Alevi 22 - Mukanda Wa Zambi 1970

Milambu ya chijila

¹ Mwene Zambi yambila Mose

² ha kulweza Arone ni ana jenyi a malunga ngwenyi: “Kuchanutambile kukolesa jina liami lia linanga sonyi, alioze lemesenu milambu ya chijila yize Aisraele akungulambula. Yami nguli Mwene Zambi.

³ Ku vungu lienu, nyi umwe hako halichisa, mba makundama ku milambu ya chijila yize Aisraele akungulambula, kechi kuhasa nawa nichimwe kungulingila ku chilumbilo. Chatamba kufunga Shimbi jino ndoo ku miaka yeswe. Yami nguli Mwene Zambi.

⁴ “Niumwe wa ku vungu lia Arone yoze uli ni musongo ukalu wa ha chikowa wa kuhita mahasa kulia yimwe yuma ya ku milambu ya chijila ndoo muze habema. Hako mweswe malichisa nyi makwata Chuma cha ha mujimba wa mufu, hanji mamwanga ana jenyi hashi,

⁵ hanji makwata kashitu wa luchisa, chibwe mutu.

⁶ Nyi umwe hako halichisa, mabwa wa luchisa ndoo ku chingoloshi. Chibwe chingoloshi kahashile kulia yimwe ya ku milambu ndoo muze hasana.

⁷ Muze tangwa hiliatoka, mba mabema. Mba mahasa kulia yakulia yenyi, milambu ya chijila.

⁸ Kanda alia yifwo ya kashitu walifwila hanji wamukoka. Nyi ka, muyimupwisa wa luchisa. Yami nguli Mwene Zambi.

⁹ “Mahako eswe chaatamba kufunga Shimbi jize hinguneehe. Nyi ka, maabwa ni mulonga, kumaafwa, mumu haakolema Shimbi ja chijila. Yami nguli Mwene Zambi, yami nakwapwisa akwa kulinanga.

¹⁰ “Shina akwa jiko lia hako maahasa kulia milambu ya chijila. Niumwe mukwo mahasa kuyilia, chibwe yoze wakutwama ni hako, chibwe mukwa mulimo wenyi.

¹¹ Alioze ndungo ya hako, yoze alanjile ni ubite wenyi mwene, hanji yoze wasemukine mu zuwo lienyi, mwe mahasa kulia yakulia yize hako akutambula.

¹² Nyi mwana pwo wa umwe hako halimbata ni umwe lunga, hi hako ko, kahashile kulia milambu ya chijila.

¹³ Alioze nyi hafwisa lunga hanji hamulakula, keshi mwana, ni hahiluka maha tato, mba mahasa kulia yakulia ya chijila ya tato. Shina umwe wa ku jiko lia hako, mwe mahasa kuyilia.

¹⁴ “Nyi umwe hi wa ku jiko lia hako ko, halia milambu ya chijila, kachinyingikine, akaweza ho Chihanda cha muchitano cha mulambu hanga akachihilwise kuli hako.

¹⁵ Mahako kuchaatambile kujilula milambu ya chijila

¹⁶ ha kutayiza yoze hi wa ku jiko lia hako ko kuyilia. Nyi machilinga mutu yoze mahia, maamumwesa lamba. Yami nguli Mwene Zambi, yami nakupwisa milambu ya chijila.”

¹⁷ Mwene Zambi yambila Mose

¹⁸ ha kulweza Arone ni ana jenyi a malunga ni Aisraele eswe Shimbi jino. Kaisraele hanji chilambala yoze watwama mukachi ka Aisraele, malambula mulambu wa kwocha, chibwe wa chilakenyo hanji wa kuzanga chenyi, che chimuna kanda chibwa ni kapalia.

¹⁹ Ha kuchitayiza chatamba kubwa kuji yoze keshi kapalia.

²⁰ Nyi muulambula chimuna chize chili ni kapalia, Mwene Zambi kechi kuchitayiza.

²¹ Nyi umwe kanalambula mulambu wa kulivwa kuli Mwene Zambi, chibwe wa chilakenyo hanji wa kuzanga chenyi, che chimuna kanda chibwa ni kapalia. Nyi ka, Mwene Zambi kechi kuchitayiza.

²² Kanda nulambula Mwene Zambi chimuna chize chafwa meso, chibwe chilema, hanji chamakuka yifwaha, chibwe chili ni musongo wa kuhita, hanji wa mukule, hanji wa yilonda. Kanda nulambula ha chilumbilo yimuna ngwe yino ngwe milambu ya yakulia.

²³ Ha kulambula mulambu wa kuzanga cha yena mwene, muuhasa kulambula chimuna cha chilema. Alioze ha mulambu wa chilakenyo Zambi kechi kuchitambula.

²⁴ Kanda ulambula chimuna chize chili ni mbili ja kufwenya, chibwe ja kuwonda, hanji jabulika, chibwe ja kuteta. Zambi kechi kuchitayiza mu chifuchi chenu.

²⁵ Kanda nulambula mulambu wa yakulia wa chimuna chize watambula kuli chilambala. Zambi kechi kutayiza yimuna ngwe yino.

^26-27 Muze ngombe hanji panga hanji pembe hasemuka, chatamba kutwama ni naye matangwa shimbiali, mba maahasa kumulambula mulambu wa yakulia.

²⁸ Kanda nulambula ngombe hanji panga hanji pembe hamwe ni mwanenyi ha tangwa limuwika.

²⁹ Muze munulambula mulambu wa kusakwila kuli Mwene Zambi, nufunga Shimbi mba hanga Zambi autambule.

³⁰ Nuulia ha tangwa lizeliene, kanda nukahichika chimwe Chihanda ndoo hamene.

³¹ Mwene Zambi ngwenyi: “Fungenu Shimbi jami, yami nguli Mwene Zambi.

³² Kanda nukolesa jina liami lia linanga sonyi. Aisraele eswe chaatamba kutayiza ngwo, nguli munangi. Yami nguli Mwene Zambi, yami nakunupwisa alinanga.

³³ Yami nanuchijile mu chifuchi cha Egiptu ha kubwa Zambi yenu. Yami nguli Mwene Zambi.”