Alevi 15 - Mukanda Wa Zambi 1970

Shimbi hakutwala ku yuma yize muyituhuka mu mujimba

¹ Mwene Zambi yalongesa Mose ni Arone Shimbi jino

² mumu hali Aisraele. Nyi umwe lunga habwa ni musongo wa kuhita ku mahienyi, musongo uze uli wa luchisa,

³ chibwe we musongo unahichi hanji hiwajika.

⁴ Ha muhela haze anatwama hanji anabombo muhabwa ha luchisa.

⁵ Mweswawo makwata we muhela wenyi

⁶ hanji matwama homa haze iye atwamanga, chamutamba kukosa mahina jenyi ni kusana. Kumabwa wa luchisa ndoo ku chingoloshi.

⁷ Mweswawo makwata mwe mutu yoze uli ni musongo wa kuhita, chamutamba kukosa mahina jenyi ni kusana. Kumabwa wa luchisa ndoo ku chingoloshi.

⁸ Nyi ngwe mukwa kuhita hafwila mate hali yoze unabeme, mutu yoze akosa mahina jenyi, ni asane. Kumabwa wa luchisa ndoo ku chingoloshi.

⁹ Yitwamo yeswe haze mukwa musongo anatwama, muyibwa ya luchisa.

¹⁰ Mweswawo makwata cheswe Chuma haze mukwa musongo atwamanga, kumabwa wa luchisa ndoo ku chingoloshi. Mweswawo mambata cheswe Chuma haze atwamanga mukwa musongo, chatamba kukosa mahina jenyi ni kusana, kumabwa wa luchisa ndoo ku chingoloshi.

¹¹ Nyi mwe mukwa musongo makwata umwe mutu muze kanda achisana ku moko, mutu yoze akwatanga, akosa mahina jenyi, asane, kumabwa wa luchisa ndoo ku chingoloshi.

¹² Ndeho (yimbia) ya uma yize mwe mukwa musongo makwata, chatamba kuyishiha, ni chikwachilo cha mutondo chatamba kuchikosa.

¹³ Muze mwe mutu hahinduka ku musongo wenyi, chamutamba kushimbwila matangwa shimbiali ni kukosa mahina jenyi ni kusana mu meya a ku shima, mba mabema.

¹⁴ Ha tangwa lia muchinake akaneha tutele aali hanji ana a membe aali ku chikolo cha zuwo lia Zambi lia makubu ni kwahana kuli hako.

¹⁵ Mwe hako akalambula kajila umuwika mulambu wa milonga, mukwo mulambu wa kwocha. Chenacho maakamanununa Shimbi ja kubemesa mutu.

¹⁶ Muze lunga hamwanga ana, asana mujimba weswe, kumabwa wa luchisa ndoo ku chingoloshi.

¹⁷ Homa heswe haze hamwanganyina ana, ha hina hanji ha lambu, chatamba kuyikosa, muyibwa ya luchisa ndoo ku chingoloshi.

¹⁸ Muze lunga halimona ni pwo lienyi, eswe aali chatamba kusana, kumaabwa a luchisa ndoo ku chingoloshi.

¹⁹ Muze pwo haya ku zuwo likwo, kumabwa wa luchisa ndoo matangwa shimbiali. Mweswawo mamukwata mabwa wa luchisa ndoo ku chingoloshi.

²⁰ Homa heswe haze anatwama hanji anabombo ha matangwa eswe a kujila chenyi, muhakabwa ha luchisa.

^21-23 Mweswawo makwata muhela wenyi hanji homa haze anatwama, chamutamba kukosa mahina jenyi ni kusana. Kumabwa wa luchisa ndoo ku chingoloshi.

²⁴ Nyi umwe lunga malimona nenyi ha matangwa jenyi a kujila, luchisa wa pwo yoze mabwa wa lunga. Neye mabwa wa luchisa matangwa shimbiali, muhela uze anabombo muubwa wa luchisa.

²⁵ Nyi umwe pwo mahita manyinga, alioze hi ha matangwa jenyi a ku zuwo likwo ko, mabwa wa luchisa ha matangwa eswe a kuhita chenyi, ngwe chize akubwa ha matangwa jenyi a ku zuwo likwo.

²⁶ Muhela uze anabombo hanji homa haze anatwama ha matangwa waze eswe, muhabwa ha luchisa.

²⁷ Mweswawo makwata ho, mabwa wa luchisa, chamutamba kukosa mahina jenyi ni kusana. Kumabwa wa luchisa ndoo ku chingoloshi.

²⁸ Muze kuhita cha manyinga jenyi hichahwa, chamutamba kushimbwila matangwa shimbiali, mba mabema.

²⁹ Ha tangwa lia muchinake akatwala tutele aali hanji ana a membe aali kuli hako ku zuwo lia Zambi.

³⁰ Mwe hako akalambula kajila umuwika ha mulambu wa mulonga, mukwo ha mulambu wa kwocha. Chenacho makamanununa Shimbi ya kubemesa mwe pwo.

³¹ Mwene Zambi yambila Mose ha kukanyamisa Aisraele hakutwala ku luchisa wo, hanga keechi kubihisa zuwo lia Zambi lia makubu lize lili mukachi ka musumba. Nyi te maachilinga, maashiha.

³² Jino jili Shimbi hakutwala kuli lunga yoze habwa ni musongo wa kuhita hanji hamwanga ana,

³³ ni pwo ha matangwa jenyi a ku zuwo likwo, hanji lunga yoze halimona ni pwo yoze uli ni luchisa.