Alevi 3 - Mukanda Wa Zambi 1970

¹ Muze umwe makalambula ngombe wa mulambu wa kulivwa ni Zambi, akabwa kuji hanji chihwo yoze keshi kapalia.

² Mutu akasa kwoko lienyi ha mutwe wa mwe ngombe, akamushihila ku chikolo cha zuwo lia Zambi lia makubu. Mahako makasapwila manyinga ku mbango jeswe jiwana ja chilumbilo.

³ Maakakunjika kuli Mwene Zambi maji eswe a ku yifwo ya mu jimo,

⁴ ni ana asukwa ni e maji jo, ni liayi lia mukelenge.

⁵ Mahako akayocha ha chilumbilo hamwe ni mulambu wa kwocha, yikaweme. Lupembo wa mulambu uno wa yakulia kakuwahila kuli Mwene Zambi.

⁶ Nyi mulambu wa kulivwa ni Zambi muukabwa wa panga hanji wa pembe, akabwa kuji hanji chihwo, alioze yoze keshi kapalia.

⁷ Nyi ngwe umwe makalambula mwana panga,

⁸ chamutamba kusa kwoko lienyi ha mutwe wa mwe panga ni kumushihila kulutwe lia zuwo lia Zambi. Mahako akasapwila manyinga ku mbango jeswe jiwana ja chilumbilo.

⁹ Akakunjika yifwo yino kuli Mwene Zambi: maji, ni muchila ndoo ku mutanda ni maji jawo, ni maji eswe a ku yifwo ya mu jimo,

¹⁰ ni ana asukwa ni maji jo, ni liayi lia mukelenge.

¹¹ Hako akayocha yeswe ha chilumbilo, yikaweme. Kuuli mulambu wa yakulia wa Mwene Zambi.

¹² Nyi mutu makalambula pembe,

¹³ akasa kwoko lienyi ha mutwe wa mwe pembe, ni kumushihila kulutwe lia zuwo lia Zambi lia makubu. Mahako akasapwila manyinga ku mbango jeswe jiwana ja chilumbilo.

¹⁴ Yifwo yino akayilambula mulambu wa yakulia kuli Mwene Zambi: maji eswe a yifwo ya mu jimo,

¹⁵ ni ana asukwa ni maji jo, ni liayi lia mukelenge.

¹⁶ Hako akocha yino yeswe ha chilumbilo, yikaweme. Kuuli mulambu wa yakulia uze unawahila kuli Mwene Zambi. Maji eswe a mbala a Mwene Zambi.

¹⁷ Kaisraele niumwe kuchatambile kulia maji hanji manyinga. Shimbi yino Aisraele chaatamba kufunga matangwa eswe, kweswako anatwama.