Alevi 19 - Mukanda Wa Zambi 1970

Shimbi ja ulinange ni ululi

¹ Mwene Zambi yambila Mose

² ha kulweza Chikungulwila cha Aisraele ngwenyi: “Bwenu akwa Minanga, mumu yami Mwene Zambi, Zambi yenu, nguli munangi.

³ Mweswe wa kuli yenu alemese tato ni naye, chatamba kufunga tangwa lia kuhwima lize nanuhele Shimbi. Yami nguli Mwene Zambi, Zambi yenu.

⁴ “Kanda nungwehuka ni kuwayila mahamba. Kanda nulinga mazambi a utale ni kwakombelela. Nguli Mwene Zambi, Zambi yenu.

⁵ “Muze munushiha chimuna cha mulambu wa kulivwa ni yami, nufunga Shimbi jize hingunanwehe, mba mungutayiza we mulambu.

⁶ Yifwo chatamba kuyilia ha tangwa lizeliene hanji lize lia muchaali. Yize muyibomba matangwa atatu chatamba kuyocha yiweme,

⁷ mumu hiyabwa ya luchisa. Nyi umwe wayilia mulambu uze, chichi kuutayiza.

⁸ Mweswawo, mayilia mavulumuna, mumu halelesa Chuma chize hingunakunjika. Kuchatambile kumwalula nawa mukachi ka atu jami.

⁹ “Muze munubatula mbuto mu minda yenu, kanda nubatula ndoo ku njiza ya munda, nawa kanda nuhuhujola mbuto yeswe mu munda.

¹⁰ Kanda nuhela vinyu yeswe, chibwe yize yinaholoka hashi, kanda nuyitongwona. Nuyihichika mumu hali yiswale ni yilambala. Yami nguli Mwene Zambi, Zambi yenu.

¹¹ “Kanda wiya. Kanda wonga. Kanda uhanjika mahuza.

¹² Kanda nulishinga ni jina liami ni mahuza chakuneha, sonyi. Yami nguli Mwene Zambi, Zambi yenu.

¹³ “Kanda ulaka mukwenu, chibwe kwiya yuma yenyi. Kanda usweka fweto ya akwa mulimo je ndoo hamene.

¹⁴ Kanda utuka kafwa matwi. Kanda usa chitalingiso kulutwe lia kapuputa. Nguvwilenu woma, yami nguli Mwene Zambi, Zambi yenu.

¹⁵ “Kanda ubatula milonga ni uhenge chibwe ni katonde. Kanda ulemesa pichi ni kulelesa chiswale.

¹⁶ Kanda ulamikiza mutu niumwe. Kanda ushindakenya mahuza hali mutu niumwe kumushiha. Yami nguli Mwene Zambi.

¹⁷ “Kanda uvwila mukwenu kole. Nyi hahengesa, mukanjise, hanga kuuchi kubwa nenyi mu mulonga umuwika.

¹⁸ Kanda ukala milonga kuli mutu niumwe, chibwe kumuvutwokela, alioze Zanga mwenyembo we ngwe chize wakulizanga yena mwene. Yami nguli Mwene Zambi.

¹⁹ “Fungenu Shimbi jami. Kanda nutayiza yimuna yenu kusema ni yimuna ya vungu lieka. Kanda nutumba mbuto milali yaali mu munda umuwika. Kanda nuzala hina lia milali yaali.

²⁰ “Nyi umwe lunga halimona ni pwo kabinji yoze haamutenda, nyi kanda achimukula hanji kumutusula, nukachisopa, alioze kanda nwashiha mumu mwe pwo te kanda achitusuka.

²¹ Alioze lunga yoze akaneha kuji a panga ku chikolo cha zuwo lia Zambi lia makubu, amulambule ngwe mulambu wa kuhilwisa ni kuwezela.

²² Hako akamanununa Shimbi ya kumubemesa ha kuchiza mulonga wa mwe lunga, ni Zambi makamukonekena.

²³ “Muze munukanjila mu chifuchi cha Kanana, ni muze munukatumba mitondo ya mihuko yeka ni yeka, ha miaka yitatu mihuko nukayalula ya luchisa. Ha miaka yize yitatu kanda nukayilia.

²⁴ Ha mwaka wa muchiwana chatamba kukunjika mihuko yeswe kuli yami ha kunguchichimieka yami Mwene Zambi.

²⁵ Alioze ha mwaka wa muchitano munuhasa kulia ye mihuko. Nyi nwalinga yino yeswe, mitondo yenu muyikema mihuko yinji. Yami nguli Mwene Zambi, Zambi yenu.

²⁶ “Kanda nulia yifwo ya manyinga. Kanda nutaha ngombo chibwe kupanda wanga.

²⁷ Kanda nutewula kambu ja mu mbalangwe, chibwe kukamba wevu,

²⁸ chibwe kulichata, ha kusoloka ngwo, haafwisa. Yami nguli Mwene Zambi.

²⁹ “Kanda nubihisa ana jenu a mapwo ha kwapwisa yitanji a ku mazuwo ja mazambi. Nyi nwachilinga munukawayila mazambi eka, ni chifuchi muchikazala ni utanji.

³⁰ Lemesenu tangwa lia kuhwima, lemesenu nawa zuwo liami lia kunguwayila. Yami nguli Mwene Zambi.

³¹ “Kanda nuhula mana kuli akwa mahamba ni kuli tahi. Nyi nwachilinga munubwa akwa luchisa. Yami nguli Mwene Zambi, Zambi yenu.

³² “Senu vumbi tushinakaji, alemesenu. Nguvwilenu woma, nguli Mwene Zambi.

³³ “Kanda nuhungumiona yilambala waze ali mu chifuchi chenu.

³⁴ Alingenu ngwe usoko wenu Aisraele, azangenu ngwe chize nwakulizanga yenwene. Iwulukenu chize nwabwile yilambala mu chifuchi cha Egiptu. Yami nguli Mwene Zambi, Zambi yenu.

³⁵ “Kanda nweseka chibwe kupezala chibwe kwaalula ni uhenge.

³⁶ Pezo jenu ni yesekelo yeswe yibwe yamwenemwene. Nguli Mwene Zambi, Zambi yenu, nanutuhwishile mu chifuchi cha Egiptu.

³⁷ Fungenu Shimbi jami jeswe ni yiyulo yami yeswe. Yami nguli Mwene Zambi.”