Alevi 17 - Mukanda Wa Zambi 1970

Ulinange wa manyinga

¹ Mwene Zambi yambila Mose

² ha kwaha Arone ni ana jenyi a malunga ni Aisraele eswe Shimbi jino.

^3-4 Nyi umwe Kaisraele mashiha ngombe hanji panga hanji pembe wa mulambu kuli Mwene Zambi, kanda amushihila kweka, shina ku chikolo cha zuwo lia Zambi. Nyi ka, kanakolema Shimbi, kanahi ku mulonga wa manyinga. Kuchatambile kumwalula nawa mukachi ka atu ja Zambi.

⁵ Shimbi yino yinalumbunuka ngwo, haliabwila Aisraele chaatamba kuneha kuli Mwene Zambi yimuna waze te akushihila mu yambu. Akaaneha kuli hako ku chikolo cha zuwo lia Zambi ni kwashiha mumu ha mulambu wa kulivwa cha Zambi ni atu.

⁶ Hako akasapwila manyinga ku mbango jiwana ja chilumbilo chize chili ku chikolo cha zuwo lia Zambi, ni kwocha maji hanga lupembo mubema akawahile kuli Zambi.

⁷ Aisraele akalitwamina kushihila yimuna mu yambu ni kuyilambula kuli mahamba. Aka funga Shimbi yino ndoo ku miaka yeswe.

⁸ Nyi umwe Kaisraele hanji chilambala yoze watwama mukachi kenu malambula mulambu wa kwocha, hanji weswe mulambu

⁹ kuli Mwene Zambi, kuma kweka hi ku chikolo cha zuwo lia Zambi ko, kuchatambile kumwalula nawa mukachi ka atu ja Zambi.

¹⁰ Nyi umwe Kaisraele hanji chilambala yoze watwama mukachi kenu, makalia yifwo ya manyinga, Mwene Zambi makalimika nenyi, kechi kumwalula nawa mukachi ka atu jenyi.

¹¹ Akwa mwono eswe, mwono wo uli mu manyinga. Kashika Mwene Zambi waambile ngwenyi, manyinga eswe chatamba kwazujila ha chilumbilo ha kuchiza milonga ya atu. Manyinga we mwono, kaakuchiza milonga.

¹² Kashika Mwene Zambi wambilile Aisraele ngwenyi, “Chibwe yenu, chibwe yilambala waze atwama mukachi kenu, kuchaatambile kulia yifwo ya manyinga.”

¹³ Nyi umwe Kaisraele hanji chilambala yoze watwama mukachi kenu, hashiha umwe kashitu hanji kajila mubema ha kulia, chatamba kumwangina manyinga ja mwe kashitu hashi ni kwashikila mavu.

¹⁴ Akwa mwono, mwono wo weswe uli mu manyinga. Kashika Mwene Zambi wambilile Aisraele ngwenyi, kanda akalia yifwo ya manyinga. Mweswawo makachilinga kechi kumwalula nawa mukachi ka atu jenyi.

¹⁵ Nyi umwe mutu, Kaisraele hanji chilambala, makalia yifwo ya kashitu yoze walifwila hanji wamukoka, chamutamba kukosa mahina jenyi, ni kusana, ni kushimbwila ndoo ku chingoloshi, mba mabema.

¹⁶ Nyi ngwe kachilingile, chatamba kumumwesa lamba.