Alevi 7 - Mukanda Wa Zambi 1970

Shimbi ja milambu ya kuhilwisa ni kuwezela

¹ Jino je Shimbi ja milambu ya kuhilwisa ni kuwezela. Yili ya chijila kuhiana.

² Chimuna cha mulambu uno akachishihila ku sali lia norde lia chilumbilo, kuze akushihila yimuna ya milambu ya kwocha, akasapwila manyinga jenyi ku mbango jeswe jiwana ja chilumbilo.

³ Akachiza maji jenyi eswe ni kwalambula ha chilumbilo: maji a ku muchila, ni a ku yifwo ya mu jimo,

⁴ ni ana asukwa ni e maji jo, ni liayi lia mukelenge.

⁵ Hako akocha maji eswe ha chilumbilo, aweme. Kuuli mulambu wa yakulia kuli Mwene Zambi, wa kuhilwisa ni kuwezela.

⁶ Lunga mweswe wa ku vungu lia mahako mahasa kuulia, alioze chatamba kuulila muma mwa chijila, mumu kuuli wa chijila kuhiana.

⁷ Shimbi yimuwika yiliko hakutwala ku mulambu wa milonga ni mulambu wa kuhilwisa ni kuwezela, yenayi ayi: yifwo yili ya mbala ya hako yoze makaulambula.

⁸ Lambu lia chimuna chize makalambula mulambu wa kwocha, lili lia mbala lia hako yoze makaulambula.

⁹ Mulambu weswe wa mbuto uze hoocha ha jiko, hanji ha chikango, hanji mu ndeho, uli wa mbala wa hako yoze makaulambula kuli Zambi.

¹⁰ Alioze mulambu weswe wa mbuto yumu, hanji wa kuchinga ni maji, uze koochele ko, uli wa mbala wa ana ja Arone a malunga, eswe chatamba kuuteta, ngwe chize chinalite.

Milambu ya kulivwa cha Zambi ni atu

¹¹ Shimbi ja milambu ya kulivwa, yize akulambula kuli Mwene Zambi, yino.

¹² Nyi mutu makalambula mulambu uno ha kusakwilila Zambi, akalambula chimuna hamwe ni mbolo yize kuyishi yitumbo. Mbolo yize yikabwa yinene, yakulinga ni wunga wa kuchinga ni maji a olive, hanji mbolo yikepe, yakakwita maji a olive, hanji mbolo yikepe yakulinga ni wunga ha kuchinga ni maji a olive.

¹³ Akalambula nawa mbolo yakwocha, yize kuyishi yitumbo.

¹⁴ Akalambula Chihanda chimuwika cha mbolo ni mbolo chawana kuli Mwene Zambi. Yili ya mbala ya hako yoze manda manyinga a chimuna ni kwasapwila ku sali lia chilumbilo.

¹⁵ Yifwo ya che chimuna chatamba kuyilia ha tangwa lia kulambula mulambu. Niyimwe kanda yikasala ndoo chichamene.

¹⁶ Nyi mutu makaneha mulambu wa kulivwa ni Zambi ha kumanununa chimwe chilakenyo hanji mulambu wa kuzanga chenyi, hi Chuma ko nyi kuyahwile kulia ha tangwa lize ayilambula, alioze yize yasala mahasa kuyilia chibwe hamene.

¹⁷ Nyi yimwe yifwo yasala ho ndoo ha tangwa lia muchitatu, chatamba kuyocha upu.

¹⁸ Nyi mutu makalia yimwe yifwo ha tangwa lia muchitatu, Zambi kechi kutambula mulambu uze, kechi kawalula ngwe Chuma, alioze muukabwa wa luchisa. Mutu yoze makaulia makamona lamba.

¹⁹ Nyi yifwo yakwata ku chimwe Chuma cha luchisa, kuchatambile kuyilia, shina kuyocha, yiweme. Mutu mweswe wa chijila mahasa kulia yifwo ya mulambu uno.

²⁰ Alioze nyi mukwa luchisa makayilia, keechi kamwalula nawa mukachi ka atu ja Zambi.

²¹ Nawa, nyi umwe makalia yifwo ya mulambu uze, muze hakwata kulu ku Chuma cha luchisa, chibwe cha mutu hanji cha chimuna, keechi kamwalula nawa mukachi ka atu ja Zambi.

²² Mwene Zambi yalongesa Mose Shimbi jikwo jino

²³ mumu hali Aisraele. Kanda nukalia maji a ngombe, hanji a panga, hanji a pembe.

²⁴ Maji a kashitu yoze walifwila, hanji wamukoka, kuchatambile kwalia, alioze nukalinga no cheswacho munuzanga.

²⁵ Mweswawo makalia maji a chimuna chize maahasa kulambula kuli Mwene Zambi ngwe milambu ya yakulia, keechi kamwalula nawa mukachi ka atu ja Zambi.

²⁶ Aisraele, kweswako maakatwama, kanda akalia manyinga a tujila hanji a tushitu.

²⁷ Mweswawo makakolema Shimbi yino, keechi kamwalula nawa mukachi ka atu ja Zambi.

²⁸ Mwene Zambi yalongesa Mose Shimbi jikwo jino

²⁹ mumu hali Aisraele. Mweswawo makalambula mulambu wa kulivwa ni Zambi, chamutamba kuneha Chihanda chawo chawana kuli Mwene Zambi.

³⁰ Akachineha iye mwene ngwe mulambu wa yakulia. Akaneha maji a chimuna hamwe ni lie bambo, ni kuyihungisa ku meso ja Mwene Zambi. Kuuli mulambu wa kuhungisa.

³¹ Hako akocha maji a chilumbilo, alioze bambo mulikabwa lia mbala lia mahako.

³² Kulu lia ku chindume likabwa chawana

³³ cha hako yoze makalambula e manyinga ni maji a mulambu wa kulivwa ni Zambi.

³⁴ Bambo lia che chimuna ni kulu lia ku chindume yili yawana yize Mwene Zambi hanachiza kuli Aisraele ni kuyihana kuli mahako. Chino che Chihanda cha mulambu chize Aisraele chaatamba kuhana kuli mahako ndoo ku miaka yeswe.

³⁵ Chili Chihanda cha yakulia yize Aisraele alambwile kuli Mwene Zambi ni ahanyine kuli Arone ni ana jenyi a malunga ha tangwa lize aakunjikile ku milimo yo ya uhako.

³⁶ Ha tangwa lizeliene Mwene Zambi yambila Aisraele ha kwaaha Chihanda chino cha mulambu. Yili Shimbi yize Aisraele chaatamba kufunga ndoo ku miaka yeswe.

³⁷ Jino jili Shimbi ja milambu ya kwocha, ni ya mbuto, ni ya milonga, ni ya kuhilwisa ni kuwezela, ni ya kukunjika uhako, ni ya kulivwa ni Zambi.

³⁸ Haze ha mulundu wa Sinai, mu puya, Mwene Zambi yamwaha Mose Shimbi jino ha tangwa lize ahanjikile ni Aisraele ha kulambula milambu yo.