Alevi 5 - Mukanda Wa Zambi 1970

Yitela yize chatamba kulambwila milambu ya milonga

¹ Atu chaatamba kulambula milambu ya milonga ha yitela yino. Nyi umwe mutu hamushingisa ku chisopelo ha Chuma chize hamona hanji hevwa, nyi malituna kuchilumbununa, amumwesa lamba.

² Nyi umwe mutu hakwata Chuma cha luchisa, ngwe kashitu wa kulifwila, te kachinyingikine, muze hachinyingika mabwa mukwa luchisa, kumahia.

³ Nyi umwe mutu hakwata Chuma cha luchisa ku mujimba wa mutu, te kachinyingikine, muze hachinyingika kumahia.

⁴ Nyi umwe mutu halishinga nikawashi, ha cheswe chikuma, te kachinyongene ngwe Chuma, muze hachinyingika kumahia.

⁵ Muze mutu hahia, chamutamba kushikisa mulonga wenyi

⁶ ni kuneha mulambu kuli Mwene Zambi. Ukabwa wa chihwo cha panga hanji pembe. Mba hako akalambule we mulambu ha mulonga wa mutu yoze.

⁷ Nyi mutu keshi panga hanji pembe, akakunjika kuli Mwene Zambi tutele aali hanji ana a membe aali, umuwika wa mulambu wa milonga, mukwo wa mulambu wa kwocha.

⁸ Akaaneha kuli hako. Mwenawo makalambula kajila umuwika wa mulambu wa milonga. Makamuhonda mukonga, alioze kumutukula mutwe ka.

⁹ Makasapwila manyinga jenyi ku sali lia chilumbilo. Waze maakasala ho makamwangina kushi lia chilumbilo. Uno uli mulambu wa kuchiza milonga.

¹⁰ Mba kajila wa muchaali akamulambule mulambu wa kwocha, nikulita ni Shimbi. Chenacho hako chatamba kulambula mulambu wa mulonga wa mutu yoze, mba Zambi makamukonekena.

¹¹ Nyi mutu keshi ni tutele aali hanji membe aali, akaneha kwenyi kilo limuwika lia wunga wa mulambu wa milonga. Kanda akasa ho maji a olive chibwe yuma ya vumba libema, mumu kuuli mulambu wa milonga, hi wa mbuto ko.

¹² Akauneha kuli hako, hanga akazomone ho kwoko lia wunga, hanga ukabwe chiwulwiso ngwo, haulambula kuli Mwene Zambi. Mwe hako makawocha ha chilumbilo, ukaweme. Kuuli mulambu wa yakulia wa kuchiza nawa milonga.

¹³ Chenacho hako chatamba kulambula mulambu wa mulonga wa mutu yoze, mba Zambi makamukonekena. Wunga uze muukasala ho, wa mbala wa hako, ngwe wunga uze wa mulambu wa mbuto.

Milambu ya kuhilwisa ni kuwezela

¹⁴ Mwene Zambi yalongesa Mose Shimbi jino.

¹⁵ Nyi umwe mutu havulumuna ha kuhona kulambula yuma yimwe ya chijila, akanehena Mwene Zambi mulambu wa kuhilwisa ni kuwezela, kuji a panga hanji pembe yoze keshi kapalia. Atu maakalulika ndando ya che chimuna nikulita ni lumbongo yoze eswe akutayiza.

¹⁶ Chamutamba kuhana mulambu uze kalambwile ko, ni kuwezela ho Chihanda chimuwika ku yihanda yitano. Akajihana kuli hako, ni hako makakunjika chimuna cha mulambu wa mulonga wa mutu yoze, mba Zambi makamukonekena.

¹⁷ Nyi umwe mutu havulumuna Mwene Zambi mulonga uze te kaunyigikine, hindu kanahi, chamutamba kufweta.

¹⁸ Chamutamba kuneha kuli hako mulambu wa kuhilwisa ni kuwezela, kuji a panga hanji pembe yoze keshi kapalia. Atu maakalulika ndando ya che chimuna nikulita ni lumbongo yoze eswe akutayiza. Hako akalambula mulambu wa mulonga wa mutu yoze, mba Zambi makamukonekena.

¹⁹ Kuuli mulambu wa kuhilwisa ni kuwezela mumu ha mulonga uze mutu hanavulumuna Mwene Zambi.