Alevi 4 - Mukanda Wa Zambi 1970

Milambu ya milonga yize te kaazangile kuvulumuna

¹ Mwene Zambi yambila Mose ngwenyi:

² “Nyi umwe Kaisraele havulumuna, hakolema yimwe Shimbi ya Zambi, te kachinyingikine, chamutamba kufunga Shimbi jino.”

³ Nyi mwe mwata wa mahako ja Zambi havulumuna nikuneha chitela hali atu, chamutamba kuneha chimbembe wa kuji a ngombe, yoze keshi kapalia, ni kumulambula kuli Mwene Zambi ha mulonga wenyi.

⁴ Akamuneha ku chikolo cha zuwo lia Zambi lia makubu, akasa kwoko lienyi ha mutwe wa mwe ngombe ni kumushiha ku meso ja Mwene Zambi.

⁵ Mwata wa mahako akanda manyinga a kuji a ngombe, akaatwala mu zuwo lia Zambi,

⁶ akachubika munwe mu manyinga ni kwaasapwila kulutwe lia chikalakala cha chijila yisuho shimbiali.

⁷ Mba akakomone manyinga ha mbinga ja ha chilumbilo cha kwochela yuma ya vumba libema, mu zuwo lia Zambi. Manyinga waze maakasala ho, akazujila mu chenga kushi lia chilumbilo cha kwochela milambu, chize chili ku chikolo cha zuwo.

⁸ Akachiza maji eswe a kuji a ngombe yono, ni a yifwo ya mu jimo,

⁹ ni ana asukwa ni maji jo, ni liayi lia mukelenge.

¹⁰ Hako akanda e maji akooche ha chilumbilo cha kwochela milambu, akaweme, ngwe chize akulinga ni chimuna cha mulambu wa kulivwa ni Zambi.

¹¹ Alioze akanda kubu lia che chimuna, ni yifwo yeswe, ni mutwe, ni molu, ni yifwo yeswe ya mu jimo, ni ufwachi,

¹² yeswe kuyitwala haze lia musumba ku chichichila cha uto, kwenako makayochela ha kahia, yikaweme.

¹³ Nyi ngwe Chikungulwila cheswe cha Aisraele, havulumuna haakolema Shimbi ya Mwene Zambi, te kaachinyingikine,

¹⁴ mba nyi we mulonga haaunyingika, Chikungulwila akanda chimbembe wa kuji, akamulambula mulambu wa mulonga wo akauneha ku zuwo lia Zambi.

¹⁵ Makulwana ja Chikungulwila akasa moko jo ha mutwe wa ngombe, ni kumushiha.

¹⁶ Mba mwata wa mahako akanehe amwe manyinga mu zuwo lia Zambi,

¹⁷ akaachubika munwe, ni kwasapwila kulutwe lia chikalakala yisuho shimbiali.

¹⁸ Mba akakomone manyinga ha mbinga ja ha chilumbilo cha kwochela yuma ya vumba libema, mu zuwo lia Zambi. Manyinga waze maakasala ho, akazujila kushi lia chilumbilo cha kwochela milambu, chize chili ku chikolo cha zuwo.

¹⁹ Mba akande maji eswe ni kwoocha ha chilumbilo, akaweme.

²⁰ Akalinga ni kuji a ngombe yono ngwe chize akulinga ni yoze akulambula ha mulambu wa milonga. Akalinga Chenacho ni milambu ya milonga ya atu, mba Zambi makaakonekena yo.

²¹ Mba akatwale mwe kuji a ngombe haze lia musumba ni kumwocha, akaweme, ngwe chize akwocha kuji a ngombe yoze wa ha mulonga wenyi mwene. Mulambu uno muukachiza mulonga wa Chikungulwila.

²² Nyi mukwa kuyula hakolema Shimbi ja Mwene Zambi, te kachinyingikine,

²³ mba haamulweza we mulonga, mwe mukwa kuyula akaneha mulambu wa kuji a pembe yoze keshi kapalia ha kumulambula.

²⁴ Akasa kwoko lienyi ha mutwe wa pembe, akamushihila ku chilumbilo ku sali lia ku norde, kuze akushihila yimuna ya milambu ya kwocha. Mulambu uno muukachiza mulonga wenyi.

²⁵ Hako akachubika munwe mu manyinga ni kwakomona ha mbinga ja ha chilumbilo. Manyinga waze maakasala ho, akazujila kushi lia chilumbilo.

²⁶ Mba akoche maji eswe ha chilumbilo, ngwe chize akulinga ni yimuna ya milambu ya kulivwa ni Zambi. Chenacho hako chatamba kulambula mulambu wa mulonga wa mukwa kuyula, mba Zambi makamukonekena.

²⁷ Nyi mweswe mutu hakolema Shimbi ja Mwene Zambi, te kachinyingikine,

²⁸ mba haamulweza we mulonga, akaneha chihwo cha pembe yoze keshi kapalia, ha kumulambula.

²⁹ Akasa kwoko lienyi ha mutwe wa pembe ni kumushihila ku chilumbilo ku sali lia ku norde, kuze maashihila yimuna ya milambu ya kwocha.

³⁰ Hako akachubika munwe mu manyinga, ni kwakomona ha mbinga ja ha chilumbilo. Manyinga waze maakasala ho, akaazujila kushi lia chilumbilo.

³¹ Mba akachize maji eswe, ngwe chize machiza maji a yimuna ya milambu ya kulivwa ni Zambi, ni kwoocha ha chilumbilo, akaweme. Mba lupembo makawahila kuli Mwene Zambi. Chenacho hako chatamba kulambula mulambu wa mulonga wa mutu yoze, mba Zambi makamukonekena.

³² Nyi mutu makaneha mwana panga wa mulambu wa milonga, akabwa chihwo yoze keshi kapalia.

³³ Akasa kwoko lienyi ha mutwe wa panga ni kumushihila ku chilumbilo ku sali lia ku norde, kuze akushihila yimuna ya milambu ya kwocha.

³⁴ Hako akachubika munwe mu manyinga ni kwakomona ha mbinga ja ha chilumbilo. Manyinga waze maakasala ho, akazujila kushi lia chilumbilo.

³⁵ Mba akamuchize maji eswe ngwe chize akuchiza maji a mwana panga wa milambu ya kulivwa ni Zambi, ni kwoochela ha chilumbilo, akaweme, hamwe ni milambu ya yakulia yize akuhana kuli Mwene Zambi. Chenacho hako chatamba kulambula mulambu wa mulonga wa mutu yoze, mba Zambi makamukonekena.