mungukaamwesa lamba. Mumu haanalelesa longeso liami, kaafungile ko Shimbi jami. Mazambi a mahuza, waze tushakulu two alingile, haanaapiangula.

⁵ Kashika mungukatuma kahia mu chifuchi cha Yuda, ni kwocha mazuwo akolo mu limbo lia Yerusaleme.”

Zambi kanahisa Israele

⁶ Mwene Zambi kanambe ngwenyi: “Atu a mu chifuchi cha Israele haanavulumuna nawa ni nawa, chamwenemwene mungukaamwesa lamba. Mumu kaakulanjisa akwa ululi waze kaahashile kufweta makongo jo, waze kaahashile kufweta chibwe ndando ya sapato.

⁷ Kaakuliata atu alelu ni yiswale, ni kwahuma. Tata ni mwanenyi wa lunga kaakubomba ni mwana pwo umuwika, kabinji. Chenacho akulelesa jina liami lia chijila.

⁸ Homa heswe ha kuwayila malunga kaakubomba ha mahina aze atambwile yifungo kuli yiswale. Mu zuwo lia Zambi kaakunwa vinyu yize akutambula kuli akwa makongo.

⁹ “Malunga ja mu chifuchi cha Amore kusuhwa cho ngwe mutondo sedru, tachi jo ngwe mutondo shene. Naashihile eswe mumu hali yenu Aisraele.

¹⁰ Chikwo nawa, nanuchijile mu chifuchi cha Egiptu, yingunusongwela mu puya miaka makumi awana, hanga nukahinge chifuchi cha Amore.

¹¹ Natongwele ana jenu amwe a malunga hanga akabwe akwa munanyi, ni amwe hanga akabwe Anazireu. Aisraele, hi chocho ko, nyi? Yami Mwene Zambi nachamba.

¹² Alioze yinunwisa Anazireu vinyu; yinwambila akwa munanyi ngwenu, kanda ahanjika maliji a Zambi.

¹³ Talenu, mungukanushinda hashi, munukateta ngwe chize temba liakulicheka muze linambate mbuto yinji.

¹⁴ Akwa tambu keechi kabwa nawa ni tambu; akwa tachi, tachi jo mujikahwa; chibwe tujita keechi kalilamwina.

¹⁵ Akwa mata a manana keechi kajikiza; akwa tambu keechi kachina; akwa kwendela ha tuvwalu keechi kalilamwina.

¹⁶ Ha tangwa lize chibwe akwa hamu kuhiana maakambila mata jo ni kuchina.” Chenacho anambe Mwene Zambi.