Alevi 16 - Mukanda Wa Zambi 1970

Tangwa lia kuwana ni Zambi

¹ Mwene Zambi yahanjika ni Mose muze ana ja Arone aali a malunga haafwa, muze okwele kahia ka mbala ku meso ja Mwene Zambi.

² Yamba ngwenyi: “Lweza yayenu Arone akanjile muma mwa chijila kuhiana nikulita ni Shimbi. Mumu mwenamo nakulisolola mu lelwa, homa ha kukukila milonga, ha mushete wa Usendo wa yami ni Aisraele. Nyi makakolema Shimbi yino, makafwa kwenyi.

³ Muze makanjila muma mwa chijila kuhiana, akambata chimbembe wa kuji mumu ha mulambu wa milonga, ni kuji a panga mumu ha mulambu wa kwocha.”

⁴ Mba Mwene Zambi yalongesa Mose Shimbi jino. Muze Arone makanjila muma mwa chijila kuhiana, chamutamba kusana ni kuzala mahina a uhako: chikuto chisuku chitoma cha lefuna, ni kaputula, ni muya, ni kapusa.

⁵ Chikungulwila cha Aisraele akamwaha Arone makuji a pembe aali mumu ha mulambu wa milonga ni kuji a panga mumu ha mulambu wa kwocha.

⁶ Neye akalambula kuji a ngombe ha kuchiza milonga yenyi mwene ni ya akwa jiko lienyi.

⁷ Akatwala nawa makuji a pembe aali ku chikolo cha zuwo lia Zambi lia makubu.

⁸ Arone akata chela ha kusakula pembe aali, umuwika wa Mwene Zambi ni mukwo wa chikose.

⁹ Pembe yoze makaholokela chela cha Mwene Zambi, Arone akamukunjika ni kumulambula mulambu wa milonga.

¹⁰ Pembe yoze makaholokela chela cha chikose akamukunjika ni kumutwala wa mwono mu puya. Pembe yoze kali chilayi cha kuchiza milonga ya atu.

¹¹ Muze Arone makalambula kuji a ngombe, mulambu wa milonga hali iye mwene ni hali akwa jiko lienyi,

¹² akokola kahia ka makala ha chula ha chilumbilo, akazomona nawa moko aali a yuma ya vumba libema, ni kuyitwala muma mwa chijila.

¹³ Kwenako ku meso ja Mwene Zambi makochela yuma ya vumba libema, ni mwishi muukafuka homa ha kukukila milonga ha mushete wa Usendo wa Zambi ni atu, kuchina makamona ho, nyi ka makafwa.

¹⁴ Akanda amwe manyinga a kuji a ngombe, akaasapwile ha mbango ya homa ha kukukila milonga, ni yisuho shimbiali nawa kulutwe lia mushete wa Usendo.

¹⁵ Makabwamuze akashiha mwe kuji a pembe mumu ha mulambu wa milonga ya atu, akambata e manyinga ni kwatwala muma mwa chijila kuhiana, ni kwasapwila homa ha kukukila milonga ni kulutwe lia mushete wa Usendo, ngwe chize halinga ni manyinga a ngombe.

¹⁶ Chenacho makamanununa Shimbi ja kubemesa muma mwa chijila kuhiana ku luchisa wa Aisraele, ni ku milonga yo yeswe. Arone chatamba kulinga chino ku zuwo lia Zambi, mumu kuliatwama mukachi ka musumba wa akwa luchisa.

¹⁷ Ha shimbu lize Arone makanjila muma mwa chijila kuhiana ha kumanununa Shimbi ja kubemesa, ndoo muze makatuhuka mo, mutu niumwe kuchatambile kubwa mu zuwo lia Zambi. Muze makamanununa Shimbi ja kulibemesa iye mwene, ni akwa jiko lienyi, ni Chikungulwila cheswe,

¹⁸ mba makatuhuka ku chilumbilo ha kulambula mulambu wa kwocha ha kuchibemesa. Chamutamba kwanda amwe manyinga a kuji a ngombe ni a kuji a pembe ni kwakomona ha mbinga ja ha mambango awana a chilumbilo.

¹⁹ Chamutamba kusapwila manyinga ni munwe wenyi ha chilumbilo yisuho shimbiali. Chenacho maakachibemesa ku milonga ya Aisraele ni kuchipwisa cha chijila.

Kuji a pembe wa chikose

²⁰ Muze Arone makamanununa Shimbi ja kubemesa muma mwa chijila ni zuwo heswe lia Zambi lia makubu, ni chilumbilo, akakunjika kuli Mwene Zambi kuji a pembe wa mwono, wa chikose.

²¹ Akanangika moko jenyi eswe aali ha mutwe wa pembe ni kushikishila ho shili ni milonga ni uhulia wa Aisraele, ni kuyisa ha mutwe wa mwe pembe. Mutu yoze haanatongola akatwala mwe pembe mu yambu.

²² Pembe makambata shili yo yeswe ni kuya nayo mu puya.

²³ Arone makabwamuze, akaya mu zuwo lia Zambi ni kuzula mahina ja uhako waze azalanga ha kunjila muma mwa chijila.

²⁴ Chamutamba kusanyina kumwe kuma kwa chijila ni kuzala mahina jenyi mwene. Mba makatuhuka ni kulambula mulambu wa kwocha, ha kuchiza milonga yenyi ni yize ya Aisraele.

²⁵ Akalambula mulambu wa maji ha chilumbilo, kuuli mulambu wa milonga.

²⁶ Mutu yoze makatwala pembe wa chikose mu puya, chamutamba kukosa mahina jenyi ni kusana, mba makahiluka mu musumba.

²⁷ Kuji a ngombe ni pembe waze alambwile mulambu wa milonga, waze manyinga jo haanaatwala muma mwa chijila ha kuchiza shili, akaatwala haze lia musumba ni kwocha kubu ni yifwo ni yuma yeswe ya mu jimo, akayocha ha kahia, yikaweme.

²⁸ Yoze makayocha chamutamba kukosa mahina jenyi ni kusana, mba makanjila mu musumba.

Kulemesa Tangwa lia Kuwana ni Zambi

²⁹ Shimbi jino akajifunga ku miaka yeswe. Ha tangwa lia muchikumi lia kakweji wa muchishimbiali Aisraele ni yilambala waze atwama mukachi ko akajila kulia, ni kulitwamina kulinga milimo.

³⁰ Ha tangwa lize chatamba kwabemesa ku shili yo, hanga akabwe abema.

³¹ Tangwa lize likabwa tangwa lia chijila kuhiana, lize maakajila kulia ni kulitwamina kulinga milimo yeswe. Shimbi jize akajifunga ku miaka yeswe.

³² Mwata wa mahako, yoze hanamuwayisa ni maji ha kuhinga tato, mwenawo makabemesa atu ku shili yo. Makazala mahina jenyi a uhako

³³ ni kubemesa muma mwa chijila kuhiana, ni zuwo lieswe lia Zambi lia makubu, ni chilumbilo, ni mahako, ni atu eswe a mu Chikungulwila.

³⁴ Shimbi jino chatamba kujifunga ku miaka yeswe. Chatamba kufunga Shimbi jino mwaka ha mwaka ha kubemesa Aisraele ku shili yo. Chenacho Mose alingile ngwe chize amwambile Mwene Zambi.