Alevi 9 - Mukanda Wa Zambi 1970

Arone yalambula milambu

¹ Muze matangwa a kukunjika mahako ku milimo yo haahwa, Mose yatambika Arone ni ana jenyi a malunga ni miata ja Aisraele.

² Yambila Arone ngwenyi: “Anda chimbembe wa kuji umuwika ni kuji a panga umuwika, waze keeshi kapalia, waalambule kuli Mwene Zambi, chimbembe mumu ha mulambu wa milonga, ni panga mumu ha mulambu wa kwocha.

³ Mba lweza Aisraele ande kuji a pembe mumu ha mulambu wa mulonga, ni chimbembe ni panga wa mwaka umuwika, waze keeshi kapalia, mumu ha mulambu wa kwocha,

⁴ ni kuji a ngombe ni kuji a panga mumu ha mulambu wa kulivwa ni Zambi. Aalambule kuli Mwene Zambi hamwe ni mulambu wa mbuto wa kuchinga ni maji. Chaatamba kulinga chino mumu Mwene Zambi kumaasolokela musono.”

⁵ Yaaneha yuma yeswe yize Mose ambile ku chikolo cha zuwo lia Zambi lia makubu. Chikungulwila cheswe yaakunguluka ko ni kuwayila Mwene Zambi.

⁶ Mose yaamba ngwenyi: “Mwene Zambi hananwehe Shimbi ha kulinga yino yeswe, hanga uhenya wa pangu lienyi usoloke mukachi kenu.”

⁷ Mba Yambila Arone ngwenyi: “Yako ku chilumbilo, ulambule mulambu wa mulonga ni mulambu wa kwocha ha kuchiza milonga ye ni ya atu. Lambula mulambu uno ha kuchiza milonga ya atu, ngwe chize Mwene Zambi anulwezele.”

⁸ Arone yaya ku chilumbilo, yashiha chimbembe wa kuji, we mulambu wa milonga yenyi mwene.

⁹ Ana jenyi a malunga yaamunehena manyinga, neye yachubika mo munwe wenyi, yakomona amwe manyinga ku mbinga jiwana ja chilumbilo, waze asalile ho yaazujila kushi lia chilumbilo.

¹⁰ Mba yocha ha chilumbilo maji, ni ana asukwa, ni liayi lia mukelenge, yiiwema, ngwe chize Mwene Zambi ambilile Mose.

¹¹ Alioze yifwo ni kubu yayochela haze lia musumba, yiiwema.

¹² Yashiha chimuna cha mulambu wa kwocha wa iye mwene. Ana jenyi a malunga yaamunehena manyinga, neye yaasapwila ha mbango jeswe jiwana ja chilumbilo.

¹³ Yaamwaha mutwe ni yifwo yikwo ya chimuna, yayocha ha chilumbilo, yiiwema.

¹⁴ Yakosa yifwo ya mu jimo ni molu, yayisa helu lia milambu yikwo ha chilumbilo, yayocha, yiiwema.

¹⁵ Mba Arone yalambula milambu ya atu. Yanda pembe wa mulambu wa milonga ya atu, yamushiha, yamulambula, ngwe chize alingile hali iye mwene.

¹⁶ Yaneha nawa chimuna mumu ha mulambu wa kwocha, yamukunjika nikulita ni Shimbi.

¹⁷ Yakunjika mulambu wa mbuto, ni yazomona ho kwoko limuwika lia wunga, yawochela ha chilumbilo. (Mulambu uno yauweza ha mulambu wa chichamene wa tangwa ha tangwa.)

¹⁸ Yashiha nawa chimbembe wa kuji ni kuji a panga; wenawo we mulambu wa kulivwa cha Zambi ni atu. Ana jenyi a malunga yaamunehena manyinga, neye yaasapwila ku mbango jeswe jiwana ja chilumbilo.

¹⁹ Arone yasa yihanda ya maji a chimbembe ni a panga

²⁰ ha mbambo ja ye yimuna, yayineha yeswe ku chilumbilo, yocha e maji ha chilumbilo, yawema,

²¹ yahungisa mabambo ni molu a ku chindume ku meso ja Mwene Zambi, ngwe chize Mose aalwezele.

²² Muze Arone hamanununa kulambula milambu yeswe, yolola moko hali atu, yaawahisa, mba yasunuka.

²³ Mose ni Arone yaanjila mu zuwo lia Zambi. Muze haatuhuka yaawahisa atu. Hohene uhenya wa pangu lia Mwene Zambi yiusoloka kuli atu eswe.

²⁴ Susumuku Mwene Zambi yatuma kahia, yikocha mulambu wa kwocha ni maji ha chilumbilo, yiuwema upu. Ha kuchimona, atu eswe yaakololoka, yaafulamana.