Alevi 24 - Mukanda Wa Zambi 1970

Chize chatamba kuwika ndeya ni kuyifunga

¹ Mwene Zambi yambila Mose

² ha kwaha Aisraele Shimbi jino. Anehe maji abema a olive akusa mu ndeya mu zuwo lia Zambi lia makubu, hanga ndeya yikatemuke ufuku weswe.

³ Arone chatamba kuyiwika chingoloshi cheswe ni kuyitemuna ndoo ku chichamene ku meso ja Zambi, hehi ni chikalakala chize chili kulutwe lia mushete wa Usendo, muma mwa chijila mwahiana. Aisraele chatamba kufunga Shimbi jino ndoo ku miaka yeswe.

⁴ Arone akafunga ndeya ya oru yibema, akayilulika hanga yikatemuke ufuke weswe ku meso ja Mwene Zambi.

Mbolo ya kutumbieka ku meso ja Mwene Zambi

⁵ Nukanda kilo kumi ni jaali ja wunga, nukalinge mbolo kumi ni jaali

⁶ Nukajilonga ha mesa ya oru yibema ku meso ja Mwene Zambi, mu mikala yaali, jisambano jisambano.

⁷ Nukasa yimwe yuma ya vumba libema ha mikala yeswe yaali, kuyili chilweza kuli Mwene Zambi cha mulambu wa yakulia yize yinasalakana mbolo.

⁸ Lieswe tangwa lia kuhwima, ndoo ku miaka yeswe, chatamba kuyinangika ku meso ja Mwene Zambi. Yino yili Shimbi ya Aisraele ndoo ku miaka yeswe.

⁹ Mbolo jili ja mbala ja Arone ni akwa vungu lienyi. Akajilila muma mwa chijila, mumu yili yakulia ya chijila kuhiana, yize atu haanalambula kuli Mwene Zambi. Yili yakulia ya mahako.

Kumwesa lamba ni ululi

^10-11 Kwabwile umwe lunga, tato mukwa Egiptu, naye Kaisraele, jina lienyi Shelomite, mwana wa Dibri wa ku vungu lia Dane. Mwe lunga yoze yazwela ni Kaisraele. Ha kuzwela cho yatuka Zambi, kashika amutwalile kuli Mose,

¹² yaamufunga nikushimbwila Mwene Zambi ha kumona chize mamulinga.

¹³ Mwene Zambi yambila Mose ngwenyi:

¹⁴ “Tuhwisa mutu yoze mu musumba. Mweswawo unakevwa chize te anatukana, amuse kwoko ha mutwe ha kumushindakenya ngwo, kanahi. Mba Chikungulwila cheswe maamwasa mawe.

^15-16 Lweza nawa Aisraele ngwe, mweswawo matuka Mwene Zambi chatamba kumushiha. Kaisraele hanji chilambala yoze watwama mu Israele, nyi matuka Mwene Zambi, Chikungulwila cheswe akamushiha ni mawe.

¹⁷ “Mweswawo mashiha mutu, neye akamushiha.

¹⁸ Mweswawo mashiha chimuna cha mbala, akafweta cha mwono. Kulumbunuka ngwo, wa mwono ni wa mwono.

¹⁹ “Nyi mutu walinga mukwo chibi, neye akamulinga cho.

²⁰ Nyi wamakuna chifwaha, neye akamumakuna cho. Nyi watuwa mukwo liso, neye akamutuwa lio. Cheswe chize malinga mukwo, neye akamulinga cho.

²¹ Alioze mweswawo mashiha mutu, neye akamushiha.

²² Shimbi yino yibwa kuli yenu eswe, kuli Aisraele ni kuli yilambala waze atwama mukachi kenu, mumu yami nguli Mwene Zambi, Zambi yenu.”

²³ Muze Mose haalweza yuma yino, atu yaanda mwe mutu, yaamutuhwisa mu musumba, yaamushiha ni mawe. Chenacho Aisraele alingile nikulita ni maliji a Mose.