Alevi 23 - Mukanda Wa Zambi 1970

Kuwayila Zambi mu yiwanyino

¹ Mwene Zambi yalongesa Mose

² Shimbi hakutwala ku yiwanyino, muze Aisraele maalikungulula ha kuwayila.

³ Chatamba kulinga milimo yenu matangwa asambano, alioze iwulukenu ngwenu, tangwa lia muchishimbiali lili lia kuhwima. Ha tangwa lize kanda nulinga ho milimo, alioze kungulukenu ni kuwayila. Tangwa lia kuhwima lili lia mbala lia Mwene Zambi, kweswako munukatwama kulinga Chuma ka.

⁴ Yiwanyino ya Mwene Zambi uyambujola nikulita ni matangwa jayo.

Chiwanyino cha Kubalika ni cha Mbolo Yize Kuyishi Yitumbo

⁵ Chiwanyino cha Kubalika, chize munulinga ha kulemesa Mwene Zambi, muchibutuka ha tangwa kumi ni lia muchiwana lia kakweji mutangu, muze tangwa hilianjila.

⁶ Chiwanyino cha Mbolo Yize Kuyishi Yitumbo muchibutuka ha tangwa kumi ni lia muchitano. Chize ku tangwa lize, ha matangwa shimbiali, kanda nulia mbolo niyimwe yize yili ni yitumbo.

⁷ Ha tangwa litangu lia matangwa waze chatamba kulikungulula ha kuwayila. Kanda nulinga ho mulimo niumwe.

⁸ Ha matangwa shimbiali lambulenu milambu yenu ya yakulia kuli Mwene Zambi. Ha tangwa lia muchishimbiali nukalikungulula nawa ha kuwayila, alioze kanda nulinga ho mulimo niumwe.

^9-10 Muze munukanjila mu chifuchi chize Mwene Zambi ananwehe, ha kubatula mbuto yenu yitangu, nukayitwala kuli hako.

¹¹ Neye akayihungisa ku meso ja Mwene Zambi, hanga akayitayize mumu hali yenu. Akayihungisa muze tangwa lia kuhwima hiliabalika.

¹² Ha tangwa lize munukahungisa mulambu wa mbuto chatamba kulambula kuli Mwene Zambi mwana panga wa kuji wa mwaka umuwika, yoze keshi kapalia. Kuuli mulambu wa kwocha.

¹³ Nukaulambula ni kilo jaali ja wunga wakuchinga ni maji a olive, ngwe mulambu wa yakulia. Lupembo wa mulambu uze kakuwahila kuli Mwene Zambi. Nukaulambula nawa hamwe ni litro yimuwika ya vinyu.

¹⁴ Kanda nukalia mihuko yaha niyimwe, chibwe ya wisu, chibwe ya kwocha, chibwe ya kulinga ni mbolo, ndoo muze hinwaneha mulambu kuli Zambi. Vungu lienu lieswe chatamba kufunga Shimbi jino ndoo ku miaka yeswe.

Chiwanyino cha Kubatula Mbuto

¹⁵ Nukalula semane shimbiali chize ku tangwa lia kuhwima muze hinwaneha mbuto yitangu ha kuyilambula kuli Mwene Zambi.

¹⁶ Ha tangwa lia makumi atano, muze matangwa a kuhwima shimbiali haabalika, nukalambula mulambu wa mbuto yaha kuli Mwene Zambi.

¹⁷ Akwa jiko lieswe akaneha mbolo jaali, akajilambula kuli Mwene Zambi. Akajilinga ni kilo jaali ja wunga ni yitumbo, akajihungisa ku meso ja Mwene Zambi. Kuuli mulambu wa mbuto yitangu yize hinwabatula.

¹⁸ Akwa Chikungulwila akalambula mbolo ni mapanga shimbiali a mwaka umuwika, ni chimbembe wa kuji umuwika, ni makuji a pembe aali, waze keeshi kapalia. Akaalambula kuli Mwene Zambi hamwe ni mulambu wa mbuto ni wa vinyu. Kuuli mulambu wa kwocha, lupembo wawo kakuwahila kuli Mwene Zambi.

¹⁹ Nukalambula nawa kuji a pembe, mulambu wa milonga, ni makuji a panga aali a mwaka umuwika, mulambu wa kulivwa ni Zambi.

²⁰ Hako akalambula mbolo hamwe ni makuji a panga aali. Kuuli mulambu wa kuhungisa ku meso ja Mwene Zambi. Kuyili milambu ya chijila mumu hali mahako.

²¹ Ha lie tangwa alio, kanda nukalinga ho mulimo niumwe, alioze nukalikungulula ha kuwayila. Vungu lienu akafunga Shimbi yino ndoo ku miaka yeswe, kweswako maakatwama.

²² Muze munukabatula mbuto ya mu minda yenu, kanda nubatula yeswe ndoo ku njiza ja minda, kanda nukahuhujola mbuto jize jasala. Yechenu mumu hali yiswale ni yilambala. Mwene Zambi kali Zambi yenu.

Chiwanyino cha Mwaka Waha

^23-24 Tangwa litangu lia kakweji wa muchishimbiali nukalifunga. Lili tangwa lia kuhwima. Muze munukevwa liji lia chitavwi nukalikungulula ha kuwayila.

²⁵ Nukalambula mulambu wa yakulia kuli Mwene Zambi. Kanda nukalinga ho mulimo niumwe.

Tangwa lia Kuwana ni Zambi

^26-27 Tangwa lia muchikumi lia kakweji wa muchishimbiali lili tangwa lia kuwana ni Zambi. Ha tangwa lize kanda nukalia Chuma nichimwe. Nukalikungulula ha kuwayila ni ku kunjika mulambu wa yakulia kuli Mwene Zambi.

²⁸ Ha tangwa lize kanda nukalinga mulimo niumwe, lili Tangwa lia Kuwana ni Zambi.

²⁹ Mweswawo makalia chimwe Chuma ha tangwa lize, kechi kumwalula nawa mukachi ka atu ja Zambi.

³⁰ Nyi umwe walinga milimo ha lie tangwa alio, makamushiha kuli Mwene Zambi iye mwene.

³¹ Vungu lienu akafunga Shimbi yino ndoo ku miaka yeswe, kweswako maakatwama.

³² Chize ku kunjila cha tangwa ha tangwa lia muchilivwa, ndoo ku kunjila cha tangwa ha tangwa lia muchikumi, tangwa lize nukalifunga, lili tangwa lilemu lia kuhwima, kunwahashile kulia Chuma nichimwe.

Chiwanyino cha Yikulika

^33-34 Chiwanyino cha Yikulika muchikabutuka ha tangwa kumi ni lia muchitano lia kakweji wa muchishimbiali, chili chiwanyino cha matangwa shimbiali.

³⁵ Ha tangwa litangu nukalikungulula ha kuwayila, kanda nukalinga ho mulimo niumwe.

³⁶ Tangwa ha tangwa ndoo matangwa shimbiali chanutamba kulambula mulambu wa yakulia. Ha tangwa lia muchinake nukalikungulula nawa ha kuwayila ni kulambula mulambu wa yakulia. Lili tangwa lia kuwayila, kanda nukalinga ho mulimo niumwe. (

³⁷ Yino ye yiwanyino ya kulemesa nayo Mwene Zambi, ni kulikungulula ha kumuwayila ni kumulambula milambu ya yakulia, ni ya kwocha, ni ya mbuto, ni ya yimuna, ni ya vinyu, nikulita ni tangwa liayo.

³⁸ Yiwanyino yino chatamba kuyiweza ku matangwa akwo a kuhwima, ni milambu yino chatamba kuyiweza ku yawana yenu yikwo, ni ku milambu ya yilakenyo yenu ni ya kuzanga chenu.)

³⁹ Muze hinwabatula mbuto mu minda yenu, nukalinga chiwanyino chino ha matangwa shimbiali. Muchikabutuka ha tangwa kumi ni lia muchitano lia kakweji wa muchishimbiali. Tangwa litangu mulikabwa tangwa lilemu lia kuhwima.

⁴⁰ Ha tangwa lize nukaneha mihuko yibema yahiana ya ku mitondo yenu. Nukaneha nawa mitango ya mingaji ni mitango ya mafwo a mitondo, ni kubutula chiwanyino cha kulemesa Mwene Zambi, Zambi yenu.

⁴¹ Nukachifunga ha matangwa shimbiali. Vungu lienu chaatamba kufunga Shimbi yino ndoo ku miaka yeswe.

⁴² Aisraele eswe akatwama mu yikulika ha matangwa shimbiali,

⁴³ hanga akwa vungu lienu akanyingike ngwo, Mwene Zambi hahana Shimbi kuli Aisraele atwame mu yikulika muze aatuhwishile mu chifuchi cha Egiptu. Kali Mwene Zambi, Zambi yenu.

⁴⁴ Chenacho Mose ahele Aisraele Shimbi ja kulinga yiwanyino ya kulemesa nayo Mwene Zambi.