Alevi 2 - Mukanda Wa Zambi 1970

Milambu ya mbuto

¹ Muze umwe makalambula Mwene Zambi mulambu wa mbuto, hatangu chatamba kuyitwa wunga, ni kusa ho maji a olive, ni yuma ya vumba libema,

² ni kuuneha kuli mahako, ana ja Arone a malunga. Mwe hako makazomona ho kwoko lia wunga, ni maji, ni yuma yeswe ya vumba libema, ni kuyocha ha chilumbilo, yikaweme. Chili chiwulwiso ngwo, hayilambula kuli Mwene Zambi. Lupembo wa mulambu uno wa ya kulia kakumuwahila.

³ Uze muukasala ho, wa mbala wa mahako. Kuuli mulambu wa chijila kuhiana, chize kuze waulambwile kuli Mwene Zambi.

⁴ Nyi mulambu uli wa mbolo ya kwocha ha jiko, chatamba kubwa yize kuyishi yitumbo. Chatamba kubwa mbolo yinene yakulinga ni wunga wa kuchinga ni maji a olive, hanji mbolo yikepe ya kukwita maji.

⁵ Nyi mulambu uli wa mbolo ya kwocha ha jiko, yikabwa ya wunga wa kuchinga ni maji a olive, alioze kanda yikabwa ni yitumbo

⁶ Ye mbolo ukayibalwola ni kuyizujila maji muze unayilambula mulambu.

⁷ Nyi mulambu uli wa mbolo yize yakwochela ha chikango, chatamba kubwa wa wunga ni maji a olive.

⁸ Muukaneha mulambu kuli Mwene Zambi ni kuukunjika kuli hako, mwenawo makautwala ku chilumbilo.

⁹ Hako makachiza Chihanda chawo, ni kuwocha ha chilumbilo, chikaweme. Chili chiwulwiso ngwo, mulambu weswe haulambula kuli Mwene Zambi. Lupembo wa mulambu uno wa yakulia kakuwahila kuli Mwene Zambi.

¹⁰ Yize muyikasala yili ya mbala ya mahako. Kuuli mulambu wa chijila kuhiana, chize kuze waulambwile kuli Mwene Zambi.

¹¹ Kanda Ukasa yitumbo mu mbolo yize unalambula kuli Mwene Zambi. Kuchatambile kusa yitumbo hanji wuchi mu mulambu wa Mwene Zambi.

¹² Mulambu wa ku mbuto yitangu yize munukabatwola mwaka ha mwaka, chatamba kuuneha kuli Mwene Zambi, alioze kanda nukawocha ha chilumbilo.

¹³ Muze munukalambula mbuto kuli Mwene Zambi, nukasa mo mungwa, mumu mungwa uli chinyingi cha Usendo hakachi ka yenu ni Zambi. (Chanutamba kusa mungwa mu milambu yenu yeswe.)

¹⁴ Muze munukaneha kuli Mwene Zambi mulambu wa mbuto yitangu yize hinwamakuna, lambulenu mbuto ya kwocha hanji ya kutwa wunga.

¹⁵ Nukasa ho maji a olive ni yuma ya vumba libema.

¹⁶ Mwe hako makocha wunga ni maji. Chili Chihanda cha mulambu wa chiwulwiso. Makocha nawa yuma ya vumba libema, yikaweme. Muukabwa mulambu wa yakulia kuli Mwene Zambi.