Alevi 21 - Mukanda Wa Zambi 1970

Ulinange wa mahako

¹ Mwene Zambi yambila Mose ha kulweza mahako, ana ja Arone a malunga ngwenyi: “Hako niumwe kanda alichisa ha kufunda usoko wenyi yoze hafwa,

² shina naye, hanji tato, hanji mwanenyi, hanji mwanakwo,

³ hanji ndumbwenyi yoze watwama mu zuwo lienyi kanda achiya ku ulo.

⁴ Kanda alichisa ha kufunda usoko wenyi yoze hanayi ku ulo.

⁵ “Hako kanda alitewula kawewe, chibwe kukamba wevu, chibwe kulichata chata, ha kusoloka ngwo, hafwisa.

⁶ Chamutamba kubwa munangi, kanda akolesa jina liami sonyi. Kakungulambula milambu ya yakulia, chatamba kubwa munangi.

⁷ Hako kanda ambata pwo yoze wabwile chitanji, hanji pwo wakulumbula, hanji yoze haanalakula, mumu hako kali munangi.

⁸ Atu chaatamba kwalula hako ngwo, munangi, mumu kakungulambula milambu ya yakulia. Nguli Mwene Zambi, nguli munangi, atu jami nakwapwisa akwa kulinanga.

⁹ Nyi umwe mwana pwo wa hako malipwisa chitanji, kakolesa tato sonyi. Chatamba kumwocha ha kahia.

¹⁰ “Mwata wa mahako yoze hamuwayisa maji ni hamujika mahina ja uhako, kanda avundula kambu jenyi, chibwe kuchanuna mahina jenyi, ha kusoloka ngwo, hafwisa.

^11-12 Kali munangi, kanda alichisa chibwe kuchisa zuwo liami lia chijila. Kanda akatuka ku zuwo liami lia chijila ni kunjila mu zuwo muze muli mufu, chibwe mufu kali tato hanji naye.

¹³ Mwata wa mahako akambata pwo yoze kanda alimona ni lunga,

¹⁴ hi yoze ko hanafwisa, chibwe yoze hanamulakula, hanji chitanji. Akambata lume yoze kanda alimona ni lunga, wa ku jimo lienyi mwene.

¹⁵ Nyi ka, ana jenyi waze chaatamba kubwa akwa Minanga, maakabwa a luchisa. Yami nguli Mwene Zambi, hinamuhandununa ha kubwa mwata wa mahako.”

¹⁶ Mwene Zambi yambila Mose

¹⁷ ha kulweza Arone ngwenyi: “Chilema niumwe wa ku vungu lie, mahasa kungulambula mulambu wa yakulia. Shimbi yino muyikabwa ndoo ku miaka yeswe.

¹⁸ Chilema niumwe mahasa kungulambula mulambu: chibwe kapuputa, hanji chitonji, chibwe yoze waheya liso,

¹⁹ hanji yoze wasosewa kwoko chibwe kulu,

²⁰ hanji mukwa kunda, chibwe chimbinda, hanji chitalawili, chibwe mukwa mukule, hanji mukwa chimbandwa, chibwe mukwa kutunguna.

²¹ Chilema niumwe wa ku vungu lia hako Arone kanda angulambula mulambu wa yakulia.

²² Mutu yoze mahasa kulia mulambu uze hangulambula, weswe waali, yakulia ya chijila ni yize ya chijila kuhiana.

²³ Alioze mumu kali chilema, kanda akundama ku chikalakala cha chijila hanji ku chilumbilo. Kanda alelesa yuma yino ya chijila, mumu yami nguli Mwene Zambi, nakuyipwisa ya chijila.”

²⁴ Mose yalweza yuma yino kuli Arone, ni ana jenyi a malunga, ni kuli Aisraele eswe.