Alevi 27 - Mukanda Wa Zambi 1970

Shimbi hakutwala ku yawana yize atu maalambula Mwene Zambi

¹ Mwene Zambi yamwaha Mose

² Shimbi jino mumu hali Aisraele. Nyi ngwe umwe mutu hamukunjika kuli Mwene Zambi ha kumanununa chimwe chilakenyo, mutu yoze makahasa kutusuka ha kulambula mbongo jino,

^3-7 nikulita ni ndando yize atu eswe akutayiza: — lunga wa miaka makumi aali ndoo ku makumi asambano makahana mbongo ja prata 50 — pwo mukulwana makahana mbongo ja prata 30 — mwana wa lunga wa miaka yitano ndoo ku makumi aali makahana mbongo ja prata 20 — mwana wa pwo makahana mbongo ja prata 10 — mwana wa lunga yoze kanda abwa ni miaka yitano makahana mbongo ja prata 5 — mwana wa pwo makahana mbongo ja prata 3 — lunga yoze hahiana miaka makumi asambano makahana mbongo ja prata 15 — pwo yoze hahiana miaka makumi asambano makahana mbongo ja prata 10

⁸ Nyi mutu kali chiswale, kahashile kufweta ndando yize, akamutwala kuli hako, mba mwe hako mamusela ndando yize mahasa kufweta.

⁹ Nyi mutu halakenya kulambula chimuna chibema kuli Zambi, chimuna chize muchibwa cha chijila.

¹⁰ Yoa hachilakenya kahashile kuchisumbakenya ni chimuna cheka. Nyi machilinga yimuna yeswe yaali yili ya mbala ya Mwene Zambi.

¹¹ Alioze nyi chimuna chize halakenya kuchatelele kulambula kuli Mwene Zambi, atwale che chimuna kuli hako.

¹² Hako machita ndando nikulita ni ubeme hanji ubi wenyi. Ndando yize kuyichi kwalumuka.

¹³ Nyi ngwe mutu mazanga kuchikula, chamutamba kuwezela ho Chihanda cha muchitano cha ndando.

¹⁴ Nyi umwe mutu makajilila zuwo lienyi kuli Mwene Zambi, hako masela ndando nikulita ni ubeme hanji ubi walio. Ndando yize kuyichi kwalumuka,

¹⁵ Nyi mwe mukwa zuwo mazanga kulikala, chamutamba kuwezela ho Chihanda cha muchitano cha ndando.

¹⁶ Nyi umwe mutu makajilila Chihanda cha munda wenyi kuli Mwene Zambi, maauta ndando nikulita ni mbuto jize maahasa kutumba mo, nikulita ni mbongo kumi ja prata ha kilo makumi aali a mbuto.

¹⁷ Nyi makajilila munda wenyi ha Mwaka wa Kuhilwisa, ndando yeswe yizeyene atele kulu.

¹⁸ Alioze nyi makajilila munda wenyi muze Mwaka wa Kuhilwisa hiwabalika kulu, hako akalia ndando nikulita ni miaka yize yasala ko ndoo ku Mwaka wa Kuhilwisa wa kulutwe.

¹⁹ Nyi mutu yoze wajililile we munda mazanga kuukula, chamutamba kuwezela Chihanda cha muchitano cha ndando.

²⁰ Alioze nyi haulanjisa kuli mutu mukwo, kahashile kuukula nawa,

²¹ Ha Mwaka wa Kuhilwisa wa kulutwe, we munda muukabwa wa mbala wa Mwene Zambi, wa mahako.

²² Nyi umwe mutu makajilila kuli Mwene Zambi munda uze halanda,

²³ hako alule ndando yawo nikulita ni miaka yize yasala ndoo ku Mwaka wa Kuhilwisa. Mutu yoze chatamba kufweta tangwa lizeliene ndando yize hasa. Je mbongo jili ja mbala ja Mwene Zambi.

²⁴ Ha Mwaka wa Kuhilwisa we munda muukabwa wa mwenyawo hanji wa akwa vungu lienyi.

²⁵ Ndando yeswe chanutamba kuta nikulita ni ndando yize atu eswe akuhana.

²⁶ Chimuna cheswe chitangu kusemuka chili kulu cha mbala cha Mwene Zambi. Kashika mutu niumwe mahasa kuchilambula mulambu wa kuzanga chenyi mwene. Mwana ngombe ni mwana panga ni mwana pembe kaali a mbala a Mwene Zambi.

²⁷ Alioze mwana mutangu mweswe wa chimuna cha luchisa, mutu mahasa kumukula ni ndando yize asele, ni kuwezela ho Chihanda cha muchitano cha ndando. Alioze nyi kamukulile, mahasa kumulanjisa ni ndando yize asele.

²⁸ Niumwe mahasa kulanjisa hanji kukula chize hanajilila liakulu kuli Mwene Zambi, chibwe mutu, chibwe chimuna, hanji munda. Yeswe yili ya chijila, ya mbala ya Mwene Zambi, ndoo ku miaka yeswe.

²⁹ Chibwe mutu, nyi hamujilika liakulu kuli Mwene Zambi, niumwe mahasa kumukula. Chatamba kumushiha.

³⁰ Chihanda cha muchikumi cha mihuko yeswe ya mu munda, chibwe mbuto, chili cha mbala cha Mwene Zambi.

³¹ Nyi umwe mutu mazanga kukula yimwe mbuto, chamutamba kuhana ndando yize asele, ni kuwezela ho Chihanda cha muchitano.

³² Chimuna chimuwika cha ku yimuna kumi chili cha mbala cha Mwene Zambi. Nyi yimuna haayalula, cha muchikumi cheswe cha mbala cha Mwene Zambi.

³³ Mwenyayo kanda asakula abema hanji abi, chibwe kwasumbakenya ka. Nyi ngwe masumbakenya chimuna ni chikwo, yimuna yeswe yaali muyibwa ya mbala ya Mwene Zambi, kahashile kuyikula.

³⁴ Jino jili Shimbi jize Mwene Zambi ahanyine kuli Mose, ha mulundu wa Sinai, mumu hali Aisraele.