Alevi 20 - Mukanda Wa Zambi 1970

Lamba ha kukolema Shimbi ja Zambi

¹ Mwene Zambi yambila Mose

² ha kulweza Aisraele ngwenyi: “Nyi umwe wa kuli yenu hanji chilambala yoze watwama mukachi kenu malambula mwanenyi kuli zambi Moleke, Chikungulwila cheswe amushihe ni mawe.

³ Nyi umwe malambula mwanenyi kuli zambi Moleke ni kubihisa zuwo liami lia chijila ni kukolesa sonyi jina liami, mungulimika nenyi, chichi kumwalula nawa mukachi ka atu jami.

⁴ Alioze nyi Chikungulwila kuchalwile ko ngwe Chuma, kaamushihile,

⁵ yami mwene mungulimika ni mwe mutu ni akwa jiko lienyi eswe ni eswe waze akumukaula ha kulituna yami, ni kuwayila zambi Moleke. Chichi kaalula nawa mukachi ka atu jami.

⁶ “Nyi umwe mahula mana kuli akwa mahamba ni kuli tahi, mungulimika nenyi, chichi kumwalula nawa mukachi ka atu jami.

⁷ Lifungenu yenwene ku ulinange, mumu nguli Mwene Zambi, Zambi yenu.

⁸ Fungenu Shimbi jami, mumu nguli Mwene Zambi, nakunupwisa akwa kulinanga.”

⁹ Mwene Zambi yalongesa Shimbi jino. Mweswawo matuka tato hanji naye, amushiha. Uhiso muubwa wa iye mwene.

¹⁰ Nyi umwe lunga malimona ni pwo lia usoko wenyi Kaisraele, chatamba kwashiha eswe aali, lunga ni pwo.

¹¹ Nyi umwe lunga malimona ni pwo lia tato, makolesa tato sonyi. Chatamba kwashiha eswe aali. Uhiso muubwa wa ayo ene.

¹² Nyi umwe lunga malimona ni tembwa mwanenyi, chatamba kwashiha eswe aali, kaalinga chibi kuhiana. Uhise muubwa wa ayo ene.

¹³ Nyi lunga malinga utumwa ni lunga ni mukwo, kaalinga Chuma cha sonyi. Chatamba kwashiha eswe aali. Uhiso muubwa wa ayo ene.

¹⁴ Nyi umwe lunga mahalika a mwana ni naye, chatamba kwoocha eswe atatu, mumu haalinga Chuma cha sonyi. Chuma ngwe chino kanda chibwa mukachi kenu.

¹⁵ Nyi umwe lunga malimona ni kashitu, chatamba kwashiha eswe aali.

¹⁶ Nyi umwe pwo meseka kulimona ni kashitu, chatamba kwashiha eswe aali. Uhiso muubwa wa ayo ene.

¹⁷ Nyi umwe lunga mambata ndumbwenyi, chatamba kwamwesa lamba ni kwahanga eswe aali mukachi ka atu ja Zambi.

¹⁸ Nyi umwe lunga malimona ni pwo yoze haya ku zuwo likwo, eswe aali chatamba kwahanga mukachi ka atu ja Zambi, mumu haalinga Chuma chibi.

¹⁹ Nyi umwe lunga malimona ni naye wa mukulwana hanji wa kanuke, hanji tato pwo, eswe aali chatamba kwamwesa lamba mumu ha uhenge wo.

²⁰ Nyi umwe lunga malimona ni pwo lia natu, makolesa natu sonyi. Lunga yoze ni mwe pwo maamona lamba, keechi kabwa ni ana.

²¹ Nyi umwe lunga malambula pwo lia yayo hanji lia mwanakwo, makolesa yayo hanji mwanakwo sonyi, chili Chuma cha luchisa, keechi kabwa ni ana.

²² Mwene Zambi ngwenyi: “Fungenu Shimbi jami ni yiyulo yami yeswe, mba chifuchi cha Kanana, kuma kuze ngunanutumu, kuchichi kanusaza.

²³ Kanda nukembulula ndako ja mavungu waze atwama ko. Ngunaahumu hanga nuhase kunjila mu chifuchi cho, mumu hinevwa kubiha ha yitanga yo yibi.

²⁴ Hinanulakenya chifuchi cha chinuno, mungukanwaha cho. Yami Mwene Zambi, Zambi yenu, ngunanuhandununa ku mavungu akwo.

²⁵ Kashika chanutamba kuhandununa hakachi ka tushitu ni tujila waze abema ni kulia ni kulambula, ni waze a luchisa. Kanda nulia tushitu hanji tujila a luchisa. Yami nakwavuluka ngwami, a luchisa. Nyi nwalia, maanupwisa akwa luchisa.

²⁶ Bwenu akwa kulinanga, nubwe lume a yami. Mumu yami nguli Mwene Zambi, nguli munangi. Hingunanuhandununa kuli mavungu akwo hanga nubwe lume a yami mwene.

²⁷ “Nyi umwe lunga hanji umwe pwo mahula mana kuli mukwa mahamba hanji kuli tahi, chatamba kumushiha ni mawe. Uhiso muubwa wa iye mwene.”