Alevi 6 - Mukanda Wa Zambi 1970

¹ Zambi yalongesa Mose Shimbi jino.

² Nyi mutu havulumuna Mwene Zambi, halituna kuhilwisa chifungo kuli mwenyembo wenyi, hanji kumwiya Chuma, hanji kumwiya ni mana,

³ hanji hawana Chuma chize chatokele, ni kulishinga ni Shingo lia mahuza ngwenyi, kachimwene, nyi halinga yuma yino chamutamba kulambula mulambu.

^4-5 Muze umwe mutu havulumuna hakutwala ku yuma yino, akahilwisa Chuma chize hanatambula ni uhenge. Ha tangwa lize haamukwata chamutamba kuhilwisa yuma yeswe kuli mwenyayo, ni kuweza ho Chihanda chimuwika cha ku yihanda yitano.

⁶ Akaneha mulambu wa kuji a panga hanji pembe, yoze keshi kapalia, kuli hako. Kuuli mulambu wa kuhilwisa ni kuwezela kuli Mwene Zambi. Maakalulika ndando ya che chimuna nikulita ni lumbongo yoze eswe akutayiza.

⁷ Hako makalambula mulambu ha mulonga wa mutu yoze, mba Zambi makamukonekena.

Milambu ya kwocha

⁸ Mwene Zambi yambila Mose

⁹ ha kumwaha Arone ni ana jenyi a malunga Shimbi jino ja mulambu wa kwocha. Akahichika mulambu wa kwocha ha chilumbilo ufuku weswe, akafunga nawa kahia.

¹⁰ Hako akazala chikuto chisuku chalefuna ni kaputula mutoma walefuna, akakomba uto ha chilumbilo, akausa ku sali lia chilumbilo.

¹¹ Mba akazale mahina eka hanga akatwale uto ni kuumwangina haze lia musumba kuma kubema.

¹² Kahia ka ha chilumbilo kalekwoka lume, kujima ka. Hako chatamba kukasosela ha chichamene cheswe, akasa ho mulambu wa kwocha, ni kwocha ho maji a mulambu wa kulivwa ni Zambi.

¹³ Kahia ka ha chilumbilo kalekwoka lume, kujima ka.

Milambu ya mbuto

¹⁴ Shimbi ja milambu ya mbuto jino. Umwe hako, mwana wa Arone wa lunga, akakunjika mulambu wa mbuto kuli Mwene Zambi kulutwe lia chilumbilo.

¹⁵ Akazomona ho kwoko lia wunga, ni maji, ni yuma ya vumba libema, ni kuyocha ha chilumbilo, yikaweme. Chili chinyingi cha kulweza ngwo, milambu yeswe hayilambula kuli Mwene Zambi. Lupembo wa mulambu uno makawahila kuli Mwene Zambi.

^16-17 Mahako akalia yize yasala ho. Akalinga mbolo ni wunga uze kuushi yitumbo ni kuyilila muma mwa chijila, mu chipanga cha zuwo lia Zambi lia makubu. Mwene Zambi hanayihana kuli mahako kubwa Chihanda cho cha mulambu wa yakulia. Yili ya chijila kuhiana, ngwe mulambu wa mulonga ni mulambu wa kuhilwisa ni kuwezela.

¹⁸ Malunga a ku vungu lia Arone maahasa kuyilia, mumu yili Chihanda cho ku miaka yeswe cha mulambu wa kwocha kuli Mwene Zambi. Mweswawo makakwata mulambu wa yakulia makabwa mukwa chijila.

¹⁹ Mwene Zambi yamwaha Mose Shimbi jino

²⁰ ha kujilika mahako a ku vungu lia Arone. Ha tangwa lize makajilika hako, mwe hako akalambula kuli Mwene Zambi kilo yimuwika ya wunga, Chipinji ha chichamene, chikwo ha chingoloshi, (Chipinji chimuwika ni mulambu wa mbuto wa tangwa ha tangwa).

²¹ Chatamba kuuchinga ni maji, ni kuyocha ha jiko, mba makayibalwola ni kuyilambula mulambu wa mbuto. Kuuli lupembo yoze wakuwahila kuli Mwene Zambi.

²² Ku vungu lia Arone, mweswawo makabwa mwata wa mahako, chatamba kulambula mulambu uno ku miaka yeswe. Chatamba kuwocha weswe upu. Kuuli mulambu wa Mwene Zambi.

²³ Chihanda nichimwe cha mulambu wa mbuto uze analambula hako, kanda achilia. Chatamba kuwocha weswe upu.

Milambu ya milonga

²⁴ Mwene Zambi yambila Mose

²⁵ alweze Arone ni ana jenyi a malunga Shimbi ja milambu ya milonga. Chimuna cha mulambu wa milonga akachishihila ku sali lia chilumbilo lia ku norde, kuze akushihila yimuna ya milambu ya kwocha. Uno uli mulambu wa chijila kuhiana.

²⁶ Hako yoze maulambula yifwo akayilila muma mwa chijila, mu chipanga cha zuwo lia Zambi lia makubu.

²⁷ Mweswawo makasunga ku yifwo ya che chimuna makabwa mukwa chijila, ni cheswacho muchikasunga ku yifwo ya che chimuna muchikabwa cha chijila. Nyi manyinga a chimuna chize asapukila ku limwe hina, chatamba kulikosela muma mwa chijila.

²⁸ Yifwo, nyi ayiteleka mu ndeho (yimbia) ya uma, chatamba kushiha ye ndeho, nyi ngwe mu ndeho ya utali, chatamba kuyicheka ni kuyikosa ni meya.

²⁹ Lunga mweswe wa ku vungu lia mahako mahasa kulia mulambu uze. Kuuli wa chijila kuhiana.

³⁰ Alioze, nyi hako hatwala amwe manyinga mu zuwo lia Zambi, ni kulinga no hakuchiza mulonga, chimuna chize kuchatambile kuchilia, shina kuchocha, chikaweme.