Alevi 26 - Mukanda Wa Zambi 1970

Yiwape mumu ha kwononoka

¹ Mwene Zambi yamba ngwenyi: “Kanda nulilingila mahamba hanji kumika chimwe Chuma cha kwola, chibwe liwe lia kusonga, hanji mawe autotombo, ha kwakombelela. Muma yami nguli Mwene Zambi, Zambi yenu.

² Lingenu yiwanyino yami, lemesenu zuwo liami lia kunguwayila. Yami nguli, Mwene Zambi.

³ “Nyi munwenda nikulita ni yiyulo yami ni kufunga Shimbi jami,

⁴ mba mungukanwaha vula ha mwaka wenyi, hanga mu chifuchi mukeme mbuto ni mihuko yinji.

⁵ Munukabwa ni mbuto yinji. Munukazungula mbuto ndoo ku mwaka wa kuhela vinyu. Munukahela vinyu ndoo ku mwaka wa kubatula mbuto. Munukabwa ni yeswe yize nunazange ha kulia, munukabwa ni uhwimino mu chifuchi chenu.

⁶ “Mungukanwaha uhwimino mu chifuchi chenu, munukabwa nikubomba kanawa, niumwe kechi kanuvwisa woma. Mungukachiza tushitu a asasu mu chifuchi. Kukuchi kabwa jita niyimwe.

⁷ Munukakumba akwa kole jenu.

⁸ Atano a kuli yenu maakakumba kulakaji, ni kulakaji maakakumba kanunu

⁹ Mungukanuwahisa ni ana anji, mungukafunga Usendo wami uze nakolesele ni yenu.

¹⁰ Mbuto yenu muyikabwa yinji, muyikatwama ndoo ku songo lia mwaka. Munukambila yize yikulu hanga nukasweke yaha.

¹¹ Munukabwa mukachi kenu mu zuwo liami lia chijila. Chichi kanwehuka nichimwe ku miaka yeswe.

¹² Mungukabwa hamwe ni yenu, Mungukabwa Zambi yenu, ni yenu munukabwa atu jami.

¹³ Yami Mwene Zambi, Zambi yenu, nanutuhwishile mu chifuchi cha Egiptu hanga kunuchi kabwa nawa ndungo. Nashihile akwa tachi waze anuhetamishine, yingunwendesa ni kwoloka.”

Lamba mumu ha uhulia

¹⁴ Mwene Zambi yamba ngwenyi: “Nyi kunwafungile Shimbi jami, mungukanumwesa lamba.

¹⁵ Nyi nwalituna Shimbi jami ni yiyulo yami, nikushiha Usendo uze nakolesele ni yenu,

¹⁶ mungukanumwesa lamba. Mungukanuvwisa mwongo ni kunukokela misongo yize kuyishi kuhwa, ni kachiki yoze wakupupuchisa meso ni kuhongesa mwono wenu. Munukakuwa mbuto yenu, alioze kunuchi kayilia nichimwe, mumu akwa kole jenu maakanukumba, maakalia yize hiyatatuka.

¹⁷ Mungukalimika ni yenu, hanga akwa kole jenu akanukumbe, akanuyule. Munukevwa mwongo, munukalichinyina yenwene.

¹⁸ “Chibwe mungunumwesa lamba ngwe lize, hindu kunuchi kungwononokena, mungukanumwesa lamba yisuho shimbiali.

¹⁹ Mungukasulisa kulengumuka chenu. Vula kechi kanoka, ni chifuchi chenu muchikoma chau ngwe utale.

²⁰ Kuhondangana chenu muchikabwa chamokomoko, mumu chifuchi chenu kuchichi kema mbuto ni mihuko.

²¹ “Hindu, nyi nwalimika lume ni yami, ni kulituna kungwononokena, mungukanumwesa lamba yisuho shimbiali.

²² Mungukanutumina tushitu ayilianyi mukachi kenu, hanga akashihe ana jenu, ni kwonona yimuna yenu. Atu akepe maakasala waze maakenda mu majila jenu.

²³ “Hindu, nyi kunwanguvwile, nwalimika lume ni yami,

²⁴ mungukalimika ni yenu ni kunumwesa nawa lamba yisuho shimbiali.

²⁵ Mungukanutumina jita ni kunumwesa lamba muze munukashiha Usendo wetu. Nyi nwakunguluka mu membo jenu ha kubwa ni uhwimino, mungukanutumina misongo yize kuyishi kuhwa mukachi kenu, mba munukazeyela akwa kole jenu.

²⁶ Mungukanumina yakulia. Mapwo kumi maakochela mbolo ha jiko limuwika. Maakanwesekela jo ha kilo, ni muze munukajilia hindu kunuchi kakuta.

²⁷ “Hindu nyi kunwanguvwile, nwalimika lume ni yami,

²⁸ mba mu ufwatulo wami mungukalimika ni yenu. Mungukanumwesa nawa lamba yisuho shimbiali.

²⁹ Munukafwa zala yinji, mba munukalia ana jenu.

³⁰ Mungukabuzula ha mulundu yilumbilo yenu ya milambu ni ya kwochela yuma ya vumba libema. Afu jenu mungukaalumbika ha mahamba jenu. Mu utenu wami

³¹ mungukapwisa membo jenu ahululu, ni kwonona yilumbilo yenu. Mungukalituna milambu yenu.

³² Mungukonona chifuchi chenu liakulu, ni akwa kole jenu, waze akunuyula: no maakalishimwoka.

³³ Mungukanukokela jita, ni kunumwangina mu yifuchi ya yilambala. Chifuchi chenu muchikabwa puya, ni membo jenu maakalumuka yikulu.

^34-35 Hohene chifuchi muchikawaha ha matangwa a kuhwima waze kunwatayijile, muze munukabwa mu undungo mu chifuchi cha akwa kole jenu.

³⁶ “Kuli akwenu waze maakabwa mu undungo, mungukeevwisa mwongo. Ha kuhehuka cha lifwo maakachina. Munukachina ngwe mutu yoze unachina mu jita, munukalimbwoka chibwe mukwa kole keshiko.

³⁷ Munukatalinga yenwene, chibwe kukushi yoze unanuhange. Kunuchi kabwa ni tachi ja kulimika ni akwa kole jenu.

³⁸ Munukafwila mu undungo, munukanongena mu chifuchi cha akwa kole jenu.

³⁹ Waze maakasala ni mwono mu chifuchi cha akwa kole jenu maakawangama mumu ha milonga yenu ni ha milonga ya tushakulu twenu.

⁴⁰ “Alioze vungu lienu maakashikisa milonga yo ni ya tushakulu two, chize alimikine ni yami, ni chize angulitunyine.

⁴¹ Yaangwihia ha kulimika no, mba yingwatuma mu undungo mu chifuchi cha akwa kole jo. Ha kusula, muze vungu lienu haamona lamba mumu ha milonga yo ni ha uhulia wo,

⁴² mungukewuluka Usendo uze nakolesele ni Yakoba ni Isake ni Abrahama ni kushindakenya chilakenyo chami ha kwaaha chifuchi.

⁴³ Hatangu chifuchi chikahwime, kuchishi atu, ni e atu jacho chaatamba kumona lamba mumu haanehuka Shimbi jami ni yiyulo yami.

⁴⁴ Alioze chibwe chocho, muze achili mu chifuchi cha akwa kole jo, chichi keehuka liakulu hanji kwoonona. Nyi munguchilinga, mungushiha Usendo wami hamwe no, yami nguli Mwene Zambi, Zambi yo.

⁴⁵ Mungukewuluka Usendo wami uze nakolesele ni tushakulu two muze nalwezele mavungu eswe ndundo jami ha kutuhwisa atu jami mu Egiptu, hanga yami Mwene Zambi ngubwe Zambi yo.”

⁴⁶ Yino yeswe yili Shimbi ni yiyulo yize Mwene Zambi ahanyine kuli Mose ha mulundu wa Sinai mumu hali Aisraele.