Alevi 8 - Mukanda Wa Zambi 1970

Mose yakunjika Arone ni ana jenyi a malunga alinge milimo ya uhako

¹ Mwene Zambi yambila Mose ngwenyi:

² “Neha Arone ni ana jenyi a malunga ku chikolo cha zuwo lia kuwayila. Neha nawa mahina jo a uhako, ni maji a kuwayisa, ni chimbembe wa kuji a ngombe ha mulambu wa mulonga, ni makuji aali a panga, ni kapaya wa mbolo yize kuyishi yitumbo.

³ Mba muutambika Chikungulwila cheswe hamuwika.”

⁴ Mose yalinga ngwe chize amwambile Mwene Zambi, ni muze Chikungulwila haakunguluka,

⁵ yaalweza ngwenyi: “Yize ngunambe kulinga haliabwila yenayo Mwene Zambi hangulweza.”

⁶ Mba Mose yaneha Arone ni ana jenyi a malunga, yaalweza asane meya.

⁷ Yajika Arone chikuto cha kwola ni chikuto chisuku, ni muya mu zalilo yenyi. Yamujika chikuto chihi ni kuchikasa ni muya wa kutunga ni utotombo mu zalilo yenyi.

⁸ Yamujika chibwiko, yasa mo Urime ni Tumime.

⁹ Yamujika kapusa ha mutwe, yalamika ho chibenya cha oru. Chilayi chize chinalumbunuka ngwo, hamukunjika ku milimo ya uhako, ngwe chize ambile Mwene Zambi.

¹⁰ Mba Mose yanda maji, yawayisa zuwo lia Zambi lia makubu ni yuma yeswe yize yabwile mo. Chenacho ayikunjikile kubwa ya mbala ya Mwene Zambi.

¹¹ Yanda amwe maji, yaasapwila yisuho shimbiali ha chilumbilo ni yikashi yaho, ni ha lumbashila ni ye nganda. Chenacho ayikunjikile kubwa ya mbala ya Mwene Zambi.

¹² Yakunjika Arone ku milimo ya uhako ni kumuzujila maji ha mutwe.

¹³ Mba Mose yaneha ana ja Arone a malunga, yaajika yikuto, ni miya mu zalilo jo, ni yifulu ha mitwe yo, ngwe chize ambile Mwene Zambi.

¹⁴ Hohene Mose yaneha chimbembe cha kuji a ngombe, mumu ha mulambu wa milonga. Mba Arone ni ana jenyi a malunga yaasa moko jo ha mutwe wa ngombe.

¹⁵ Mose yashiha mwe ngombe, yanda amwe manyinga yaakomona ha mbinga jiwana ja chilumbilo ni munwe wenyi. Manyinga waze asalile ho yaahinjila kushi lia chilumbilo. Chenacho achibemesene ni kuchikunjika.

¹⁶ Mose yanda maji eswe a yifwo ya mu jimo, ni liayi lia mukelenge, ni ana asukwa ni maji jo, yeswe yayocha ha chilumbilo, yiweme.

¹⁷ Neye yanda yize yasalile ho, yifwo, ni lambu, ni mijingwa: yayochela haze lia musumba, yiiwema. Yalinga yeswe ngwe chize Mwene Zambi ambile.

¹⁸ Mba Mose yanda kuji a panga mumu ha mulambu wa kwocha, Arone ni ana jenyi a malunga yaasa moko jo ha mutwe wenyi,

¹⁹ mba Mose yamushiha, yasapwila manyinga ku mbango jiwana ja chilumbilo.

^20-21 Yabatwola mwe kuji a panga, yakosa molu ni yifwo ya mu jimo ni meya. Mutwe, ni maji, ni yifwo yikwo yeswe, yayocha ha chilumbilo, yiiwema. Yalinga ngwe chize Mwene Zambi ambile. Mulambu uno wa kwocha yiubwa mulambu wa yakulia, ni lupembo wawo yawahila kuli Mwene Zambi.

²² Mba Mose yanda nawa kuji a panga mukwo, yoze te wakululika ha kukunjika mahako ku milimo yo. Arone ni ana jenyi a malunga yaasa moko jo ha mutwe wenyi.

²³ Mba Mose yamushiha, yanda amwe manyinga, yaakomona Arone ku twitwi lia ku chindume, ni ha munwe wa shina wa ku kwoko lienyi lia chindume, ni wa ku kulu lienyi lia chindume.

²⁴ Mba yaneha ana ja Arone, yaakomona manyinga ha matwi jo a ku chindume, ni ha minwe yo ya shina ya ku chindume, ya ku moko ni ya ku molu. Mose yasapwila manyinga waze asalile ho ku mbango jiwana ja chilumbilo.

²⁵ Yanda maji eswe, ni a ku muchila, ni a ku yifwo ya mu jimo, ni liayi lia mukelenge, ni ana asukwa ni maji jo, ni kulu lia ku chindume.

²⁶ Mba yanda mbolo yimuwika yinene mu kapaya wa mbolo yize kuyishi yitumbo, yize te hakunjika kuli Mwene Zambi, ni mbolo yimuwika yakulinga ni maji, ni mbolo yimuwika yikepe, yayisa ha maji ni ha kulu lia chindume.

²⁷ Yakunjika yakulia yize yeswe mu moko ja Arone ni ana jenyi. No yaayihungisa ku meso ja Mwene Zambi. Kuuli mulambu wa kuhungisa.

²⁸ Mba Mose yatambula yakulia yize, yayocha ha chilumbilo, helu lia mulambu wa kwocha, yiiwema. Kuuli mulambu wa kukunjika mahako ku milimo yo, yiubwa mulambu wa yakulia; lupembo wawo yawahila kuli Mwene Zambi.

²⁹ Mba Mose yanda bambo, chitundo chenyi cha mulambu, yalihungisa ku meso ja Mwene Zambi. Kuuli mulambu wa kuhungisa. Mose yalinga yuma yeswe ngwe chize ambile Mwene Zambi.

³⁰ Mose yanda amwe maji a kuwayisa ni amwe manyinga waze abwile ha chilumbilo, yaasapwila hali Arone ni hali ana jenyi ni ha mahina jo. Chenacho aakunjikile ni e mahina jo ku milimo ya Mwene Zambi.

³¹ Mose yambila Arone ni ana jenyi a malunga ngwenyi: “Nehenu yifwo ku chikolo cha zuwo lia Zambi, yitelekelenu kwenako ni kuyilia hamwe ni mbolo yize yili mu kapaya wa ye milambu, ngwe chize Mwene Zambi ambile.

³² Yifwo ni mbolo yize muyisala ho, nuyocha ha kahia.

³³ Kanda nukakatuka ku chikolo cha zuwo lia Zambi ha matangwa shimbiali, ndoo muze matangwa jenu a kunukunjika ku milimo yino hamanunuka.

³⁴ Mwene Zambi mwe watwambile ha kulinga chino twalinga musono, ha kuchiza milonga yenu.

³⁵ Chanutamba kutwama ku chikolo cha zuwo lia Zambi matangwa shimbiali, nikulinga chize Mwene Zambi ambile. Nyi ka, munufwa. Chenacho Mwene Zambi angulwezele.”

³⁶ Chenacho Arone ni ana jenyi alingile yuma yeswe yize Mwene Zambi ambilile Mose.