Alevi 25 - Mukanda Wa Zambi 1970

Mwaka wa muchishimbiali

¹ Mwene Zambi yambila Mose ha mulundu wa Sinai

² ha kulweza Aisraele Shimbi jino. Muze munukanjila mu chifuchi chize Mwene Zambi ananwehe chatamba kulemesa Mwene Zambi ha kulitwamina kulima ha mwaka wa muchishimbiali.

³ Ha miaka yisambano nukalima minda yenu, nukalulieka mitondo yenu ya vinyu, ni kuhela mihuko yenu.

⁴ Alioze ha mwaka wa muchishimbiali chifuchi chikabwa ni uhwimino ha kulemesa Mwene Zambi. Kanda nukalima ho minda yenu hanji kululieka mitondo ya vinyu.

⁵ Kanda nukahela mbuto ya muzumba mu minda yenu, chibwe vinyu yize mbuto yalisokela. Mwaka uze muukabwa wa uhwimino unene mu chifuchi.

⁶ Chibwe ha mwaka uze kunwalimine minda, hindu munukabwa ni yakulia: yenu, ni ndungo jenu, ni akwa milimo jenu, ni yilambala waze atwama mukachi kenu,

⁷ ni yimuna yenu, ni tushitu a mu chifuchi chenu. Chuma cheswe chize chinasoko muchikabwa kulia chenu.

Mwaka wa Kuhilwisa

⁸ Alula miaka shimbiali yisuho shimbiali, muyibwa makumi awana ni livwa.

⁹ Mba ha tangwa lia muchikumi lia kakweji wa muchishimbiali, ha tangwa lia Kuwana ni Zambi, tuma mutu akembe chitavwi mu chifuchi cheswe.

¹⁰ Mwaka wa makumi atano ukabwa wa chijila. Ha mwaka uze nukambujola utuswilo kuli eswe waze atwama mu chifuchi. Nyi te haanalande yimwe minda ha miaka ya kunyima chaatamba kuyihilwisa kuli mwenyayo hanji ku vungu lienyi. Mweswawo te haanamulanjisa ngwe kabinji, makahiluka ku jiko lienyi, hatusuka.

¹¹ Kanda nukatumba mu minda yenu chibwe kuhela mbuto ya muzumba hanji vinyu yize yalisokela.

¹² Mwaka weswe ukabwa wa chijila ni uwahililo. Munukalia yize ya mu minda yikulu.

¹³ Ha mwaka uze wa uwahililo mutu ni mutu akahiluka ku jiko lienyi mwene.

¹⁴ Kashika muze munulanjisa munda kuli usoko wenu Aisraele hanji kulanda munda kuli iye, kanda nulilaka.

¹⁵ Ha kulanda Chuma kuli usoko we, chatamba kwalula miaka yize hiyabalika chize ku Mwaka wa Kuhilwisa ni miaka yize yasala ko ya kwima mihuko.

¹⁶ Nyi ngwe kuli miaka yinji, ndando yikabwa yinji, alioze nyi miaka yikepe, ndando yikabwa yikepe. Mumu yize yena unalanjisa yinalite ni yize makahela iye.

¹⁷ Kanda nulilaka yenwene, alioze vwilenu Mwene Zambi, Zambi yenu woma.

Chize Aisraele maakabwa ha mwaka wa muchishimbiali

¹⁸ Fungenu Shimbi ni yiyulo yeswe ya Zambi, mba munukatwama kanawa mu chifuchi.

¹⁹ Chifuchi muchikema mihuko yacho, munukabwa ni yakulia yinji ni uhwimino.

²⁰ Tangwa likwo umwe malihula ngwenyi: “Yika mutukalia ha mwaka uze weswe wa muchishimbiali nyi kutwalimine minda ni kubatula mbuto?”

²¹ Mwene Zambi makawahisa chifuchi ha mwaka wa muchisambano, mba muchikema mihuko ya kulia ha miaka yaali.

²² Muze munukatumba minda yenu ha mwaka wa muchinake, munukalia mihuko ya mwaka wa muchisambano. Mba munukabwa ni yakulia yinji ndoo ha kulia cha mbuto yize ya mwaka wa muchinake.

Kuhilwisa cha yuma yize haanalande

²³ Kuchatambile kulanjisa munda wenu liakulu, mumu hi wenu ko. Kuuli wa mbala wa Zambi, ni yenu nuli ngwe yilambala kanda njize waze nwatwama mo.

²⁴ Nyi mutu walanjisa munda wenyi, nukamutayiza nawa akaukule.

²⁵ Nyi umwe Kaisraele habwa chiswale, mba walanjisa munda wenyi mumu ha lamba lienyi, usoko wenyi wa ha muchima akaukula.

²⁶ Nyi umwe keshi ni yoze maukula, iye mwene kulutwe, nyi habwa pichi, makaukula.

²⁷ Nyi Chenacho, chatamba kwalula miaka yingahi yabalika chize kuze alanjishile we munda, hanji miaka yingahi yasala ha kuheta ku Mwaka wa Kuhilwisa, mba mafweta ubite ni kuukula.

²⁸ Alioze nyi keshi ubite wa kuukula, ukatwama kuli yoze walanjile ndoo ku Mwaka wa Kuhilwisa, mba muukahiluka kuli mwenyawo.

²⁹ Nyi mutu walanjisa zuwo lize lili mu limbo lia kukoleka mahasa kulikula ha mwaka uze wene utangu.

³⁰ Alioze nyi mwaka hiwahwa kahashile kulikula, mulikabwa lia mbala lia yoze walilanjile ni akwa vungu lienyi. Hi kechi kulihilwisa nawa ha Mwaka wa Kuhilwisa.

³¹ Alioze mazuwo a mu yihunda yize kuyishsi yipanga kaali ngwe minda. Enyo maahasa kwakula, ni chatamba kwahilwisa ha Mwaka wa Kuhilwisa.

³² Alioze Alevi maahasa kukula mazuwo jo a mu membo a kukoleka.

³³ Nyi umwe Kalevi walanjisa limwe zuwo lia mu limbo lia kukoleka, nyi kalikulile, chatamba kulihilwisa ha Mwaka wa Kuhilwisa, mumu kaali mazuwo ja mbala ja Alevi. Kaali chihinga cho.

³⁴ Alioze Alevi kaahashile kulanjisa minda ya ku yihunda yo, mumu yili chihinga cho ku miaka yeswe.

Kusondamise yiswale

³⁵ Nyi mukwenu Kaisraele habwa chiswale, kahashile kulikwasa iye mwene, Chakutamba kumukwasa ngwe chize wakukwasa chilambala, hanga atwame hamwe ni yena.

³⁶ Kanda umutambula mbwezo niyimwe, alioze vwila Zambi woma, tayiza usoko we kubwa hamwe ni yena.

³⁷ Nyi wamusondamisa mbongo ni yakulia, kanda umwita mbwezo.

³⁸ Yino yili Shimbi ya Mwene Zambi, Zambi yenu, yoze wanutuhwishile mu chifuchi cha Egiptu ha kunwaha chifuchi cha Kanana, ni ha kubwa Zambi yenu.

Kutusuka cha ndungo

³⁹ Nyi mukwenu Kaisraele habwa chiswale mukachi kenu, halilanjisa kuli yena, kanda ukamwaha milimo ya undungo.

⁴⁰ Akabwa kuli yena ngwe ngamba, ni kukulingila ndoo ku Mwaka wa Kuhilwisa.

⁴¹ Ha mwaka uze iye ni ana jenyi maakakatuka kuli yena ni kuhiluka ku vungu lienyi, ku chihinga cha tushakulu twenyi.

⁴² Aisraele kaali ndungo ja Mwene Zambi, iye mwe waatuhwishile mu chifuchi cha Egiptu. Kuchatambile kwalanjisa ngwe ndungo.

⁴³ Kanda nwayula ni uswii, alioze vwilenu Zambi woma.

⁴⁴ Nyi nunazange kubita ndungo, munuhasa kwalanda ku mavungu waze anujingilika.

⁴⁵ Munuhasa nawa kulanda ana ja yilambala waze atwama mukachi kenu. Ana ngwe waze asemukinyine mu chifuchi chenu maahasa kubwa chihinga chenu.

⁴⁶ Akabwe chihinga cha ana jenu a malunga hanga akaalingile ku miaka yo yeswe. Alioze usoko wenu Aisraele, kanda nukaayula ni uswii.

⁴⁷ Nyi ngwe chilambala yoze watwama mukachi kenu habwa pichi, alioze umwe Kaisraele habwa chiswale, halilanjisa kuli iye, chibwe kuli umwe wa ku vungu lienyi,

⁴⁸ muze halilanjisa akwa vungu lienyi maahasa kumukula. Umwe wa kuli ayayo hanji anakwo,

⁴⁹ chibwe natu, hanji musonyenyi, chibwe umwe wa kuli usoko wenyi mukwo, chibwe iye mwene nyi hamona ubite, mahasa kulikula.

⁵⁰ Akalula ni yoze wamulanjile chize ku mwaka uze amulanjile ndoo ku Mwaka wa Kuhilwisa. Mba ndando ya kumutusula muyikalita ni kwalula cha miaka. Miaka yize atwama ni kako akayalula ngwe miaka ya ngamba yoze wakulinga fweto.

^51-52 Akahilwisa ndando yize yinalite ni miaka yize yasala.

⁵³ Akatwama nenyi miaka yeswe ngwe ngamba wa fweto. Kako kanda amuyula ni uswii.

⁵⁴ Alioze nyi usoko wenyi kaamukulile, iye ni ana jenyi chaatamba kutusuka ha Mwaka wa Kuhilwisa.

⁵⁵ Kaisraele kahashile kubwa ndungo wa miaka yeswe, mumu kaali ndungo ja mbala ja Zambi. Iye mwe waatuhwishile mu chifuchi cha Egiptu, kali Mwene Zambi, Zambi yo.