Alevi 18 - Mukanda Wa Zambi 1970

Utanji

¹ Mwene Zambi yambila Mose

² ha kulweza Aisraele ngwenyi: “Nguli Mwene Zambi, Zambi yenu.

³ Kanda nwimbulula yize akulinga akwa Egiptu, kuze nwabwile, hanji yize akulinga akwa Kanana, kuze ngunanutwala haliabwila.

⁴ Fungenu Shimbi jami, lingenu yize ngunanwambe. Yami nguli Mwene Zambi, Zambi yenu.

⁵ Fungenu Shimbi jami ni yiyulo yami. Nyi nwachilinga, munulamwina mwono wenu. Yami nguli Mwene Zambi.”

⁶ Mwene Zambi yalongesa Shimbi jino. Kanda ulimona ni usoko we.

⁷ Kanda ulimona ni noko. Nyi ka, muuvwisa tatenu sonyi. Kali noko; kanda umuvwisa sonyi.

⁸ Kanda ulimona ni pwo mweswe wa tatenu. Nyi ka, muuvwisa tatenu sonyi.

⁹ Kanda ulimona ni ndumbwe, chibwe yoze wasemukinyine mu zuwo hanji kweka.

¹⁰ Kanda alimona ni mujikulu we. Nyi ka, yena mwene muwivwa sonyi.

¹¹ Kanda ulimona ni mwana wa tatenu, mumu kali ndumbwe.

¹² Kanda ulimona ni tatenu pwo, mumu kali ndumbu ya tatenu.

¹³ Kanda ulimona ni yayo ya noko hanji mwanakwo, mumu kaali anoko.

¹⁴ Kanda ulimona ni pwo lia tatenu wa mukulwana hanji wa kanuke, mumu kaali anoko,

¹⁵ Kanda ulimona ni tembwa mwane, mumu kali pwo lia mwane.

¹⁶ Kanda ulimona ni pwo lia yayenu hanji lia mwanakwenu, mumu kaali manyali je,

¹⁷ Kanda ulimona ni a mwana ni naye chibwe mujikulu wenyi. Nyi walimona kulu ni mama, kanda ulimona nawa ni mwanenyi hanji ni mujikulu wenyi. Kaali usoko we. Chili chibi lume.

¹⁸ Kanda uhalika pwo lie ni yayo hanji ni mwanakwo shimbu pwo lie uchili ni mwono.

¹⁹ Kanda ulimona ni pwo shimbu uchili ku zuwo likwo, mumu kanda achisana.

²⁰ Kanda ulimona ni pwo lia mukwenu. Nyi ka, muulichisa nenyi.

²¹ Kanda ulambula mwane niumwe kuli zambi Moleke. Nyi ka, kuwatuka Mwene Zambi, Zambi ye.

²² Yenu malunga kanda nulinga utumwa. Zambi kakuchivutwokela.

²³ Yena lunga hanji pwo kanda ulimona ni kashitu. Uhenge uze muunupwisa akwa luchisa.

²⁴ Kanda nulichisa ni yino yuma, mumu yenayo akulinga akwa mavungu waze Mwene Zambi anahumu kulutwe lienu, hanga nusalakane mo.

²⁵ Yitanga yo hiyinabihisa chifuchi. Kashika Mwene Zambi hanamwesa che chifuchi lamba, hanga chisaze atu waze atwama mo.

^26-27 Haanalingi yuma yino yeswe ya kuzelwokesa ni kubihisa chifuchi, alioze yenu kuchatambile kuyilinga. Yenu eswe, chibwe Aisraele chibwe yilambala waze atwama mukachi kenu, chanutamba kufunga Shimbi ja Mwene Zambi ni yiyulo yenyi,

²⁸ mba chifuchi kuchichi kanusaza, ngwe chize hichasaza mavungu waze abwile mo.

²⁹ Nunanyingika ngwenu, mweswawo malinga yuma yino ya kuzelwokesa, kechi kumwalula nawa mukachi ka atu ja Zambi.

³⁰ Mwene Zambi ngwenyi: “Fungenu Shimbi jize ngunanwehe. Kanda nwimbulula atu waze atwama mu che chifuchi, kanda nulipwisa akwa luchisa ha kulinga yuma yino. Yami nguli Mwene Zambi, Zambi yenu.”